.jpg)
រុស្ស៊ីនិយាយថា ការចរចាជាមួយអ៊ុយក្រែន ដែលកំពុងកើតឡើងនៅប្រទេសតួកគី សប្ដាហ៍នេះ បាននាំឱ្យមាន «ការរីកចម្រើនគួរឱ្យកត់សម្គាល់» ហើយបានអះអាងថា បញ្ហាអធិបតេយ្យលើឧបទ្វីបគ្រីមា និងតំបន់ត្រូវបានដោះស្រាយ ប៉ុន្តែអ៊ុយក្រែនបានច្រានចោលការអះអាងនេះភ្លាមៗ។
កាលពីថ្ងៃពុធ ទី ៣០ មីនា រដ្ឋមន្ត្រីក្រសួងការបរទេសរុស្ស៊ីលោក សឺហ្គេ ឡាវរ៉ូវ និយាយថា លោកជឿជាក់ថា អ៊ុយក្រែនបានយល់ពីភាពចាំបាច់សម្រាប់ប្រជាជាតិក្នុងការប្រកាន់យកជំហរ «មិនមានអាវុធនុយក្លេអ៊ែរ និងមិនមានបក្សសម្ព័ន្ធ» និងមិនចូលជាសមាជិកអង្គការណាតូ។ លោកក៏បាននិយាយថា បញ្ហាទឹកដីមានជម្លោះជាមួយអ៊ុយក្រែន គ្រីមា និងដុនបាស គឺត្រូវបានដោះស្រាយហើយ។
អ្នកនាំពាក្យក្រសួងការបរទេសអ៊ុយក្រែន លោក អូលេហ្គ នីកូលេនកូ បានឆ្លើយតបភ្លាមៗថា៖ «ឡាវរ៉ូវ បង្ហាញការយល់ច្រឡំអំពីដំណើរការនៃការចរចា»។ លោកបន្ថែមទៀតថា៖ «បញ្ហានៅគ្រីមា និងដុនបាស នឹងត្រូវដោះស្រាយឱ្យចប់សព្វគ្រប់ បន្ទាប់ពីអ៊ុយក្រែនស្ដារអធិបតេយ្យរបស់ខ្លួនឡើងវិញ។ ក្នុងអំឡុងពេលនៃកិច្ចចរចាអុីស្តង់ប៊ុល គណៈប្រតិភូអ៊ុយក្រែន បានបង្ហាញសំណើរបស់ខ្លួនអំពីរបៀបដើម្បីសម្រេចបាននូវគោលដៅនេះ»។
ការចរចាកំពុងកើតឡើងនៅប្រទេសតួកគី ខណៈពេលដែលអាមេរិក និងអ៊ុយក្រែនប្រាប់ពិភពលោកថា កុំឱ្យសូវជឿពាក្យរបស់រុស្ស៊ីពេកអំពីការសន្យាក្នុងការចរចា ឬការប្រកាសថ្មីៗនេះថា ខ្លួននឹងកាត់បន្ថយយោធានៅតំបន់ខ្លះ។
មុនការចរចាទល់មុខចាប់ផ្ដើម មន្ត្រីរុស្ស៊ីនិយាយថា «គ្មានសមិទ្ធផលធំៗ ឬរបកគំហើញ» ត្រូវបានធ្វើឡើងនៅក្នុងការចរចារហូតមកដល់ពេលនេះ។
កាលពីថ្ងៃអាទិត្យ មានការរាយការណ៍ថា ប្រធានាធិបតីអ៊ុយក្រែនលោក វ៉ុលឌីមៀរ ហ្សេលេនស្គី បានចេញសំណើសម្រាប់រុស្ស៊ី ឱ្យកងកម្លាំងចេញពីទឹកដីអ៊ុយក្រែនរហូតដល់តំបន់ដុនបាស ដោយក្រោយការធ្វើបែបនេះ ទើបការចរចា ដើម្បីដោះស្រាយបញ្ហានេះ អាចធ្វើទៅបាន៕
