.jpg)
ប្រធានាធិបតីលីទុយអានី លោក ហ្គីតាណាស ណាវសេដា បាននិយាយថា ការចូលជាសមាជិកណាតូ ដោយស៊ុយអែត និងហ្វាំងឡង់ គឺនឹងបង្កើនសន្តិសុខនៃតំបន់បាល់ទិក និងពង្រឹងសម្ព័ន្ធភាពយោធាលោកខាងលិច ហើយបានជំរុញឱ្យប្រទេសទាំង ២ កុំឱ្យខ្ជះខ្ជាយពេលវេលាក្នុងការដាក់ពាក្យ។
លោក ណាវសេដា បានច្រានចោលការគំរាមរបស់រុស្ស៊ីថា នឹងពង្រឹងកងកម្លាំង និងដាក់ពង្រាយអាវុធនុយក្លេអ៊ែរនៅតំបន់បាល់ទិក ប្រសិនបើប្រទេសទាំង ២ នេះពិតជាចូលសមាជិកណាតូមែន។ លោក ណាវសេដា និយាយថា ក្រុងម៉ូស្គូ បានដាក់ពង្រាយអាវុធទាំងនេះនៅតំបន់កាលីននីនក្រាដជាច្រើនឆ្នាំមកហើយ ហើយប្រទេសហ្វាំងឡង់ និងស៊ុយអែត គឺគ្រាន់តែឆ្លើយតបនឹងអំពើអរិភាពរបស់រុស្ស៊ីប៉ុណ្ណោះ។
ប្រទេសទាំង ២ នេះ គឺជាសមាជិកសហភាពអឺរ៉ុប ប៉ុន្តែបានមិនបានចូលជាសមាជិកអង្គការណាតូនោះទេ ដោយគិតថាទំនាក់ទំនងរបស់ពួកគេជាមួយរុស្ស៊ី គឺនឹងមិនមានភាពតានតឹងប្រសិនបើពួកគេមិនចូលរួម។ ប៉ុន្តែឥឡូវនេះដោយសារការលុកលុយរបស់រុស្ស៊ីទៅលើអ៊ុយក្រែនប្រទេសហ្វាំងឡង់ បាននិយាយថា ពួកគេនឹងសម្រេចចិត្តអំពីការចូលជាសមាជិកណាតូ ហើយស៊ុយអែតកំពុងពិចារណាធ្វើតម្រាប់តាមប្រទេសហ្វាំងឡង់។
មតិសាធារណៈនៅប្រទេសទាំង ២ នេះ បានបង្វែរជាលើកដំបូងក្នុងប្រវត្តិសាស្ត្រមកគាំទ្រការចូលជាសមាជិកអង្គការណាតូ ធ្វើឱ្យអ្នកនយោបាយដឹកនាំប្រទេសធ្វើការសម្រេចចិត្តយ៉ាងឆាប់រហ័ស បើទោះបីជាមានការគំរាមកំហែងពីរុស្ស៊ីក៏ដោយ៕
