.jpg)
យុទ្ធជនស្មោះត្រង់ក្រុមឧទ្ទាមហ៊ូធីចុះទៅមើលផ្នូររបស់មេដឹកនាំនយោបាយហ៊ូធី Saleh al-Sammad ដែលត្រូវគេសម្លាប់។ AFP
ការពង្រីកសមត្ថភាពរបស់ក្រុមហ៊ូធី កើនឡើងយ៉ាងឆាប់រហ័ស គឺភាគច្រើនដោយសារជំនួយយោធាលាក់បាំងពីប្រទេសអ៊ីរ៉ង់។ នេះបើតាមមន្ត្រីអាមេរិកនិងមជ្ឈិមបូព៌ា និងអ្នកវិភាគ។
ក្រុមដដែលនេះបាននិងកំពុងស្វែងរកវិធីថ្មី ដើម្បីគំរាមកំហែងដល់អារ៉ាប៊ី សាអូ៊ឌីត (ដែលជាសត្រូវក្នុងតំបន់របស់ខ្លួន) ខណៈអ៊ីរ៉ង់បានរួមបញ្ចូលក្រុមហ៊ូធីទៅក្នុងបណ្តាញកងជីវពលរបស់ខ្លួន កាន់តែបង្កើនសមត្ថភាពក្រុមនេះទៀត ដើម្បីបង្កើនឥទ្ធិពលខ្លួនប្រឆាំងនឹងប្រទេសជិតខាងដែលមានទ្រព្យសម្បត្តិច្រើនដោយប្រើប្រាស់អាវុធមានកម្រិតរបស់ខ្លួន។
យ៉ាងណាមិញសព្វាវុធជាច្រើនសព្វថ្ងៃ ត្រូវបានគេផលិតនៅក្នុងប្រទេសយេម៉ែន ជាប្រទេសក្រីក្របំផុតក្នុងសហគមន៍អារ៉ាប់។
លោក Abdulghani Al-Iryani អ្នកស្រាវជ្រាវជាន់ខ្ពស់នៅមជ្ឈមណ្ឌល Sana''a សម្រាប់ការសិក្សាយុទ្ធសាស្ត្របាននិយាយថា៖ «អ្វីដែលយើងកំពុងឃើញនៅក្នុងប្រទេសយេម៉ែនសព្វថ្ងៃ គឺបច្ចេកវិទ្យាដ៏អស្ចារ្យគួរសម»។ ក្រុមហ៊ូធីបាននិយាយថា៖ «F-15 របស់អ្នកឯងដែលមានតម្លៃរាប់លានដុល្លារគ្មានអស្ចារ្យអ្វីទេ ព្រោះខ្ញុំមានដ្រូនរបស់ខ្ញុំដែលមានតម្លៃ ២-៣ ពាន់ដុល្លារ ដែលអាចកម្ទេចពេលធ្វើសង្គ្រាមបានច្រើនដូចគ្នា»។
ការកើនឡើងនៃកងកម្លាំងក្រុមហ៊ូធីមានកម្រិតខ្ពស់ហួសសមត្ថភាពធ្វើកូដកម្មរបស់ប្រទេសយេម៉ែន បានជួយជំរុញឱ្យមានការរៀបចំឡើងវិញផ្នែកនយោបាយកាន់តែទូលំទូលាយក្នុងការកាន់កាប់នៅមជ្ឈិមបូព៌ាដែលជាកត្តានាំឱ្យប្រទេសអារ៉ាប់ មួយចំនួនបង្កើតទំនាក់ទំនងការទូតជាមួយអ៊ីស្រាអែលនៅឆ្នាំ ២០២០ និងប្រទេសផ្សេងទៀត ដើម្បីឆ្ពោះទៅរកការបង្កើតយោធាសម្ងាត់ និងកិច្ចសហប្រតិបត្តិការស៊ើបការណ៍ ដើម្បីប្រឆាំងអ៊ីរ៉ង់។
អារ៉ាប៊ី សាអូ៊ឌីត និងសហព័ន្ធអារ៉ាប់រួម ក៏បានក្រើនរំឭកអ៊ីស្រាអែលអំពីការគាំទ្រផ្នែកយោធារបស់អ៊ីរ៉ង់សម្រាប់កងជីវពលទូទាំងតំបន់ហើយ ក៏បានសម្លឹងអ៊ីស្រាអែលថា ជាដៃគូការពារថ្មី ដោយសង្ឃឹមថា បច្ចេកទេសដែលខ្លួនបានបង្កើត ដើម្បីការពារខ្លួនប្រឆាំងនឹងក្រុមហាម៉ាសនៅហ្គាហ្សា និងហេសបូឡាហ៍នៅលីបង់អាចជួយការពារពួកគេផងដែរ។
បច្ចេកវិទ្យាយោធាជឿនលឿនរបស់ក្រុមហ៊ូធី បានបន្ថែមភាពបន្ទាន់ថ្មីដល់កិច្ចខិតខំប្រឹងប្រែងរបស់អារ៉ាប៊ី សាអូ៊ឌីត ដើម្បីបញ្ចប់សង្គ្រាម ៧ ឆ្នាំ បន្ទាប់ពីការធ្វើអន្តរាគមន៍។
ប៉ុន្តែភាពជឿនលឿនទាំងនោះ ក៏អាចធ្វើឱ្យក្រុមហ៊ូធីមិនសូវចាប់អារម្មណ៍ក្នុងការបញ្ចប់សង្គ្រាមដែរ បើទោះបីជាពួកគេបានយល់ព្រមលើបទឈប់បាញ់រយៈពេល ២ ខែ ក្នុងគោលបំណងចាប់ផ្តើមកិច្ចចរចាសន្តិភាពក៏ដោយ។
អារ៉ាប៊ី សាអូ៊ឌីត និងសហព័ន្ធអារ៉ាប់រួម ក៏បានបញ្ឈប់ការគាំទ្ររបស់ពួកគេនៅពីក្រោយក្រុមប្រឹក្សាប្រធានាធិបតីថ្មី ដែលត្រូវបានបង្កើតឡើងក្នុងខែនេះ ដើម្បីគ្រប់គ្រងរដ្ឋាភិបាលយេម៉ែន និងដឹកនាំការចរចាជាមួយក្រុមហ៊ូធី។
ទោះយ៉ាងណាក៏ដោយក្នុងរយៈពេល ៣ ខែដំបូងនៃឆ្នាំនេះ ក្រុមហ៊ូធី ក៏បានបង្ហាញពីការគំរាមកំហែងចំពោះនៅប្រទេសឈូងសមុទ្រពែរ៍ក្ស។
ការវាយប្រហារមួយដែលបានចាប់ផ្តើមចេញពីប្រទេសយេម៉ែន បានសម្លាប់កម្មករ ៣ នាក់ នៅដេប៉ូប្រេងក្នុងទីក្រុង Abu Dhabi រដ្ឋធានីនៃសហព័ន្ធអារ៉ាប់រួម បណ្ដាលឱ្យមានការឆោឡោពីកងកម្លាំងអាមេរិកនៅសហព័ន្ធអារ៉ាប់រួម និងនាំឱ្យមានការដាក់ពង្រាយប្រព័ន្ធការពារ ដែលមានតម្លៃថ្លៃ ដើម្បីបាញ់ទម្លាក់មីស៊ីលដែលចូលមក ក៏ដូចជាការបាញ់បោះ ដែលបង្កឱ្យមានការឆាបឆេះរោងចក្រប្រេងមួយនៅភាគខាងលិចប្រទេសអារ៉ាប៊ី សាអូ៊ឌីត។
សង្គ្រាមនេះបានធ្វើឱ្យទំនាក់ទំនងរបស់ក្រុមហ៊ូធី និងអ្នកគាំទ្រដ៏មានអំណាចរបស់ពួកគេគឺ អ៊ីរ៉ង់កាន់តែស៊ីជម្រៅ ដែលជាការអនុញ្ញាតឱ្យពួកគេអភិវឌ្ឍសេដ្ឋកិច្ចសង្គ្រាមដ៏ធំមួយ ដើម្បីផ្តល់មូលនិធិដល់ប្រតិបត្តិការរបស់ពួកគេ។ អ្នកវិភាគបាននិយាយថា វាក៏បានធ្វើឱ្យពួកគេក្លាយជាអាជ្ញាធរដែលមិនមានការប្រកួតប្រជែងលើផ្នែកដ៏ធំមួយនៃភាគខាងជើងនៃប្រទេសយេម៉ែន។
លោក NadwaAl-Dawsari អ្នកវិភាគយេម៉ែននៅវិទ្យាស្ថានមជ្ឈិមបូព៌ាបាននិយាយថា៖ «ប្រសិនបើសង្គ្រាមបញ្ចប់នោះ ក្រុមហ៊ូធីនឹងត្រូវគ្រប់គ្រងតំបន់នេះ តែពួកគេមិនចង់គ្រប់គ្រងទេ ដោយការផ្តល់សេវាកម្ម និងចែករំលែកអំណាចដូចនេះទេ។ ក្រុមហ៊ូធីចូលចិត្តបង្កើតសង្គ្រាម មិនចូលចិត្តសន្តិភាពទេ»។
នៅពេលដែលសង្គ្រាមបានឈានទៅដល់ការជាប់គាំង និងវិបត្តិមនុស្សធម៌នឹងកើនឡើងអ៊ីរ៉ង់នឹងត្រូវបង្កើនការគាំទ្ររបស់ខ្លួនដោយផ្គត់ផ្គង់គ្រឿងសង្គ្រាមឱ្យក្រុមហ៊ូធីដោយស្ងាត់ស្ងៀម។
អ្នកបច្ចេកទេសហ៊ូធីទៀតសោត ក៏បានហោះទៅប្រទេសអ៊ីរ៉ង់ ដើម្បីហ្វឹកហាត់ហើយអ្នកជំនាញមកពីកងឆ្មាំបដិវត្តន៍អ៊ិស្លាមអ៊ីរ៉ង់ និងក្រុម Hezbollah របស់ប្រទេសលីបង់ បានធ្វើដំណើរទៅកាន់ប្រទេសយេម៉ែន ដើម្បីរៀបចំក្រុមអ្នកប្រយុទ្ធ និងក្រុមប្រព័ន្ធផ្សព្វផ្សាយ និងដើម្បីបង្រៀនអ្នកបច្ចេកទេសហ៊ូធីពីរបៀបបង្កើតអាវុធផងដែរ។ នេះបើយោងតាមសមាជិកនៃអ័ក្ស អ៊ីរ៉ង់ក្នុងតំបន់ និងអ្នកវិភាគតាមដានជម្លោះ។
នៅដើមសង្គ្រាម ក្រុមឧទ្ទាមហ៊ូធីភាគច្រើន បានវាយបកមកប្រទេសអារ៉ាប៊ី សាអ៊ូឌីតវិញ ដោយវាយលុកគោលដៅនៅតាមព្រំដែនអារ៉ាប៊ី សាអ៊ូឌីត និងភាគខាងជើងប្រទេសយេម៉ែន។ ប៉ុន្តែភាពទំនើបនៃអាវុធរបស់ពួកគេបានកើនឡើងយ៉ាងឆាប់រហ័សដែលអនុញ្ញាតឱ្យពួកគេកំណត់គោលដៅយ៉ាងត្រឹមត្រូវនូវទីតាំងរសើបនៅក្នុងប្រទេសអារ៉ាប៊ី សាអ៊ូឌីត និងសហរដ្ឋអាមេរិក ដែលមានចម្ងាយរាប់រយម៉ាយល៍ពីព្រំដែនប្រទេសយេម៉ែន៕
វីដេអូ៖
