.jpg)
លោក អុីមរា៉ន ខាន់ (កណ្តាល) ថ្លែងទៅកាន់សមាជិកសភា នៅក្នុងទីក្រុងអុីស្លាម៉ាបាដ នាពេលកន្លងទៅ។ រូបថត AFP
កាលពីថ្ងៃចន្ទ ទី ១១ មេសា សមាជិករដ្ឋសភាប៉ាគីស្ថានជាង ១០០ នាក់ ដែលស្មោះនឹងអតីតនាយករដ្ឋមន្ត្រី អ៊ីមរ៉ាន ខាន់ បានប្រកាសលាលែងពីតំណែង បន្ទាប់ពីវិបត្តិរដ្ឋធម្មនុញ្ញជាង ១សប្ដាហ៍ ដែលឈានដល់ចំណុចកំពូលកាលពីថ្ងៃអាទិត្យនៅពេលលោក ខាន់ ត្រូវបានសភានេះបោះឆ្នោតទម្លាក់ពីតំណែង។
មេដឹកនាំសម្ព័ន្ធភាពបក្សប្រឆាំងលោក សេហ៍បាស សារីហ្វ ត្រូវបានសភានេះបោះឆ្នោតតែងតាំងស្នងតំណែងនាយករដ្ឋមន្ត្រីពីលោក ខាន់ ដែលបង្កឱ្យមានការលាលែងនេះ និងការធ្វើបាតុកម្មនៅតាមដងផ្លូវប្រទេសនេះ។
ប្រសិនបើការលាលែងត្រូវបានទទួលដោយប្រធានរដ្ឋសភានោះ ប្រទេសប៉ាគីស្ថាន ប្រឈមមុខការបោះឆ្នោតដើម្បីបំពេញអាសនៈចំហទាំងនេះក្នុងរយៈពេល ២ ខែ ដែលអាចក្លាយជាឧបសគ្គដ៏ធំសម្រាប់លោក សារីហ្វ ហើយអាចជាវេទិកាដ៏មានឥទ្ធិពលសម្រាប់លោក ខាន់ ប្រមូលផ្ដុំការគាំទ្ររបស់លោក។
នេះអាចធានាថា ប្រទេសប្រដាប់អាវុធនុយក្លេអ៊ែរ ដែលមានប្រជាជន ២២០ លាននាក់នេះ គឺមិនងាយរួចផុតពីវិបត្តិនយោបាយ និងសេដ្ឋកិច្ចនោះទេ។
យ៉ាងណាមិញ លោក សេហ៍បាស សារីហ្វ គឺជាប្អូនប្រុសរបស់អតីតនាយករដ្ឋមន្ត្រីលោក ណាវ៉ាស សារីហ្វ ដែលបានកាន់អំណាចចំនួន៣អាណត្តិ។ អ្នកវិភាគនិយាយថា ផ្ទុយពីលោក ណាវ៉ាស លោកសេហ៍បាស មានទំនាក់ទំនងជិតស្និទ្ធជាមួយកងយោធាប៉ាគីស្ថាន ដែលមានឥទ្ធិពលយ៉ាងខ្លាំងលើគោលនយោបាយការបរទេស និងការពារជាតិរបស់ប្រទេសនេះ៕
