លោកស៊ី ជីនភីង (ឆ្វេង) លោកស្រីប្រធានគណៈកម្មការអឺរ៉ុប អឺស៊ូឡា វ៉ុន ដឺ លៃយេន។ AFP
ប្រធានាធិបតីចិនលោក ស៊ី ជីនភីង បានជំរុញសហភាពអឺរ៉ុបកុំឱ្យ «ចងពិភពលោកទាំងមូល» ទៅនឹងសង្គ្រាមអ៊ុយក្រែន ហើយព្រមានថា អាចត្រូវចំណាយពេលជាច្រើនទសវត្សរ៍ដើម្បីជួសជុលការខូចខាតសេដ្ឋកិច្ចពីសង្គ្រាមនេះ។
ក្នុងកិច្ចប្រជុំតាមវីដេអូជាមួយមេដឹកនាំសហភាពអឺរ៉ុបកាលពីថ្ងៃសុក្រ ទី១ មេសា លោកស៊ី បានប្រាប់ប្រធានគណៈកម្មការអឺរ៉ុបលោកស្រីអឺស៊ូឡា វ៉ុន ដឺ លៃយេន និងប្រធានក្រុមប្រឹក្សាអឺរ៉ុបហ្សាល មីសែល ថាវិបត្តិនេះត្រូវតែ «ដោះស្រាយឱ្យត្រឹមត្រូវ»។
បើតាមសេចក្ដីថ្លែងការណ៍របស់ក្រសួងការបរទេសចិន លោកស៊ី បានប្រាប់មេដឹកនាំអឺរ៉ុបទាំងនេះថា៖ «មនុស្សជាច្រើនមានការព្រួយបារម្ភយ៉ាងខ្លាំងថា ស្ថានភាពបច្ចុប្បន្ន អាចបំផ្លាញសមិទ្ធផលនៃកិច្ចសហប្រតិបត្តិការសេដ្ឋកិច្ចអន្តរជាតិជាច្រើនទសវត្សរ៍។ ប្រសិនបើស្ថានភាពកាន់តែបន្តយ៉ាប់យ៉ឺន វាត្រូវបានគេប៉ាន់ស្មានថា វាអាចចំណាយពេលរាប់ឆ្នាំ ឬរាប់ទសវត្សរ៍ ដើម្បីស្ដារឡើងវិញនៅពេលក្រោយ»។
លោកបានបន្ថែមទៀតថា៖ «មិនគួរធ្វើសេដ្ឋកិច្ចពិភពលោកឱ្យទៅជានយោបាយ ជាឧបករណ៍ និងជាអាវុធទេ ដែលបង្កវិបត្តិធ្ងន់ធ្ងរដល់វិស័យហិរញ្ញវត្ថុ ពាណិជ្ជកម្ម ថាមពល វិទ្យាសាស្ត្រ បច្ចេកវិទ្យា អាហារ ខ្សែចង្វាក់ឧស្សាហកម្ម និងខ្សែចង្វាក់ផ្គត់ផ្គង់របស់ពិភពលោក»។
រីឯភាគីអឺរ៉ុប បាននិយាយថាខ្លួនព្យាយាមជំរុញកុំឱ្យក្រុមប៉េកាំង «ជ្រៀតជ្រែក» លើការដាក់ទណ្ឌកម្មលើប្រទេសរុស្ស៊ី ហើយខណៈពេលដែលភាគីទាំង២ បានយល់ព្រមលើការធ្វើការដើម្បីបញ្ចប់ជម្លោះ ពួកគេបានសម្ដែង «ទស្សនៈផ្ទុយ» លើស្ថានភាពនេះ។
លោកស្រីវ៉ុន ដឺ លៃយេននិយាយថា៖ «យើងបានផ្លាស់ប្តូរទស្សនៈផ្ទុយគ្នាយ៉ាងច្បាស់។ នេះមិនមែនជាជម្លោះទេ។ នេះគឺជាសង្គ្រាម។ នេះមិនមែនជារឿងរបស់អឺរ៉ុបទេ។ នេះគឺជាកិច្ចការពិភពលោកទាំងមូល»៕
