យោងតាមទិន្នន័យពីមជ្ឈមណ្ឌលគ្រប់គ្រងនិងបង្ការជំងឺរបស់អាមេរិកមេរោគបំប្លែង BA.2 នៃពីវ៉ារ្យង់អូមីក្រុងបានឆ្លងកាន់តែច្រើនដោយរហូតដល់ទៅ ៧២ភាគរយនៃការឆ្លងជំងឺកូវីដសរុបនៅសហរដ្ឋអាមេរិកបច្ចុប្បន្នគឺបង្កដោយមេរោគបំប្លែងនេះ។
មេរោគបំប្លែង BA.2 បានក្លាយជាអម្បូរមេរោគចម្បងនៃជំងឺកូវីដ១៩នៅក្នុងសហរដ្ឋអាមេរិកកាលពីសប្តាហ៍មុនហើយឥឡូវនេះ អាចនឹងឆ្លងលើសមេរោគបំប្លែងBA.1ទៅទៀត។លោក Ali Mokdadអ្នកជំនាញជំងឺរាតត្បាតនៅវិទ្យាស្ថានតាមដាននិងការវាយតម្លៃសុខភាពក្នុងរដ្ឋ Washington បានព្យាករថា BA.2 នឹងបង្ករលកឆ្លងដ៏ធំក្នុងរយៈពេល២សប្តាហ៍ខាងមុខ។
បើទោះបីជាការប៉ាន់ស្មានមួយចំនួនខុសគ្នាក៏ដោយក៏មេរោគបំប្លែង BA.2 ត្រូវបានគេជឿជាក់ថាមានសមត្ថភាពចម្លងពី៣០ភាគរយ ទៅ៨០ភាគរយលឿនជាងមេរោគបំប្លែង BA.1.។
មន្ត្រីអង្គការសុខភាពពិភពលោកជាន់ខ្ពស់ម្នាក់ឈ្មោះ Maria Van Kerkhoveបានពណ៌នាមេរោគបំប្លែងBA.2 ថាជាមេរោគឆ្លងច្រើនបំផុតរហូតមកដល់ពេលនេះ។ការផ្ទុះឡើងជាថ្មីបានកើតឡើងនៅក្នុងប្រទេសអឺរ៉ុបធំៗរួមទាំងចក្រភពអង់គ្លេសនិងអាល្លឺម៉ង់ផងដែរ។
នៅសហរដ្ឋអាមេរិកលោកវេជ្ជបណ្ឌិត Anthony Fauciទីប្រឹក្សាសុខាភិបាលជាន់ខ្ពស់បាននិយាយថា ការឆ្លងអាចកើនឡើងប៉ុន្តែគាត់មិនរំពឹងថានឹងមានការកើនឡើងដ៏ធំផ្សេងទៀតនោះទេ។លោក ជឿថាការឆ្លងនៅក្នុងសហរដ្ឋអាមេរិកទំនងជានឹងធ្លាក់ចុះក្នុងរយៈពេល១ឬ ២សប្ដាហ៍ហើយបន្ទាប់មកធ្លាក់ចុះរហូតដល់រដូវរងា៕