រដ្ឋាភិបាលប្រទេសហ្វាំងឡង់ បានត្រៀមខ្លួនដើម្បីដាក់ពាក្យជាផ្លូវការដើម្បីស្នើសុំសមាជិកភាពអង្គការណាតូ «មុនពាក់កណ្ដាលរដូវក្ដៅ» ដោយអាចឆាប់បំផុតនៅខែឧសភានេះ។
នាយករដ្ឋមន្ត្រីហ្វាំងឡង់លោកស្រី សាណា ម៉ារីន បាននិយាយសភាប្រទេសលោកស្រីនឹងបោះឆ្នោត «មុនពាក់កណ្ដាលរដូវក្ដៅ» ជុំវិញការបញ្ជូនពាក្យទៅកាន់អង្គការណាតូ។ អតីតនាយករដ្ឋមន្ត្រីលោកអាឡិចសាន់ឌឺ ស្តាប និយាយថា ការបោះឆ្នោតនេះអាចកើតឡើងឆាប់ជាងនេះទៅទៀត នៅខែឧសភា។
«យើងនឹងមានការពិភាក្សាយ៉ាងប្រុងប្រយ័ត្ន ប៉ុន្តែមិនចំណាយពេលច្រើនជាងការដែលយើងត្រូវធ្វើ» លោកស្រីម៉ារីន បាននិយាយបែបនេះនៅសន្និសីទសារព័ត៌មានមួយកាលពីថ្ងៃសុក្រ ដោយបន្ថែមទៀតថា៖ «ខ្ញុំគិតថា យើងនឹងបញ្ចប់ការពិភាក្សាមុនពាក់កណ្ដាលរដូវក្ដៅ»។
លោក ស្ដាប បានមានភាពជាក់ស្ដែងជាងនេះទៅទៀតក្នុងការព្យាកររបស់លោក ដោយបានប្រាប់សារព័ត៌មាន AFP កាលពីថ្ងៃសៅរ៍ថា រដ្ឋាភិបាលទំនងជានឹងធ្វើការបោះឆ្នោតលើបញ្ហានេះមុនដំណាច់ខែឧសភា ដើម្បីទាន់ពេលសម្រាប់កិច្ចប្រជុំកំពូលរបស់អង្គការណាតូនៅខែមិថុនា។
អគ្គលេខាធិការអង្គការលោកជេន ស្ទូលថេនប៊ីក បាននិយាយថាណាតូនឹងទទួលយកហ្វាំងឡង់ប្រសិនបើពួកគេដាក់ពាក្យ។ មន្ត្រីរុស្ស៊ីមួយចំនួន បានព្រមានហ្វាំងឡង់រួចទៅហើយចំពោះការចូលជាសមាជិកអង្គការណាតូ។
ជាទូទៅប្រជាជនហ្វាំងឡង់ប្រឆាំងនឹងការចូលជាសមាជិកនៃអង្គការណាតូ ប៉ុន្តែបន្ទាប់ពីរុស្ស៊ីលុកលុយចូលក្នុងអ៊ុយក្រែន មតិសាធារណជនហ្វាំងឡង់ បានផ្លាស់ប្ដូរយ៉ាងខ្លាំង។ ប្រទេសហ្វាំងឡង់មានព្រំដែនជាង ១ ៣០០ គីឡូម៉ែត្រជាមួយរុស្ស៊ី ហើយការស្ទង់មតិបង្ហាញថាគាំទ្រចូលជាសមាជិកណាតូបានកើនពី ២៦ ភាគរយរហូតដល់ ៦០ ភាគរយ បន្ទាប់ពីការលុកលុយចាប់ផ្ដើម៕