​ខណៈពេល​សហគមន៍​អន្តរជាតិ​បង្ហាញ​កំហឹង​ចំពោះ​ការ​លុកលុយ​របស់​រុស្ស៊ី​ទៅលើ​អ៊ុយ​ក្រែ​ន មន្ត្រីការទូត​មកពី​ប្រទេស​ជាច្រើន បាន​ចេញចូល​ក្រុង​ញូវដែលី ក្នុង​បំណង​បញ្ចុះបញ្ចូល​រដ្ឋាភិបាល​ឥណ្ឌា​ឱ្យ​ចាក​ចេញពី​ផ្លូវកណ្ដាល ហើយ​ប្រកាន់​ជំហរ​ឱ្យ​ច្បាស់​មួយ​ជុំវិញ​រុស្ស៊ី ដែលជា​សម្ព័ន្ធមិត្ត​ដ៏​ជិតស្និទ្ធ​មួយ​របស់ខ្លួន​។​

​សហរដ្ឋអាមេរិក​បាន​ប្រើប្រាស់​វិធីសាស្ត្រ​ការ៉ុត និង​ដំបង​៖ បង្ហាញ​សញ្ញា​ថា ខ្លួន​អាច​នឹង​ពង្រឹង​កិច្ច​​សហប្រតិបត្តិការ​យោធា​ជាមួយ​ឥណ្ឌា​ដែល​រំពឹង​ជា​យូរលង់​ណាស់​មកហើយ​លើ​ការ​នាំចូល​អាវុធ​ពី​ក្រុង​ម៉ូស្គូ ប៉ុន្តែ​ក៏បាន​និយាយថា ឥណ្ឌា គឺជា​សម្ព័ន្ធមិត្ត​មិន​រឹងមាំ​ក្នុង​ក្រុម ​«Quad»​។ នាយករដ្ឋមន្ត្រី​ជប៉ុន និង​អូស្ត្រាលី ដែល​ក៏​សមា​​ជិ​ក​នៃ Quad ក៏បាន​រៀបចំ​ជាមួយ​រដ្ឋាភិបាល​ឥណ្ឌា​ផងដែរ​។ នាយក​​រដ្ឋមន្ត្រីអ៊ីស្រា​អែល ក៏​នឹងធ្វើ​ដំណើរ​ទៅកាន់​ប្រទេស​ឥណ្ឌា ​នៅពេល​ឆាប់ៗ​នេះ​ផងដែរ​។​

​ប៉ុន្តែ​នៅពេលដែល​អង្គការ​សហ​​ប្រជាជាតិ​បោះឆ្នោត​លើ​សេចក្ដី​សម្រេច​រិះគន់​អំពើ​អរិភាព​របស់​រុស្ស៊ី ប្រទេស​នេះ បាន​អនុបវាទ​មិន​បោះ​​ឆ្នោត​។ ឥណ្ឌាក៏បាន​អនុបវាទ​ទៅលើ​សេចក្ដីសម្រេច​ដែល​គាំទ្រ​សកម្ម​​ភាព​របស់​រុស្ស៊ី​។ ផ្ទុយទៅវិញ​ឥណ្ឌា​បាន​អំពាវនាវ​ឱ្យ​បញ្ឈប់​ការប្រយុទ្ធ និង​គោរព​បូរណភាព​ទឹកដី​នៃ​ប្រទេស​នីមួយៗ​។

​ការ​លុកលុយ​របស់​រុស្ស៊ី​ទៅលើ​អ៊ុយ​ក្រែ​ន និង​ការឆ្លើយតប បានធ្វើ​ឱ្យមាន​ភាពស្មុគស្មាញ​ទៅលើ​កិច្ច​​ខិតខំ​ប្រឹងប្រែង​របស់​ឥណ្ឌា​ក្នុងការ​​ត្រួសត្រាយ​ផ្លូវ​សម្រាប់​ខ្លួនឯង នៅក្នុង​ពិភពលោក​ដែល​កាន់តែ​ប្រែប្រួល​ឆាប់រហ័ស​ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ​។ នៅ​ចំ​កណ្ដាល​នៃ​រឿងនេះ​មានការ​កើនឡើង​នៃ​ការយល់ឃើញ​ក្នុងចំណោម​អ្នក​យុទ្ធសាស្ត្រ​គោលនយោបាយ​ការបរទេស​ឥណ្ឌា​ថា ប្រទេស​របស់​ពួកគេ​មិនអាច​កាន់ជើង​ភាគី​ណាមួយ ក្នុង​ពិភព​​លោក​កាន់តែ​ពហុ​ប៉ូល​ជាង​មុន​។​

​ចំណុចខ្សោយ​ជាច្រើន​របស់​ឥណ្ឌា​ដែល​រួមមាន​សេដ្ឋកិច្ច​កំពុង​ថយ​ល្បឿន ដែល​កំពុង​មានការ​លំ​បាក​ដើម្បី​បំពេញតម្រូវការ​របស់​ចំនួន​ប្រជាជន​កំពុង​កើនឡើង និង​យោធា​ដែល​កំពុង​ប្រឈម​នឹង​ជម្លោះទឹកដី​ជាមួយ​ចិន និង​ប៉ា​គី​ស្ថាន​បានធ្វើឱ្យ​ប្រទេស​នេះ​ត្រូវការ​សម្ព័ន្ធមិត្ត​ច្រើន និង​ទូលំទូលាយ បើទោះបីជា​សម្ព័ន្ធមិត្ត​ទាំងនេះ​ប្រឆាំង​គ្នា យ៉ាង​ជូរចត់​ក៏ដោយ​។​

​បន្ទាប់ពី​ចំណាយពេល​ជាច្រើន​ឆ្នាំ​ក្នុងការ​ត្រួសត្រាយ​ផ្លូវ​ឆ្លងកាត់​ពិភពលោក​ បាយ​ប៉ូ​ឡា ​នៃ​សង្គ្រាមត្រជាក់​ឥឡូវនេះ​ឥណ្ឌា​ គឺ​ប្រឈម​នឹង​ភាពស្មុគស្មាញ​កាន់តែច្រើន ជាពិសេស​ប្រទេស​ចិន ដែល​នៅ​មាត់ទ្វារ​របស់ខ្លួន​។​

​នៅ​ថ្ងៃ​ដែល​អង្គការសហប្រជាជាតិ បោះឆ្នោត​លើ​សេចក្ដីសម្រេច រដ្ឋ​​មន្ត្រី​ការបរទេស​ឥណ្ឌា​លោក​បណ្ឌិត​ស៊ូ ប្រា្ហ មាណ​យ៉ាំ​ចៃ​សាន​កា បាន​ប្រាប់​សភា​ឥណ្ឌា​ថា​៖ «​ជំហរ​របស់​យើង​មិនមែន​ថា​នេះ​មិនមែនជា​បញ្ហា​របស់​យើង​ទេ ជំហរ​របស់​យើង​ គឺ​យើង​គាំទ្រ​សន្តិភាព​»​។

លោក​បន្ថែមទៀតថា​៖ «​ការសម្រេចចិត្ត​គោ​លន​យោ​​បាយ​ការបរទេស​របស់​ឥណ្ឌា ត្រូវបាន​ធ្វើឡើង​ដើម្បី​ផលប្រយោជន៍​ជាតិ​ឥណ្ឌា ហើយ​យើង​ត្រូវ​នាំ​ផ្លូវ​ដោយ​ការគិត​របស់​យើង ទស្សនៈ​របស់​យើង ផលប្រយោជន៍​របស់​យើង​»​។​

​ការតស៊ូ​មតិ​នៅក្នុង​សភា​ឥណ្ឌា​នៅថ្ងៃនោះ​ បានបង្ហាញ​អំពី​ស្ថាន​ភាពលំបាក​ដែល​ឥណ្ឌា​នឹងត្រូវ​ឆ្លងកាត់​។​

​មានការ​លើកឡើង​អំពី «​ស្តង់ដា​ ២» ពី​លោកខាងលិច ដែល​ដាក់​សម្ពាធ​ឱ្យ​ឥណ្ឌា​កាត់បន្ថយ​ការនាំ​ចូល​ប្រេង​ពី​រុស្ស៊ី ខណៈពេលដែល​ប្រទេស​នៅ​អឺរ៉ុប​បន្ត​ការ​នាំចូល​ប្រេង​ពី​រុស្ស៊ី​។ ប៉ុន្តែ​ការ​មាន​សំណួរ​ថា​ ជំហរ​អព្យាក្រឹត​របស់​ឥណ្ឌា នឹង​មានន័យ​យ៉ាងដូចម្ដេច​ចំពោះ​សន្តិសុខ​របស់ខ្លួន​។ តើ​ឥណ្ឌា​អាច​បង្ក​ភាព​តានតឹង​ជាមួយ​អាមេរិក ជប៉ុន និង​អូស្ត្រាលី ដែលជា​ដៃគូ​សំខាន់​ក្នុងការ​ពង្រឹង​ការ​​ប្រឆាំងនឹង​ចិន​? តើ​ទំនាក់ទំនង​ចិន និង​រុស្ស៊ី​នឹង​កាន់តែ​ជិតស្និទ្ធ​ដោយសារ​ទណ្ឌកម្ម​លោកខាងលិច​?

​លោក​បណ្ឌិត​ចៃ​សាន​កា​ គឺ​នៅ​ទីតាំង​ពិសេស​មួយ ដោយ​លោក​គឺជា​បញ្ញវន្ត​ឈានមុខ​គេ​លើ​ចក្ខុវិស័យ​ការបរទេស​របស់​ឥណ្ឌា​នៅក្នុង​ពិភព​​លោក​ដែល​កាន់តែ​ស្មុគស្មាញ​ហើយ​លោក​មាន​តំណែង ដែល​ផ្ដល់​អំណាច​ឱ្យ​លោក​អនុវត្ត​ចក្ខុ​វិស័យនេះ​។​

​លោក​បាន​ចំណាយពេល​ជាង​ ៤០ ឆ្នាំ​បម្រើការ​ជា​មន្ត្រី​ការបរទេស ដោយមាន​ការតែងតាំង​ជា​ឯកអគ្គរដ្ឋទូត​ប្រចាំ​ក្រុង​ប៉េកាំង និង​ក្រុង​វ៉ាស៊ីនតោន មុន​ចូលនិវត្តន៍​នៅ​ឆ្នាំ ២០១៨ ជា​មន្ត្រី​អាជីព​ជាន់ខ្ពស់​ជាងគេ​នៃ​ក្រសួងការបរទេស​ឥណ្ឌា​។ ១ ​ឆ្នាំ​ក្រោយមក​លោក​ត្រូវបាន​លោកនាយក​រដ្ឋមន្ត្រី ​ណារិនដ្រា ម៉ូ​ឌី ជ្រើសរើស​ជា​រដ្ឋមន្ត្រីការបរទេស​ក្នុង​រដ្ឋាភិបាល​របស់លោក​។ ក្នុង​រយៈពេល​ចូលនិវត្តន៍​ ១ ​ឆ្នាំនេះ ​លោក​បាន​សរសេរ​សៀវភៅ​មួយ​មាន​ចំណងជើង​ថា​ «​វិធីសាស្ត្រ​របស់​ឥណ្ឌា​៖ យុទ្ធសាស្ត្រ​សម្រាប់​ពិភព​​លោក​មិន​ច្បាស់​» ​ដែល​និយាយ​អំពី​យុទ្ធសាស្ត្រ​ការទូត​របស់​ឥណ្ឌា​។​

​ក្នុង​សៀវភៅ​នេះ លោក ​ចៃ​សាន​កា ​សរសេរថា បញ្ហា​ពិភពលោក គឺ​បង្ក​ដោយសារ​ការកើនឡើង​នៃ​ «​បុគ្គល​​និយម​» នៅតាម​បណ្ដា​ប្រទេស​នៅ​ជុំវិញ​ពិភពលោក ហើយ​ការ​អើពើ​គំនិត​អ្នកដទៃ និង​ការធ្លាក់ចុះ​របស់​អាមេរិក​។​

​លោក​សរសេរថា​៖ «​វា​នឹង​តម្រូវឱ្យមាន​ការជំរុញ​ផលប្រយោជន៍​ជាតិ​ដោយ​កំណត់​អត្តសញ្ញាណ និង​ទាញយក​ឱកាស​ដែល​បង្កើតឡើង​ដោយ​ភាព​ផ្ទុយគ្នា​ជាស​កល​»​។​

​ភាពផុយស្រួយ​នៃ​ការធ្វើ​បែបនេះ ត្រូវ​បានបង្ហាញ​យ៉ាងច្បាស់​នៅពេលដែល​រដ្ឋមន្ត្រីការបរទេស​ចិន​លោក ​វ៉ាង យី ​ធ្វើដំណើរ​ទស្សនកិច្ច​មក​កាន់​ប្រទេស​ឥណ្ឌា ជា​លើក​​ដំបូង​ចាប់​តាំង​ការប៉ះទង្គិច​នៅ​ទឹកដី​មាន​ជម្លោះ​រវាង​ប្រទេស​ទាំង ​២ ​កាលពី ​២ ​ឆ្នាំ ដែល​បាន​រក្សា​ភាព​តានតឹង​ខ្ពស់​នៅក្នុង​ទំនាក់ទំនង​របស់​ពួក​​គេ​។​

​មន្ត្រី​ឥណ្ឌា​ព្យាយាម​សង្កត់ធ្ងន់ថា ​ដំណើរ​ទស្សនកិច្ច​នេះ​ គឺ​ដើម្បី​ព​ន្លឿ​ន​ដំណើរការ​ដកទ័ព​ភាគី​ទាំងសងខាង​ពី​តំបន់​មាន​ជម្លោះ ដែលមាន​លក្ខណៈ​យឺតយ៉ាវ​ខ្លាំង ​បើទោះបី​ជាមាន​ការចរចា​ដើម្បី​ធ្វើ​បែប​ជាង ១៥ ដង​ទៅហើយ​។​

​ប៉ុន្តែ​អ្នកវិភាគ​មួយចំនួន​និយាយថា ការកំណត់​ពេលវេលា​នៃ​ដំណើរ​ទស្សនកិច្ច គឺជា​ការបង្ហាញ​យ៉ាងច្បាស់​ថា ​ក្រុង​ប៉េកាំង កំពុង​ព្យាយាម​ទាញយក​ផលប្រយោជន៍​ពី​ការខ្វែងគំនិត​រវាង​ឥណ្ឌា និង​អាមេរិក ជុំវិញ​ការឆ្លើយតប​នឹង​ការ​លុកលុយ​របស់​រុស្ស៊ី​ទៅលើ​អ៊ុយ​ក្រែ​ន​។ រុស្ស៊ី​ក៏​អាច​កំពុង​ធ្វើបែបនេះ​ផងដែរ ដោយ​រដ្ឋមន្ត្រីការបរទេស​រុស្ស៊ី​លោក ​ស៊ើ​ហ្គេ​យ៍ ឡាវ​រ៉ូ​វ ត្រូវបាន​គេ​រំពឹងថា នឹងធ្វើ​ទស្សនកិច្ច​ក្រុង​ញូ​ដែ​លី​នៅ​សប្ដាហ៍​នេះ​។​

​សម្រាប់​ផ្នែក​ធំ​នៃ​ប្រវត្តិសាស្ត្រ​ឯករាជ្យ​របស់​ប្រទេស​ឥណ្ឌា មេដឹកនាំ​របស់ខ្លួន​បាន​សម្លឹង​ទៅ​ទីក្រុង​ម៉ូស្គូ​មិន​ត្រឹមតែ​សម្រាប់​ការផ្គត់ផ្គង់​អាវុធ​ប៉ុណ្ណោះ​ទេ ប៉ុន្តែ​ថែមទាំង​សម្រាប់​ការគាំទ្រ​ផ្នែក​នយោបាយ​នៅ​អង្គការសហប្រជាជាតិ​ផងដែរ​។ ទីក្រុង​ម៉ូស្គូ​នៅតែ​ជា​សម្ព័ន្ធមិត្ត​ដ៏​ស្ថិតស្ថេរ នៅពេលដែល​ក្រុង​វ៉ាស៊ីនតោន​បង្ក​ការខកចិត្ត​ម្ដង​ហើយ​ម្តងទៀត​ក្នុង​ទីក្រុង​ញូវដែលី រួមទាំង​ការជួយ​ប៉ា​គី​ស្ថាន ដែលជា​សត្រូវ​របស់​ឥណ្ឌា និង​ការដាក់ទណ្ឌកម្ម​លើ​ប្រទេស​ឥណ្ឌា ​សម្រាប់​ការអភិវឌ្ឍ​អាវុធ​នុយក្លេអ៊ែរ​។​

​បើទោះបីជា​ទំនាក់ទំនង​ជាមួយ​ទីក្រុង​វ៉ាស៊ីនតោន​ បាន​កើន​ឡើងដល់​ចំណុច​មួយ​ដែល​សហរដ្ឋអាមេរិក​ឥឡូវនេះ​ជា​ដៃគូ​ពាណិជ្ជកម្ម​ដ៏​ធំ​បំផុត​របស់​ឥណ្ឌា​ក៏ដោយ ក៏​នៅតែមាន​ការស្ទាក់ស្ទើរ​ស​ម្រា​ប់​ទីក្រុង​ញូ​ដែ​លី​។ ចុងក្រោយ​នេះ គឺ​មកពី​ការ​ដកទ័ព​អាមេរិក​ចេញពី​អា​ហ្វ​ហ្គា​នី​ស្ថាន​។ ឥណ្ឌា​បាន​តម្រឹម​ផល​ប្រ​យោជន៍​របស់ខ្លួន​នៅ​ទីនោះ​យ៉ាង​ជិតស្និទ្ធ​ជាមួយនឹង​វត្តមាន​របស់​អាមេរិក ហើយ​ចុងក្រោយ​គ្រាន់តែ​ឃើញ​សហរដ្ឋអាមេរិក​ចាកចេញ​ពី​អា​ហ្វ​ហ្គា​នី​ស្ថាន ហើយ​ផ្ដល់​ប្រទេស​នេះ​ទៅឱ្យ​ពួក​តា​លី​បង់ ដែល​ញូវដែលី​បាន​មើលឃើញ​ជា​យូរ​មកហើយ​ថា​ជា​ប្រូ​ក​ស៊ី​របស់​យោធា​ប៉ា​គី​ស្ថាន​ដែល​ចាប់ដៃ​ជាមួយ​ទីក្រុង​ប៉េកាំង​។​

​នៅក្នុង​ការស្វែងរក «​ស្វ័យភាព​​ជា​យុទ្ធសាស្ត្រ​» សម្រាប់​ខ្លួន ឥណ្ឌា​មាន​ភាពយឺតយ៉ាវ​ក្នុងការ​បង្កើត​ចម្ងាយ​ពី​ទីក្រុង​ម៉ូស្គូ​។ ខណៈពេលដែល​ឥណ្ឌា​បាន​បង្កើន​ការទិញ​អាវុធ​ពី​សហរដ្ឋអាមេរិក​ពី​តិចតួច​ទៅ​ប្រ​ហែល ២០ ពាន់​លាន​ដុល្លារ​ក្នុង​ទស​​វត្សរ៍​កន្លងមកនេះ ពួកគេ​នៅតែ​ពឹង​ផ្អែកលើ​រុស្ស៊ី​សម្រាប់​ប្រហែល ៦០​ ភាគរយ​នៃ​សម្ភារ​យោធា​របស់ខ្លួន​។​

​រដ្ឋាភិបាល​ឥណ្ឌា​មាន​ទំនុកចិត្តថា ការ​បង្វែរ​ទិសដៅ​របស់ខ្លួន​ពី​សម្ពាធ​របស់លោក​ខាងលិច​មក​លម្អៀង​លើ​រុស្ស៊ី​នៅ​ទីបំផុត​នឹងមិន​ធ្វើឱ្យ​ខូច​ទំនាក់ទំនង​របស់ខ្លួន​ឡើយ ដោយសារ​ការ​ជឿជាក់ថា ឥណ្ឌា​គឺជា​គឺជា​កត្តា​ទប់ទល់​ដ៏​សំខាន់​មួយ​លើ​គោលនយោបាយ​ចក្រពត្តិនិយម​របស់​ចិន​។​

​ក្រុង​ញូវដែលី បាន​ចូលរួម​ជា​មួយ​សម្ព័ន្ធភាព Quad បើទោះបីជា​មានការ​ប្រឆាំង​យ៉ាងខ្លាំង​ពី​រុស្ស៊ី និង​ចិន​ក៏ដោយ ដែល​បាន​ប្រដូច​វា​ទៅនឹង​អង្គការ​ណា​តូ​នៅ​ភាគ​ខាង​​កើត​ដែល​មានបំណង​ចង់​ឡោមព័ទ្ធ​ប្រទេស​ចិន​។ ប៉ុន្តែ​ឥណ្ឌាបាន​រក្សា​ទង្វើ​រក្សា​តុល្យភាព​របស់ខ្លួន ដោយ​ទិញ​សព្វាវុធ​ពី​រុស្ស៊ី រួមទាំង​ប្រព័ន្ធ​ការពារ​មី​ស៊ី​ល បើទោះបី​ជាមាន ការគំរាមកំហែង​ពី​ទណ្ឌកម្ម​របស់​សហរដ្ឋ​អាមេរិក​ក៏ដោយ​។​

​ប្រមាណ​ ២​ សប្ដាហ៍​ក្រោយ​ការ​​លុកលុយ​របស់​រុស្ស៊ី​លើ​អ៊ុយ​ក្រែ​ន មេដឹកនាំ​នៃ Quad បាន​បើក​កិច្ច​​ប្រជុំ​កំពូល​មួយ​ដែល​ត្រូវបាន​គេ​មើលឃើញថា​ ជាការ​បង្ហាញ​ពី​ការ​​រួបរួម បើទោះបីជា​ឥណ្ឌា​មិន​ស្ថិត​​នៅលើ​ទំព័រ​ដូចគ្នា​លើ​សង្គ្រាម​របស់​រុស្ស៊ី​ក៏ដោយ​។​

​អ្នកវិភាគ​ខ្លះ​បាន​និយាយថា យុទ្ធនាការ​ដ៏​ឃោរឃៅ​របស់​រុស្ស៊ី​នៅ​អ៊ុយ​ក្រែ​ន និង​លទ្ធភាព​ដែល​ទីក្រុង​ម៉ូស្គូ​ទំនងជា​នឹង​លេចចេញ​ជា​រូបរាង​ថយចុះ​ពី​សង្គ្រាម និង​ទណ្ឌកម្ម​អាច​ព​ន្លឿ​ន​ការផ្លាស់ប្តូរ​របស់​ឥណ្ឌា​ចេញពី​ទីក្រុង​ម៉ូស្គូ និង​ជួយ​សម្រួល​ដល់​ការពង្រីក​ទំនាក់ទំនង​ការពារជាតិ​ជាមួយ​សហរដ្ឋអាមេរិក​៕