រូបភាពសាកសពជនស៊ីវិលដែលបានស្លាប់ដេកនៅលើដងផ្លូវនៃទីក្រុង Bucha នៃ ប្រទេសអ៊ុយក្រែន ដោយខ្លះត្រូវចងដៃ ខ្លះមានរបួសដោយគ្រាប់កាំភ្លើងចំក្បាល ត្រូវបានបង្ហោះ និងលេចចេញតាមTelegram កាលពីចុងសប្តាហ៍មុន។
នៅក្នុងដំណើរទស្សនកិច្ចទៅកាន់ទីក្រុង Bucha ប្រធានាធិបតីអ៊ុយក្រែន លោក Volodymyr Zelenskiy បាននិយាយថា៖ «ទាំងនេះ គឺជាឧក្រិដ្ឋកម្មសង្គ្រាមហើយនឹង ត្រូវបានទទួលស្គាល់ដោយពិភពលោកថា ជាអំពើប្រល័យពូជសាសន៍»។
សហរដ្ឋអាមេរិក និងបណ្តាប្រទេសនៅអឺរ៉ុប បានសន្យាកាលពីថ្ងៃចន្ទថា នឹងដាក់ទណ្ឌកម្មទីក្រុងម៉ូស្គូ ជុំវិញការសម្លាប់ជនស៊ីវិលនៅភាគខាងជើងប្រទេសអ៊ុយក្រែន ជាកន្លែងដែលគេជីកផ្នូរដ៏ធំ និងចងសាកសពមនុស្សដែលត្រូវបានបាញ់ក្នុងចម្ងាយជិតនៅទីក្រុង Bucha ដែលជាតំបន់កងកម្លាំងរុស្ស៊ីវាយលុក។
ការរកឃើញនេះ ក៏បានពង្រីកការអំពាវនាវរបស់លោកខាងលិចឱ្យមានការហ៊ុមព័ទ្ធលើថាមពល និងធ្យូងថ្មរបស់រុស្ស៊ីក៏ដូចជាការផ្គត់ផ្គង់អាវុធវាយលុកបន្ថែមទៀតដល់អ៊ុយក្រែនផងដែរ។
រុស្ស៊ីបានបដិសេធរាល់ការចោទប្រកាន់ពាក់ព័ន្ធនឹងការសម្លាប់ជនស៊ីវិលរួមទាំងរឿងក្រុង Bucha ផងដែរ។ លោកDmitry Peskov អ្នកនាំពាក្យរបស់លោក ពូទីន កាលពីថ្ងៃចន្ទ បានបញ្ចេញការសង្ស័យយ៉ាងខ្លាំងលើរបាយការណ៍នៃជនស៊ីវិលរាប់រយនាក់ ដែលត្រូវបានសម្លាប់នៅក្នុងទីក្រុង Bucha។
លោកបាននិយាយថា៖ «តាមអ្វីដែលយើងបានឃើញវីដេអូភាគច្រើនមិនអាចជឿទុកចិត្តបានទេពីព្រោះអ្នកឯកទេសមកពីក្រសួងការពារជាតិ បានរកឃើញសញ្ញានៃការរៀបចំវីដេអូ និងការក្លែងបន្លំ»។
បេសកជនរបស់ខ្លួនប្រចាំអង្គការសហប្រជាជាតិលោក Vasily Nebenzya បាននិយាយថា ប្រទេសរុស្ស៊ី នឹងបង្ហាញភ័ស្តុតាងជាក់ស្តែងទៅកាន់ក្រុមប្រឹក្សាសន្តិសុខនៅថ្ងៃអង្គារ ដែលបង្ហាញថា កងកម្លាំងរបស់ខ្លួនមិនពាក់ព័ន្ធនឹងអំពើឃោរឃៅនោះទេ។
កាលពីល្ងាចថ្ងៃអាទិត្យ លោក Vladimir Soloviev ដែលជាពិធីករទូរទស្សន៍កំពូលរបស់រុស្ស៊ី បានប្រាប់អ្នកស្តាប់រាប់លាននាក់ថា៖ «សង្គ្រាមប្រឆាំងនឹងពួកយើងបានឈានចូលដំណាក់កាលថ្មីមួយហើយ។ ពួកគេកំពុងដឹកនាំយើងតាមសេណារីយោយូហ្គោស្លាវី។ នៅពេលឆាប់ៗនេះ គេនឹងចោទប្រកាន់យើងពីបទប្រល័យពូជសាសន៍»។ លោកក៏បានចោទប្រកាន់ជនជាតិអង់គ្លេសថាជាអ្នកនៅពីក្រោយការបង្កហេតុនេះផងដែរ។
អគ្គរដ្ឋអាជ្ញារុស្ស៊ីក៏បានបន្ថែមថា៖ «ការភូតកុហកដែលរីករាលដាលដោយភាគីអ៊ុយក្រែន គឺជាការញុះញង់មួយផ្សេងទៀតដែលជាការភូតកុហកដ៏ឃោរឃៅ និងមានគោលបំណងធ្វើឱ្យខូចកិត្តិយសដល់កងទ័ពរុស្ស៊ីនៅក្នុងលក្ខខណ្ឌនៃសង្គ្រាមព័ត៌មាន និងការឃោសនាដែលបញ្ចេញដោយលោកខាងលិច»។
លោកបានបន្ថែមថា៖ «រាល់ការបង្កើតនិងការផ្សព្វផ្សាយជាសាធារណៈនូវព័ត៌មានមិនពិតដោយចេតនា ក្រោមការបង្ហាញពីរបាយការណ៍ ដែលអាចទុកចិត្តបាននឹងត្រូវបានបង្កើតឡើងដោយក្រុមដដែលនេះ»។
ទោះយ៉ាងណាក្ដី កាលពីថ្ងៃចន្ទ រដ្ឋាភិបាលបាននិយាយថា ខ្លួននឹងចាប់ផ្តើមការស៊ើបអង្កេតលើព្រឹត្តិការណ៍នៅទីក្រុង Bucha មិនត្រឹមករណីចោទប្រកាន់ឧក្រិដ្ឋកម្មសង្គ្រាមលើមនុស្សជាង ២៨០ នាក់នោះទេ ប៉ុន្តែខ្លួនក៏នឹងស៊ើបអង្កេតលើករណីការចែកចាយព័ត៌មានក្លែងក្លាយ ដើម្បីបង្ខូចកិត្តិយសកងទ័ពរុស្ស៊ីផងដែរ។
ដំណើរការធ្វើកោសល្យវិច័យនេះ នឹងចាំបាច់ដើម្បីទប់ទល់នឹងការទទូចរបស់វិមានក្រឹមឡាំងដែលថា កងកម្លាំងរបស់ខ្លួនមិនទទួលខុសត្រូវចំពោះការស្លាប់របស់ជនស៊ីវិលហើយអំពើឃោរឃៅនេះត្រូវបានរៀបចំឡើង ឬប្រព្រឹត្តឡើងដោយកងកម្លាំងអ៊ុយក្រែន។
នៅក្នុងដំណើរទៅកាន់ទីតាំងដដែលនេះ លោក Zelensky បានបន្ថែមថា ការស៊ើបអង្កេតនឹងត្រូវធ្វើឡើងដោយការិយាល័យអគ្គរដ្ឋអាជ្ញាអ៊ុយក្រែន។ លោកបានមានប្រសាសន៍ថា៖ «ខ្ញុំគិតថា យើងមានកម្លាំងគ្រប់គ្រាន់នៅទីនេះ ប៉ុន្តែយើងត្រូវការអ្នកជំនាញខ្លះ»។
លោកស្រី Iryna Venedyktova អគ្គរដ្ឋអាជ្ញានៃប្រទេសអ៊ុយក្រែន បាននិយាយថា សាកសពជនស៊ីវិលចំនួន ៤១០ នាក់ ត្រូវបានរកឃើញពីតំបន់ជុំវិញទីក្រុងកៀវ កាលពីចុងសប្តាហ៍មុន ហើយ ១៤០ នាក់ ក្នុងចំណោមសាកសពទាំងនោះ ត្រូវបានពិនិត្យរួចហើយដោយរដ្ឋអាជ្ញាតាមរយៈការយកគំរូ DNA ពីអ្នកឯកទេស។
លោកស្រីបាននិយាយថា៖ «នៅលើទឹកដីដែលត្រូវបានជម្រះនៃតំបន់កៀវ គេឃើញមានភ័ស្តុតាងសំខាន់ៗនៃឧក្រិដ្ឋកម្មសង្គ្រាមដ៏ឃោរឃៅរបស់រុស្ស៊ី»។
អាជ្ញាធរអ៊ុយក្រែនបាននិយាយថា បុគ្គលិក និងរដ្ឋអាជ្ញាជាតិជាង ៥០ នាក់ ឥឡូវនេះបានចូលរួមក្នុងការស៊ើបអង្កេតនៅក្នុងតំបន់នៃទីក្រុងកៀវ និង Chernihiv ដែលដណ្តើមបានមកវិញពីកងកម្លាំងរុស្ស៊ី។ ការិយាល័យអគ្គរដ្ឋអាជ្ញាបាននិយាយថា ខ្លួននឹងបង្កើនចំនួនប្រតិបត្តិការស៊ើបអង្កេត ដើម្បីធានាបាននូវការប្រមូលភ័ស្តុតាងនៃឧក្រិដ្ឋកម្មសង្គ្រាមបានលឿន និងមានប្រសិទ្ធភាពខ្ពស់បំផុត៕