កាលពីថ្ងៃអង្គារ ទី ១២ មេសា ប្រធានាធិបតីរុស្ស៊ីលោក វ្ល៉ាឌីមៀរ ពូទីន និយាយថា កិច្ចចរចាសន្តិភាពជាមួយអ៊ុយក្រែនគឺស្ថិតនៅលើផ្លូវទាល់ ហើយប្រើប្រាស់ការអត្ថាធិប្បាយជាលើកដំបូងក្នុងរយៈពេលជាច្រើនសប្ដាហ៍ដើម្បីធ្វើការប្ដេជ្ញាថាកងទ័ពរុស្ស៊ីទទួលជ័យជម្នះ និងញុះញង់លោកខាងលិចថាបានបរាជ័យក្នុងការបង្ខំឱ្យក្រុងម៉ូស្គូចុះចាញ់។
ក្នុងការថ្លែងសុន្ទរកថាសាធារណៈដំបូង ចាប់តាំងពីការប្រកាសដកទ័ពរុស្ស៊ីចេញពីតំបន់ជុំវិញរដ្ឋធានីកៀវរបស់ប្រទេសអ៊ុយក្រែនដោយសារការជាប់គាំងមិនទៅមុខ លោកពូទីនសន្យាថារុស្ស៊ីនឹងសម្រេចបាននូវគោលដៅ «ដ៏ថ្លៃថ្នូរ» របស់ខ្លួនទាំងអស់នៅអ៊ុយក្រែន។
នៅក្នុងសញ្ញាដ៏ខ្លាំងបំផុតថាសង្គ្រាមនេះនឹងបន្តអូសបន្លាយកាន់តែយូរ លោកពូទីនចោទប្រកាន់ក្រុងកៀវថាបានបង្កការខូចខាតដល់ការចរចាសន្តិភាព ដោយលោកអះអាងថាអ៊ុយក្រែនបានក្លែងបន្លំការចោទប្រកាន់ថារុស្ស៊ីបានប្រព្រឹត្តឧក្រិដ្ឋកម្មសង្គ្រាម ហើយដោយទាមទារការធានាសន្តិសុខនៅលើទឹកដីអ៊ុយក្រែនទាំងមូល។
បន្ទាប់ពីរុស្ស៊ីដកទ័ពពីតំបន់ជុំវិញរដ្ឋធានីកៀវ មានការរកឃើញសាកសពជនស៊ីវិលជាច្រើន ដែលហាក់ជាករណីប្រហារជីវិត ធ្វើឱ្យអ៊ុយក្រែន និងលោកខាងលិចចោទប្រកាន់រុស្ស៊ីថាបានប្រព្រឹត្តឧក្រិដ្ឋកម្មសង្គ្រាម។
ក្នុងអំឡុងពេលទស្សនកិច្ចទៅកាន់អវកាសយានដ្ឋាន Vostochnyលោកបាននិយាយថា៖ «យើងបានត្រឡប់ទៅស្ថានភាពទាល់ច្រកសម្រាប់យើងទៀតហើយ»។ លោកនិយាយថារុស្ស៊ីនឹងបន្តប្រតិបត្តិការរបស់ខ្លួន ប៉ុន្តែការសន្និដ្ឋានជាយុទ្ធសាស្ត្រដ៏សំខាន់បំផុតគឺការបំបែកសណ្ដាប់ធ្នាប់អន្តរជាតិឯកប៉ូលរបស់អាមេរិក ដែលបង្កើតក្រោយសង្គ្រាមត្រជាក់។
យ៉ាងណាមិញ លោកពូទីនបានចៀសវាងបង្ហាញមុខជាសាធារណៈ បន្ទាប់ពីរុស្ស៊ីដកទ័ពចេញពីតំបន់ជិតរដ្ឋធានីកៀវ។ កាលពីថ្ងៃចន្ទ លោកបានជួបជាមួយអធិការបតីអូទ្រីស ដែលកំពុងបំពេញដំណើរទស្សនកិច្ចនៅរុស្ស៊ី ប៉ុន្តែមិនមានការចេញផ្សាយធំដុំអ្វីមួយអំពីជំនួបនេះទេ៕
វីដេអូ៖