កាលពីថ្ងៃសៅរ៍ ទី ២ មេសា ប្រធានាធិបតីបារាំងលោក អេម៉ានុយអែល ម៉ាក្រុង ប្រាប់អ្នកគាំទ្ររបស់លោកថា កុំសន្និដ្ឋានថា លោកនឹងឈ្នះការបោះឆ្នោតខាងមុខនេះ ដោយហាក់ដូចលោកលើកឡើងថា ការភ្លេចខ្លួន អាចធ្វើឱ្យគូប្រជែងស្ដាំជ្រុលនិយមយកឈ្នះបាន។
ក្នុងកម្មវិធីយុទ្ធនាការបោះឆ្នោតលោកម៉ាក្រុង បានចង្អុលទៅជ័យជម្នះរបស់ខ្លួនលោកផ្ទាល់នៅឆ្នាំ ២០១៧ និងការបោះឆ្នោតប្រជាមតិ Brexit នៅ ២០១៦ ដើម្បីដំណើរការចាកចេញពីសហភាពអឺរ៉ុបរបស់អង់គ្លេស ជាឧទាហរណ៍នៃលទ្ធផលនយោបាយដែលមិនបានរំពឹងទុកមុន។
«គ្រោះថ្នាក់នៃក្រុមជ្រុលនិយមសព្វថ្ងៃនេះ គឺខ្លាំងជាងកាលពីប៉ុន្មានខែមុន ខ្លាំងជាងកាលពីប៉ុន្មានឆ្នាំមុន» លោកម៉ាក្រុងនិយាយបែបនេះ ហើយបន្តទៀតថា៖ «កុំជឿអ្នកអត្ថាធិប្បាយ ឬការស្ទង់មតិ ដែលថាវាមិនអាចទៅរួច មិននឹកស្មានដល់ ដែលនិយាយថា ''ការបោះឆ្នោតបានឈ្នះរួចទៅហើយ ហើយនឹងមិនមានរឿងអ្វីទេ''។ ក្រឡេកមើលពួកយើង មើលអ្នកកាលពី៥ឆ្នាំមុន។ គេនិយាយថាវាមិនអាចទៅរួចទេ។ ក្រឡេកមើល Brexit និងការបោះឆ្នោតជាច្រើនផ្សេងទៀត ដែលលទ្ធផលហាក់ដូចជាមិនទំនង ប៉ុន្តែពិតជាបានកើតឡើងមែន»។
ការស្ទង់មតិព្យាករថាលោកម៉ាក្រុងនឹងនាំមុខសំឡេងបេក្ខជនស្ដាំនិយមលោកស្រីម៉ារីន ឡឺប៉ែន ក្នុងការបោះឆ្នោតជុំទី១ ហើយលោកនឹងទទួលជ័យជម្នះក្នុងការបោះឆ្នោតជុំទី២ ប៉ុន្តែគម្លាតសំឡេងជ័យជម្នះនេះគឺតូចជាងជ័យជម្នះរបស់លោកកាលពី៥ឆ្នាំមុន។
កាលពីឆ្នាំ ២០១៧ លោកម៉ាក្រុងបានធ្វើយុទ្ធនាការបោះឆ្នោតជាបេក្ខជន ដែល «មិនមែនស្ដាំនិយម ឬឆ្វេងនិយម»។ លោក មិនធ្លាប់កាន់តំណែងត្រូវការបោះឆ្នោតទេ ហើយត្រូវបានគេចាត់ទុកថាជាអ្វីស្រស់ក្នុងភាពជាប់ទ្រឹងនៃនយោបាយបារាំង។ លោកបានយកឈ្នះលើចលនានយោបាយទាំង២ដែលបានកាន់អំណាចនៅប្រទេសបារាំងក្នុងរយៈពេលជាង ៦០ ឆ្នាំចុងក្រោយនេះ។ ប៉ុន្តែសម្រាប់ការបោះឆ្នោតឆ្នាំនេះ លោកបានបាត់បង់ការគាំទ្រមួយកម្រិត ដោយសារការមើលឃើញថា លោកបានប្រែខ្លួនបន្ទាប់ពីកាន់អំណាច៥ឆ្នាំចុងក្រោយនេះ៕