ប្រធានាធិបតីអាមេរិកលោក ចូ បៃដិន នឹងរៀបចំជំនួបតាមវីដេអូជាមួយនាយករដ្ឋមន្ត្រីឥណ្ឌាលោក ណារិនដ្រា មូឌី កាលពីថ្ងៃចន្ទ ខណៈពេលដែលសហរដ្ឋអាមេរិកបង្ហាញជំហរយ៉ាងច្បាស់ថា ខ្លួនមិនចង់ឃើញការកើនឡើងនៃការនាំចូលថាមពលរុស្ស៊ីដោយឥណ្ឌាទេ។
អ្នកនាំពាក្យសេតវិមានលោកស្រី ជេន សាគី បាននិយាយក្នុងសេចក្ដីថ្លែងការណ៍មួយថា៖ «លោកប្រធានាធិបតី បៃដិន នឹងបន្តការពិគ្រោះយោបល់យ៉ាងជិតស្និទ្ធទៅលើផលវិបាកនៃសង្គ្រាមដ៏ឃោរឃៅរបស់ប្រឆាំងនឹងអ៊ុយក្រែន និងការកាត់បន្ថយផលប៉ះពាល់អស្ថិរភាពលើការផ្គត់ផ្គង់ស្បៀងអាហារ និងទីផ្សារទំនិញពិភពលោក»។
អនុទីប្រឹក្សាសន្តិសុខជាតិអាមេរិកទទួលបន្ទុកកិច្ចការសេដ្ឋកិច្ចអន្តរជាតិលោកដាលីប ស៊ីង ដែលថ្មីៗនេះបានធ្វើទស្សនកិច្ចទៅប្រទេសឥណ្ឌា បាននិយាយថា អាមេរិកនឹងមិនកំណត់ «ខ្សែបន្ទាត់ក្រហម»សម្រាប់ឥណ្ឌាក្នុងការនាំចូលថាមពលពីប្រទេសរុស្ស៊ីទេ ប៉ុន្តែមិនចង់ឃើញ «ការកើនឡើងសម្ទុះយ៉ាងរហ័ស» នៃការនាំចូល។
ទាក់ទាញដោយការបញ្ចុះតម្លៃយ៉ាងខ្លាំង បន្ទាប់ពីលោកខាងលិចដាក់ទណ្ឌកម្មលើក្រុមហ៊ុនរុស្ស៊ី ប្រទេសឥណ្ឌាបាននាំចូលប្រេងឆៅយ៉ាងហោចណាស់ ១៣ លានបារ៉ែលពីរុស្ស៊ី ចាប់តាំងពីប្រទេសនេះ លុកលុយចូលប្រទេសអ៊ុយក្រែនកាលពីចុងខែកុម្ភៈ។ នេះបើធៀបទៅនឹងការនាំចូល ១៦ លានបារ៉ែលក្នុងរយៈពេល ១ ឆ្នាំ ២០២១។
ប្រទេសអាស៊ីខាងត្បូងនេះបានព្យាយាមរក្សាតុល្យភាពរវាងទំនាក់ទំនងរបស់ខ្លួនជាមួយនឹង រុស្ស៊ី និងលោកខាងលិច។ ឥណ្ឌា ជាមួយសហរដ្ឋអាមេរិក ជប៉ុន និងអូស្ត្រាលី គឺជាសមាជិកនៃវេទិកាសហប្រតិបត្តិការសន្តិសុខប្រឆាំងចិន Quad ប៉ុន្តែផ្ទុយពីសមាជិក Quad ដទៃ ឥណ្ឌាមិនបានដាក់ទណ្ឌកម្មលើរុស្ស៊ីទេ។
រុស្ស៊ីគឺជាអ្នកផ្គត់ផ្គង់ឧបករណ៍យោធាដ៏ធំបំផុតរបស់ឥណ្ឌាតាំងពីយូរយារណាស់មកហើយ បើទោះបីជាមានការកើនឡើងនៃការទិញពីសហរដ្ឋអាមេរិកក្នុងទសវត្សរ៍កន្លងមកក៏ដោយ។ អ្នកវិភាគមួយចំនួននិយាយថា ការផ្គត់ផ្គង់របស់រុស្ស៊ីគឺមានតម្លៃថោកជាង និងមានសារៈសំខាន់សម្រាប់ឥណ្ឌាក្នុងការប្រឈមមុខនឹងយោធាដ៏ខ្ពង់ខ្ពស់របស់ចិន៕
វីដេអូ៖