.jpg)
ប្រធានាធិបតីចិន លោក Xi Jinping និងប្រធានាធិបតីរុស្ស៊ី លោក Vladimir Putin ក្នុងជំនួបនាពេលកន្លងទៅ។ រូបថត AFP
សហភាពអឺរ៉ុប ចង់ដាក់សម្ពាធលើប្រទេសចិន ឱ្យមានភាពអព្យាក្រឹតជាមួយនឹងជំហររបស់ខ្លួន ជុំវិញការលុកលុយរបស់រុស្ស៊ីលើអ៊ុយក្រែននាពេលថ្មីៗនេះ។ នេះបើតាមប្រភព ដែលដឹងអំពីបញ្ហានេះបានប្រាប់សារព័ត៌មាន CNBC មុនពេលកិច្ចប្រជុំតាមប្រព័ន្ធអនឡាញរវាងទីក្រុងប្រ៊ុចសែល និងទីក្រុងប៉េកាំងនៅថ្ងៃសុក្រ។
គេឃើញមានការព្រួយបារម្ភក្នុងចំណោមមន្ត្រីលោកខាងលិចទាក់ទងនឹងតួនាទី ដែលចិនដើរតួនៅក្នុងសង្គ្រាមរវាងរុស្ស៊ី និងអ៊ុយក្រែន។ រហូតមកដល់ពេលនេះ អាជ្ញាធរចិន បានបដិសេធមិនធ្វើការថ្កោលទោសទាំងស្រុង ចំពោះការឈ្លានពាន ដោយមិនញញើតរបស់រុស្ស៊ីមកលើប្រទេសជិតខាងរបស់ខ្លួន និងបានបដិសេធក្នុងអំឡុងពេលបោះឆ្នោតសម្រាប់ដំណោះស្រាយក្រុមប្រឹក្សាសន្តិសុខអង្គការសហប្រជាជាតិ ដែលកំណត់ឱ្យថ្កោលទោសទីក្រុងម៉ូស្គូ។
ចិនក៏បានគាំទ្រការត្អូញត្អែររបស់ទីក្រុងម៉ូស្គូអំពីការពង្រីកអង្គការណាតូ ហើយមន្ត្រីអាមេរិក ក៏បាននិយាយផងដែរថា រុស្ស៊ីបានស្នើសុំប្រទេសចិន សម្រាប់ការគាំទ្រផ្នែកយោធា និងសេដ្ឋកិច្ចជាអ្វី ដែលវិមានក្រឹមឡាំង និងទីក្រុងប៉េកាំង បានបដិសេធ។
គោលដៅនៃកិច្ចប្រជុំកំពូលគឺ ស្វែងរកមធ្យោបាយមួយ ធានាអព្យាក្រឹតភាពរបស់ចិន មិនឱ្យជួយរុស្ស៊ី។ នេះបើតាមការឱ្យដឹងពីមន្ត្រីសហភាពអឺរ៉ុប ដែលមិនចង់បញ្ចេញឈ្មោះ ដោយសារតែភាពរសើបនៃកិច្ចពិភាក្សា ប្រាប់ CNBC កាលពីថ្ងៃ អង្គារ។
មន្ត្រីដដែលបាននិយាយថា ទំនាក់ទំនងសេដ្ឋកិច្ចអឺរ៉ុប-ចិន និងជម្លោះពាណិជ្ជកម្មនាពេលថ្មីៗនេះ អាចនឹងត្រូវបានលើកយកមកពិភាក្សានៅក្នុងអំឡុងពេលសន្ទនា ប៉ុន្តែ "ការផ្តោតសំខាន់គឺ ពិតជាទៅលើបញ្ហារុស្ស៊ី"។
មន្ត្រីសហភាពអឺរ៉ុបទី២ បានប្រាប់ CNBC ថា កិច្ចប្រជុំកំពូលនេះ គឺជាពេលវេលាកំណត់សម្រាប់ទំនាក់ទំនង អឺរ៉ុប-ចិន។ មន្ត្រីទី២ បាននិយាយថា៖ «ប្រសិនបើពួកគេ [ចិន] សម្របខ្លួនឯងជាមួយរុស្ស៊ី នោះ ច្បាស់ជាមានផលប៉ះពាល់អវិជ្ជមានយ៉ាងខ្លាំងលើទំនាក់ទំនងជាមួយសហភាពអឺរ៉ុប»។
មន្ត្រីសហភាពអឺរ៉ុបទី ៣ ដែលចង់រក្សាភាពអនាមិកផងដែរនោះ បាននិយាយថា កិច្ចប្រជុំកំពូលនេះ ដំបូងឡើយ មានគោលបំណងលើកឡើងអំពីគំនិតផ្តួចផ្តើមតូចៗ។ ប៉ុន្តែ អ្វីៗបានផ្លាស់ប្តូរទៅជាការពិភាក្សាថាតើមានផលវិបាកអ្វីខ្លះ ប្រសិនបើចិនគេចផុតពីទណ្ឌកម្ម [លោកខាងលិច]» ។
កាលពីដើមខែកន្លងទៅ រដ្ឋមន្ត្រីការបរទេសអេស្តូនី Eva-Maria Liimets បានប្រាប់ស្ថានីយទូរទស្សន៍ CNBC ថា ប្រសិនបើចិនជួយរុស្ស៊ីក្នុងការឈ្លានពានអ៊ុយក្រែននោះ លោកខាងលិចគួរតែពិភាក្សាអំពីការដាក់ទណ្ឌកម្មប្រឆាំង នឹងទីក្រុងប៉េកាំងផងដែរ។
លោក Ursula von der Leyen ប្រធានគណៈកម្មការអឺរ៉ុប និងលោក Charles Michel ប្រធានក្រុមប្រឹក្សាសហភាពអឺរ៉ុប នឹងប្រាប់មេដឹកនាំចិន Xi Jinping និងនាយករដ្ឋមន្ត្រី Li Keqiang ថា សង្រ្គាមមិនមែនជាផលប្រយោជន៍របស់ចិនទេ។
លោក Gabrielius Landsbergis រដ្ឋមន្ត្រីការបរទេសរបស់ប្រទេសលីទុយអានី បានប្រាប់កាសែត Financial Times កាលពីខែ កុម្ភៈ ថា ចំណាប់អារម្មណ៍នៅក្នុងសហភាពអឺរ៉ុប ចំពោះប្រទេសចិនបានផ្លាស់ប្តូរ ហើយការនាំចេញពីរដ្ឋសមាជិកផ្សេងទៀត ដែលមានជាមួយលីទុយអានី ក៏ត្រូវបានរារាំងផងដែរ។
ការសម្រេចចិត្តរបស់ទីក្រុងប៉េកាំង ត្រូវបានគេមើលឃើញថា ជាការរំលោភលើច្បាប់ទីផ្សារតែមួយរបស់សហភាពអឺរ៉ុប ដែលធានាដល់ការដោះដូរពាណិជ្ជកម្មរវាងសមាជិក។
អ្នកការទូតសហភាពអឺរ៉ុបនៅទីក្រុងប៉េកាំង បាននិយាយថា៖ «ជំហររបស់ចិនលើការឈ្លានពានរបស់រុស្ស៊ីលើអ៊ុយក្រែនគឺជាការដាស់តឿនមួយ។ អ្នកមិនអាចផ្តាច់សេដ្ឋកិច្ចចេញពីនយោបាយបានទេ ឥឡូវនេះ។ បើយើងយកអ៊ុយក្រែនគឺជា ''ចំណាប់អារម្មណ៍ស្នូល'' សម្រាប់ពួកយើង វាគង់នឹងប៉ះពាល់ដល់យើង ហើយយើងក៏បានត្រៀមខ្លួនរួចហើយ ដើម្បីទទួលរងផលប៉ះពាល់សេដ្ឋកិច្ចខ្លួនឯង»។
អតីតមន្ត្រីចិនម្នាក់ ដែលឥឡូវនេះជាអ្នកផ្តល់ដំបូន្មានដល់រដ្ឋបាលចិន អំពីទំនាក់ទំនងពាណិជ្ជកម្មជាមួយទីក្រុងម៉ូស្គូ បាននិយាយថា៖ «រដាក់ទណ្ឌកម្មប្រឆាំងនឹងរុស្ស៊ី គឺលើសពីអ្វី ដែលរដ្ឋាភិបាលកណ្តាលរំពឹងទុក»។
ប៉ុន្តែ ទីក្រុងប៉េកាំងមិនបានបង្ហាញសញ្ញានៃការឃ្លាតចេញពីរុស្ស៊ីទេ។ ប្រទេសចិន បាននិយាយកាលពីថ្ងៃពុធថា ខ្លួនមានឆន្ទៈក្នុងការជំរុញទំនាក់ទំនងជាមួយទីក្រុងម៉ូស្គូទៅកាន់តែជ្រៅជាងនេះ៕
