.jpg)
លោកស្រីប្រមុខប្រតិបត្តិក្រុងហុងកុង ការី ឡាម ធ្វើសន្និសីទកាសែត កាលពីថ្ងៃទី ៤ មេសា។ AFP
សិល្បៈក្បាច់គុននៅហុងកុងបានបង្កើតឱ្យមានរឿងព្រេងនិទាន និងខ្សែភាពយន្តខ្នាតធំជាច្រើន។ ប៉ុន្តែកាលពីខែមុនមានភាពច្របូកច្របល់កើតឡើង នៅពេលដែលគ្រូបង្វឹក ១ រូប និងអ្នកជំនួយការ ១ រូប ត្រូវបានប៉ូលិសហុងកុងចាប់ខ្លួនក្រោមការចោទប្រកាន់ថា បានរៀបចំផែនការ «បង្កើតកងទ័ព» ប្រឆាំងនឹងរដ្ឋ។
ប៉ូលិសហុងកុងនិយាយថា ពួកគេបានរឹបអូសអាវុធមួយចំនួនដែលរួមមានដាវ កាំបិត ព្រួញ និងកាំភ្លើងខ្យល់។ ពួកគេក៏និយាយថា ពួកគេរកឃើញសារប្រឆាំងបក្សកុម្មុយនីស្តចិននៅលើទំព័រ Facebook របស់មជ្ឈមណ្ឌលបណ្ដុះបណ្ដាលនេះផងដែរ។
ដោយមិនគិតអំពីមូលដ្ឋាននៃសំណុំរឿងនេះ វាបង្ហាញយ៉ាងច្បាស់ពីការភ័យខ្លាចដែលនៅក្រោមសម្បកនៃភាពស្ងប់ស្ងាត់នៅក្រុងហុងកុង។
ខ្យល់អាកាសមិនពោរពេញទៅដោយឧស្ម័នបង្ហូរទឹកភ្នែកទៀតទេ ហើយដងផ្លូវមិនពោរពេញទៅដោយបាតុករ ដូចកាលពីឆ្នាំ ២០១៩ ទេ។ ប៉ុន្តែរដ្ឋាភិបាលថ្នាក់មូលដ្ឋាន និងថ្នាក់កណ្ដាលហាក់ដូចជានៅមានភាពភ័យខ្លាចថា ផ្នែកដ៏ធំនៃប្រជាជនហុងកុង គឺនៅតែប្រឆាំងពួកគេ។ រីឯប្រជាជនវិញ ភ័យខ្លាចថាច្បាប់សន្តិសុខជាតិអនុម័តដោយក្រុងប៉េកាំង ហើយភ័យខ្លាចជាប់ពន្ធនាគារដោយសារការនិយាយខុសធ្លោយ។
នៅក្នុងបរិយាកាសភ័យខ្លាចបែបនេះ ក្រុងហុងកុងនឹងធ្វើការបោះឆ្នោតជ្រើសរើសមេដឹកនាំថ្មីនៅថ្ងៃទី ៨ ឧសភា បន្ទាប់ពីអ្នកកាន់តំណែងបច្ចុប្បន្នលោកស្រីការី ឡាម ប្រកាសថា លោកស្រីនឹងមិនឈរឈ្មោះបោះឆ្នោតទៀតទេ។
តំណែងប្រមុខប្រតិបត្តិហុងកុង គឺមិនត្រូវបានជ្រើសរើសដោយសាធារណជនទេ ប៉ុន្តែដោយសមាជិកជិត ១ ៥០០ នៃគណៈកម្មាធិការបោះឆ្នោត ដែលស្ថិតក្រោមឥទ្ធិពលរបស់ក្រុងប៉េកាំង។
រហូតមកដល់ពេលនេះអ្នកវិភាគនិយាយថា មានបេក្ខជនតែម្នាក់គត់ដែលគណៈកម្មាធិការនេះទំនងនឹងបោះឆ្នោតឱ្យកាន់តំណែងនេះ គឺលោក ចន លី ដែលជាអតីតមន្ត្រីប៉ូលិសជើងចាស់១ រូប និងបច្ចុប្បន្នជាអគ្គលេខាធិការហុងកុងដែលជាតំណែងធំជាងគេទី២ បន្ទាប់ពីលោកស្រី ឡាម។
អាជីពរបស់លោកបានផ្ដោតលើការងារប៉ូលិស និងសន្តិសុខ។ លោកមានបទពិសោធតិចតួចលើវិស័យហិរញ្ញវត្ថុ និងអាជីវកម្មដែលជាមូលដ្ឋានគ្រឹះនៃសេដ្ឋកិច្ចទីក្រុង ហើយក៏មិនសូវមានបទពិសោធក្នុងវិស័យសង្គមកិច្ច ដូចជាបញ្ហាលំនៅឋានជាដើម។
លោក លី បានប្រាប់អ្នកយកសារព័ត៌មានថា «គ្មានមនុស្សដែលដឹងគ្រប់ទាំងអស់នោះទេ» ហើយលោកបានប្ដេជ្ញាថា នឹងបង្កើតក្រុមការងារដោយមានសមាសធាតុមន្ត្រីមានបទពិសោធ និងចំណោះដឹង «ដែលមានចំណង់ចំណូលចិត្តធ្វើអ្វីៗសម្រាប់ហុងកុង។ ក្រុមការងារយុទ្ធនាការបោះឆ្នោតរបស់លោកភាគច្រើន គឺនយោបាយល្បីៗ ដែលគាំទ្រក្រុងប៉េកាំង និងសហនាយកប្រតិបត្តិនៃធនាគារអាស៊ីបូព៌ាលោក ប្រាយអែន លី។
ប្រសិនបើលោក លី នៅទីបំផុតជាប់ឆ្នោតនោះបង្ហាញយ៉ាងច្បាស់អំពីអនាគតនៃទីក្រុងមានប្រជាជន ៧,៤ លាននាក់នេះ។ អ្នកវិភាគមួយចំនួននិយាយថា វានឹងមានន័យថា រដ្ឋាភិបាលកណ្ដាលក្រុងប៉េកាំង នៅតែព្រួយបារម្ភអំពីសន្តិសុខ និងបរិយាកាសនយោបាយនៅក្រុងហុងកុង ដោយហាក់ដូចជានៅព្រួយបារម្ភថា ក្រុងនេះអាចប្រើប្រាស់ដោយលោកខាងលិច ដើម្បីប្រឆាំងនឹងចិន។
កាលពីឆ្នាំ ២០១៩ និស្សិតបាតុករធ្លាប់ចំអកឈ្មោះភាសាចិនរបស់លោកលី គឺ លី កាឈូ។ ពួកគេបានហៅលោកថា «ពីកា ឈូ ឬ Pikachu» នៃគំនូរជីវចលជប៉ុន «Pokemon»។ បើទោះជាយ៉ាងក៏ដោយ កំណត់ត្រាការងាររបស់លោក គឺផ្ទុយទាំងស្រុងពីការប្រៀបធៀបនឹងគំនូរជីវចលនេះ។
ក្រោមការគ្រប់គ្រងរបស់លោកក្នុងនាមជាលេខាធិការទទួលបន្ទុកកិច្ចការសន្តិសុខ និងអាណត្តិដ៏ខ្លីជាអគ្គលេខាធិការនៃហុងកុង នាយកដ្ឋានសន្តិសុខជាតិដែលត្រូវបានរៀបចំក្រោមច្បាប់សន្តិសុខរបស់ក្រុងប៉េកាំង បានចាប់ខ្លួនមនុស្សជាង ២០០ នាក់ ហើយបំបាត់ចលនាបាតុកម្មទៅហើយ។ បញ្ជីឈ្មោះចាប់ខ្លួន រួមមានអ្នកនយោបាយ សកម្មជន មេធាវី អ្នកសារព័ត៌មាននិងនិស្សិត។ បុគ្គលទាំងនេះត្រូវបានចាប់ខ្លួនក្រោមឧក្រិដ្ឋកម្មនិយាយដូចជា «ញុះញង់ឱ្យមានការស្អប់ខ្ពើមរដ្ឋាភិបាល» ឬការប្រើពាក្យស្លោក «រំដោះហុងកុង បដិវត្តន៍នៃសម័យរបស់យើង»។
យ៉ាងណាមិញ ការចាកចេញរបស់លោកស្រី ឡាម សម្រាប់លោកលីមកស្នងតំណែង គឺមិនមែនជាការផ្លាស់ប្ដូរថ្នាក់ដឹកនាំដំបូងនៅឆ្នាំនេះ ដែលបង្ហាញថា ក្រុងប៉េកាំងចង់ពង្រឹងការក្ដោបក្ដាប់លើក្រុងនេះទេ។
កាលពខែមីនា ក្រុងប៉េកាំងបានប្រកាសតែងតាំងលោក វ៉ាង លីងគួយ ជានាយករងនៃការិយាល័យកិច្ចការហុងកុង និងម៉ាកាវ ដែលជាស្ថាប័នកំពូលទទួលបន្ទុកដឹកនាំទិសដៅគោលនយោបាយនៃទីក្រុងទាំង ២។ លោក វ៉ាង គឺជាអ្នកជំនាញសន្តិសុខជាតិ ដែលផ្ដោតការងារទៅលើតំបន់ស្វយ័តស៊ីនជាំង។ លោកខាងលិចបានចោទប្រកាន់ក្រុងប៉េកាំង កំពុងប្រព្រឹត្តអំពើប្រល័យពូជសាសន៍លើជនជាតិអ៊ុយហ្គ័រនៅតំបន់ស៊ីនជាំង។
កាលពីខែមករា លោកឧត្ដមសេនីយ៍ប៉េង ជីងតាំង ដែលដឹកនាំប្រតិបត្តិការយោធានៅតំបន់ស៊ីនជាំង បានផ្លាស់មកធ្វើជាមេបញ្ជាការយោធភូមិភាគកងទ័ពរំដោះប្រជាជនចិននៅហុងកុងវិញ៕
វីដេអូ៖
