.jpg)
យោធាអ៊ុយក្រែនហាក់ដូចជាបានផ្ដើមនាំយកការប្រយុទ្ធទៅកាន់ទឹកដីរុស្ស៊ី ដែលជាការវិវឌ្ឍដ៏ធំមួយនៅក្នុងសង្គ្រាម ដែលយោធាអ៊ុយក្រែនជាចម្បងបានដើរតួក្នុងការការពារប្រទេសរបស់ខ្លួនប៉ុណ្ណោះ។
កាលពីថ្ងៃអង្គារ ទី ៣០ មីនា សារព័ត៌មានរុស្ស៊ី បានរាយការណ៍ថា អាជ្ញាធរបានដាក់ភូមិចំនួន ២ ក្នុងស្ថានភាពគ្រាអាសន្ន ហើយបានជម្លៀសប្រជាជនចេញពីតំបន់នោះ។ សារព័ត៌មានរដ្ឋរុស្ស៊ី RIA Novosti បានរាយការណ៍ថា មនុស្ស ៤ នាក់ បានរងរបួសក្នុងការផ្ទុះមួយនៅភូមិ Zhuravlyovka។ ស្ថាប័នរាយការណ៍ថា ប្រភពនៃការផ្ទុះនេះ គឺការវាយប្រហារចេញពីទឹកដីអ៊ុយក្រែន។
សារព័ត៌មាន Interfax បានរាយការណ៍ថា ភូមិ Zhuravlyovka និងភូមិ Niekhoteyevka ត្រូវបានដាក់ក្នុងស្ថានភាពអាសន្ន ហើយប្រជាជនប្រមាណ ១៨០នាក់ ត្រូវបានជម្លៀសទៅទីក្រុងបែលហ្គោរ៉ូដ ដោយសារការផ្ទុះមួយនៅដេប៉ូគ្រាប់រំសេវមួយ។ Interfax មិនបានចោទប្រកាន់អ៊ុយក្រែនថា នៅពីក្រោយការផ្ទុះនេះទេ ប៉ុន្តែរាយការណ៍ថា អាជ្ញាធររុស្ស៊ីជឿជាក់ថា ការផ្ទុះនេះគឺមិនមែនជារឿងចៃដន្យទេ។
ការរាយការណ៍ទាំងនេះ បានកើតឡើង ខណៈពេលកងយោធារុស្ស៊ីប្រកាសផ្លាស់ប្ដូរយុទ្ធ សាស្ត្ររបស់ពួកគេក្នុងការឡោមព័ទ្ធរដ្ឋធានីគៀវរបស់អ៊ុយក្រែន ប៉ុន្តែអ្នកនាំពាក្យក្រសួងការពារជាតិអាមេរិកលោក ចន ឃឺប៊ី បានប្រុងប្រយ័ត្នចំពោះការប្រកាសនេះ ដោយនិយាយថាសកម្មភាពទាំងនេះ គឺគ្រាន់តែជាការផ្លាស់ប្ដូរទីតាំងទ័ពប៉ុណ្ណោះ ហើយមិនមែនជាការដកថយកងកម្លាំងរុស្ស៊ីទេ៕
