ប្រធានាធិបតីអាល្លឺម៉ង់ លោក ហ្វ្រែង-វ៉លទ័រ ស្ទេនម៉ាយអឺ បានបោះបង់ផែនការធ្វើដំណើរទស្សនកិច្ចទៅកាន់ក្រុងកៀវ បន្ទាប់ពីលោកទទួលស្គាល់ថាលោកនឹងមិនត្រូវគេស្វាគមន៍នៅរដ្ឋធានីរបស់អ៊ុយក្រែនទេ ក្នុងអ្វីដែលគេមើលឃើញថាជាការប្រមាថដល់អ្នកនយោបាយជាន់ខ្ពស់មួយរូបនៃប្រទេសអាល្លឺម៉ង់។
លោកស្ទេនម៉ាយអឺ ដែលថ្មីៗនេះធ្វើទស្សនកិច្ចនៅក្រុងវ៉ាសូវីប្រទេសប៉ូឡូញ បាននិយាយថាប្រធានាធិបតីប៉ូឡូញលោកអនទ្រេ ឌូដា បានអញ្ជើញលោកឱ្យរួមដំណើរជាមួយប្រធានាធិបតីលីទុយអានី ឡាតវី និងអេស្តូនី ដើម្បីធ្វើទស្សនកិច្ចទៅក្រុងកៀវ។
លោកនិយាយថា៖ «ខ្ញុំបានត្រៀមខ្លួនហើយ ប៉ុន្តែជាក់ស្ដែង ខ្ញុំទទួលស្គាល់ថា វាមិនត្រូវបានគេចង់ទទួលបាននៅកៀវទេ»។
ក្នុងរយៈពេលប៉ុន្មានថ្ងៃចុងក្រោយនេះលោកស្ទេនម៉ាយអឺបានរងការរិះគន់យ៉ាងខ្លាំងចំពោះទំនាក់ទំនងជិតស្និទ្ធរបស់លោកជាមួយរុស្ស៊ី ដែលលោកធ្លាប់និយាយថា «ដៃគូដែលមិនអាចខ្វះបាន»។ កាលពីពេលលោកកាន់តំណែងជារដ្ឋមន្ត្រីការបរទេសអាល្លឺម៉ង់ លោកមានទំនាក់ទំនងជិតស្និទ្ធជាមួយរដ្ឋមន្ត្រីការបរទេសរុស្ស៊ីលោកសឺហ្គេ ឡាវរ៉ូវ ហើយជាអ្នកគាំទ្រយ៉ាងខ្លាំងសម្រាប់គម្រោងបំពង់ឧស្ម័ន Nord Stream 2 ពីរុស្ស៊ី មកកាន់អាល្លឺម៉ង់។
ការលើកឡើងរបស់លោកស្ទេនម៉ាយអឺ បានកើតឡើងបន្ទាប់ពីកាសែតអាល្លឺម៉ង់ Bild Zeitung បានរាយការណ៍ថាប្រធានាធិបតីអ៊ុយក្រែនលោកវ៉ុលឌីមៀរ ហ្សេលេនស្គី នឹងបដិសេធមិនជួបជាមួយលោកស្ទេនម៉ាយអឺទេ ប្រសិនបើលោកធ្វើដំណើរមកក្រុងកៀវ៕
វីដេអូ៖