កាលពីថ្ងៃអង្គារ ទី២៩ មិនាមេដឹកនាំក្រុមផ្ដាច់ខ្លួនអ៊ុយក្រែនលោកដេនីស ពូស៊ីលីន បាននិយាយថា រដ្ឋផ្ដាច់ខ្លួនដូណេតស្ក៍អាចពិចារណាចូលរួមជាមួយរុស្ស៊ី នៅពេលដែលពេលដែលខ្លួនដណ្ដើមការគ្រប់គ្រងតំបន់ដូណេតស្ក៍ទាំងមូលពីអ៊ុយក្រែន។
បើតាមការរាយការណ៍ដោយសារព័ត៌មានផ្ដាច់ខ្លួន Donetsk News Agency លោកពូស៊ីលីននិយាយថា៖ «ចំពោះការចូលរួមជាមួយសហព័ន្ធរុស្ស៊ី ចំពោះបំណងប្រាថ្នា មានយ៉ាងច្បាស់តាំងពីឆ្នាំ ២០១៤ បំណងប្រាថ្នាចង់នៅក្នុងរុស្ស៊ី។ ប៉ុន្តែឥឡូវនេះ ភារកិច្ចចម្បង គឺការឈានដល់ព្រំដែនរដ្ឋធម្មនុញ្ញនៃសាធារណរដ្ឋ។ បន្ទាប់មកយើងនឹងធ្វើវា»។
ការលើកឡើងបែបនេះ បានកើតឡើង២ថ្ងៃ បន្ទាប់មេដឹកនាំនៃរដ្ឋផ្ដាច់ខ្លួនលូហានស្ក៍ និយាយថាខ្លួនអាចរៀបចំការបោះឆ្នោតប្រជាមតិ ដើម្បីសម្រេចចូលរួមជាមួយរុស្ស៊ី។ ក្រុងកៀវ បានព្រមានថាការបោះឆ្នោតបែបនេះគឺគ្មានមូលដ្ឋានផ្លូវច្បាប់ទេ ហើយនឹងធ្វើឱ្យមានការឆ្លើយតបកាន់តែខ្លាំង។
បីថ្ងៃមុនបញ្ជាឱ្យកងទ័ពរុស្ស៊ីឆ្លងព្រំដែនចូលលុកលុយប្រទេសអ៊ុយក្រែនកាលពីថ្ងៃទី ២៤ កុម្ភៈ ប្រធានាធិបតីរុស្ស៊ីលោកវ្ល៉ាឌីមៀរ ពូទីនបានប្រកាសទទួលស្គាល់ថា រដ្ឋផ្ដាច់ខ្លួនដូណេតស្ក៍ និងលូហានស្ក៍ ជារដ្ឋឯករាជ្យពីអ៊ុយក្រែន ខណៈសហគមន៍អន្តរជាតិទទួលស្គាល់ទឹកដីទាំង២នេះ គឺជាទឹកដីរបស់អ៊ុយក្រែន។
អ៊ុយក្រែន ដែលនិយាយថា ខ្លួនកំពុងប្រយុទ្ធប្រឆាំងនឹងការដណ្ដើមទឹកដីបែបចក្រពត្តិដោយរុស្ស៊ី បាននិយាយម្ដងហើយម្ដងទៀតថា ខ្លួននឹងមិនយល់ព្រមចំពោះការកាត់បញ្ចូលទឹកដីទាំងនេះចូលក្នុងរុស្ស៊ីទេ ដែលនេះគឺជាចំណុចតានតឹងបំផុតក្នុងការចរចាសន្តិភាពជាមួយក្រុងម៉ូស្គូ៕