កាលពីថ្ងៃអង្គារ ទី ១៩ មេសា ប្រទេសចិន បាននិយាយថាខ្លួនបានចុះកិច្ចព្រមព្រៀងសន្តិសុខជាមួយនឹងកោះសូឡូម៉ុង ដែលជាការប្រកាសមួយកំពុងបង្កការព្រួយបារម្ភក្នុងចំណោមសហរដ្ឋអាមេរិក អូស្ត្រាលី និងនូវែលសេឡង់ ដែលប្រឆាំងការរីករាលដាលនៃឥទ្ធិពលនៅក្នុងតំបន់មួយពួកគេចាត់ទុកថា ជាតំបន់ក្រោមឥទ្ធិពលរបស់ពួកគេ។
បើទោះជាយ៉ាងក៏ដោយមន្ត្រីកោះសូឡូម៉ុងមួយចំនួនហាក់ដូចជាចង់និយាយថា គ្មានកិច្ចព្រមព្រៀងណាមួយត្រូវបានចុះនៅឡើយទេ។
លោក ដាហ្គលាស អេត ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃកោះសូឡូម៉ុងបានប្រាប់សភាកោះនេះថា មន្ត្រីចិននឹងធ្វើដំណើរមកចុះកិច្ចព្រមព្រៀងកិច្ចសហប្រតិបត្តិការនៅខែឧសភានេះ។
លោកនិយាយថា កិច្ចព្រមព្រៀងនឹងបង្កើនកិច្ចសហប្រតិបត្តិការលើវិស័យពាណិជ្ជកម្ម វិស័យអប់រំ និងវិស័យនេសាទ ប៉ុន្តែលោកប្រឆាំងនឹងគំនិតដើម្បីអនុញ្ញាតឱ្យប្រទេសចិន បង្កើតមូលដ្ឋានយោធានៅប្រទេសលោក។
ក្រុងវ៉ាស៊ីនតោន បានគ្រោងបញ្ជូនគណៈប្រតិភូជាន់ខ្ពស់មួយទៅកាន់កោះសូឡូម៉ុងនៅសប្ដាហ៍នេះ។ អ្នកនាំពាក្យមួយនៃក្រុមប្រឹក្សាសន្តិសុខអាមេរិកបាននិយាយថា គណៈប្រតិភូនឹងសួរនាំរដ្ឋា ភិបាលសូឡូម៉ុង អំពីកិច្ចព្រមព្រៀងជាមួយចិន ហើយនិយាយថា សហរដ្ឋអាមេរិកមានការព្រួយបារម្ភអំពី «កង្វះតម្លាភាព និងធម្មជាតិមិនជាក់លាក់» នៃកិច្ចព្រមព្រៀងនេះ។
រីឯអូស្ត្រាលីវិញបាននិយាយថា ប្រទេសចិន ធ្វើការប្រកាសបែបនេះ គឺហាក់ដូចជាចង់យកឈ្នះលើព័ត៌មានអំពីដំណើរទស្សនកិច្ចរបស់គណៈប្រតិភូអាមេរិក៕
វីដេអូ៖