.jpg)
លោក ដូណាល់ ត្រាំ ថ្លែងទៅកាន់អ្នកគាំទ្រអំឡុងការជួបជុំ ១ កាលពីថ្ងៃទី ៩ មេសា។ AFP
សម្រាប់បេក្ខជននៃក្រុមអភិជននិយមរបស់គណបក្សសាធារណរដ្ឋអាមេរិក លោក ដេវី ម៉ាក់ខូមិច គឺហាក់ដូចជាមានប្រវត្តិរូបល្អឥតខ្ចោះ។ លោកគឺជាអតីតនិស្សិតយោធានៅសាលា West Point លោកគឺជាអតីតទ័ពពិសេស Ranger ដែលមានសញ្ញាបត្របណ្ឌិតពីសាកលវិទ្យាល័យ Princeton លោកចំណាយពេលជាច្រើនឆ្នាំបម្រើការក្នុងរដ្ឋបាលលោកប្រធានាធិបតី ចច ដាបែលយូ ប៊ូស ហើយថ្មីៗនេះលោក គឺនាយកប្រតិបត្តិនៃ Bridgewater Associates ដែលជាមូលនិធិវិនិយោគឯកជនធំជាងគេក្នុងពិភពលោក។
ប៉ុន្តែកាលពីខែមុនលោក ម៉ាក់ខូមិច បានប្រកាសឈរឈ្មោះក្នុងការបោះឆ្នោតសមាជិកព្រឹទ្ធសភានៃរដ្ឋ Pennsylvania ដោយប្រកាន់យកជំហរយ៉ាងជិតស្និទ្ធជាមួយអតីតប្រធានាធិបតីលោក ដូណាល់ ត្រាំ។
លោក ត្រាំ មិនបានចូលរួមកម្មវិធីនេះដោយផ្ទាល់ទេ ប៉ុន្តែអតីតមន្ត្រីដែលស្មោះត្រង់ជាច្រើនដូចជាអតីតអ្នកនាំពាក្យសេតវិមានលោកស្រី សារ៉ា ហ៊ូកាប៊ី សាន់ឌ័រ បានតម្រង់ជួរនៅលើឆាកកម្មវិធី ដើម្បីបង្ហាញថាលោក ម៉ាក់ខូមិច បានទទួលការគាំទ្ររបស់ពួកគេ និងការគាំទ្ររបស់លោក ត្រាំ។
នៅថ្ងៃដដែលបេក្ខជនមួយទៀតនៃគណបក្សសាធារណរដ្ឋលោក ម៉ីម៉េត អហ្ស ដែលជាវេជ្ជបណ្ឌិតវះកាត់បេះដូង និងជាពិធីករនៃកម្មវិធី «Dr. Oz» ក៏បានប្រកាសប្រជែងឈរឈ្មោះអាសនៈព្រឹទ្ធសភានេះផងដែរ។ កម្មវិធីប្រកាសបេក្ខភាពរបស់លោក អហ្ស ក៏មានការចូលរួមពីមន្ត្រីរបស់លោក ត្រាំ ជាច្រើនផងដែរ ដូចជាអតីតក្រសួងថាមពលគឺលោក រិក ភីរី ក៏ដូចជាប្រភពថវិកាយុទ្ធនាការបោះឆ្នោតធំៗរបស់លោក ត្រាំ ផងដែរ ដូចជាសេដ្ឋីប្រេងលោក ហារ៉ូល ហាំ។
ការបោះឆ្នោតជ្រើសរើសបេក្ខជនគណបក្សសាធារណរដ្ឋនៅរដ្ឋ Pennsylvania ខែក្រោយត្រូវបានគេរំពឹងថា ជាចំណុចរបត់ដ៏ធំមួយក្នុងការបោះឆ្នោតសភានៅចុងឆ្នាំនេះ។ ក្នុងឆ្នាំ ២០២០ លោក ចូ បៃដិន បានយកឈ្នះលើលោក ត្រាំ នៅរដ្ឋនេះ ប៉ុន្តែដោយគម្លាតសំឡេងដ៏តូចប៉ុណ្ណោះ។ នៅក្នុងព្រឹទ្ធសភាបច្ចុប្បន្នសំឡេងគឺបែងចែកស្មើគ្នា ៥០-៥០ រវាងគណបក្សប្រជាធិបតេយ្យ និងគណបក្សសាធារណរដ្ឋ ប៉ុន្តែគណបក្សប្រជាធិបតេយ្យអាចកាន់កាប់ការគ្រប់គ្រងបានដោយសារមានអនុប្រធានាធិបតីដែលក៏ដើរតួជាប្រធានព្រឹទ្ធសភា ជាសមាជិកបក្សប្រជាធិបតេយ្យ។ ការជ្រើសរើសបេក្ខជនគណបក្សសាធារណរដ្ឋ គឺនឹងសម្រេចមាគ៌ាថា តើគណបក្សសាធារណរដ្ឋអាចដណ្ដើមការគ្រប់គ្រងសភាជាន់ខ្ពស់នេះបានឬទេ?
ការបោះឆ្នោតជ្រើសរើសបេក្ខជននេះ ក៏នឹងការក្លាយជាការសាកល្បងឥទ្ធិពលរបស់លោក ត្រាំ នៅក្នុងបក្សសាធារណរដ្ឋ នៅពេលដែលបេក្ខជនបក្សនេះស្ទើរតែទាំងអស់នៅទូទាំងប្រទេសក្រាបលំឱនកាយ ដើម្បីធានាការគាំទ្រពីអតីតប្រធានាធិបតីរូបនេះ។
លោក ម៉ាក់ខូមិច និងលោក អហ្ស គឺជាបុគ្គលវណ្ណៈអភិជន ហើយទើបតែឈរឈ្មោះបោះ ឆ្នោតលើកដំបូងប៉ុណ្ណោះ។ ពួកគេបានប្រកាន់ខ្ជាប់នូវមនោគមន៍វិជ្ជារបស់លោក ត្រាំ ហើយត្រូវបានគេរំពឹងថា ជាបេក្ខជននាំមុខគេក្នុងចំណោមបេក្ខជនគណបក្សសាធារណរដ្ឋជាច្រើន។
បើទោះជាយ៉ាងនេះក៏ដោយ មិនមែនគ្រប់គ្នាសុទ្ធតែជឿជាក់លើអន្តរាគមន៍របស់លោក ត្រាំ និងអ្នកគាំទ្ររបស់លោក ជាពិសេសដោយសារបញ្ហាផ្លូវច្បាប់ជាច្រើនដែលលោក ត្រាំ និងសម្ព័ន្ធកំពុងប្រឈមមុខ ខណៈពេលដែលមួយចំណែកធំនៃប្រជាជននៅបន្តមិនពេញចិត្តចំពោះអតីតប្រធានាធិបតីរូបនេះ។
អ្នកវិភាគមួយចំនួននិយាយថា បេក្ខជនទាំង ២ នេះ គឺឈរឈ្មោះដើម្បីផលប្រយោជន៍ផ្ទាល់ខ្លួនប៉ុណ្ណោះ ហើយកំពុងធ្វើពុតជាអ្នកគាំទ្រលោក ត្រាំ។ គេក៏និយាយថា យុទ្ធសាស្ត្រនេះក៏ជាយុទ្ធសាស្ត្រមិនសូវល្អ ដោយសារនៅរដ្ឋ Pennsylvania លោក ត្រាំ បានចាញ់សំឡេងឆ្នោតរបស់លោក បៃដិន កាលពីឆ្នាំ ២០២០។
ប៉ុន្តែអ្នកនិយាយថា យុទ្ធសាស្ត្រនេះ គឺចាំបាច់យ៉ាងហោចណាស់នៅក្នុងករណីដែលមានគូប្រជែងច្រើននៅក្នុងគណបក្សរបស់ខ្លួន។ បើតាមសម័យបោះឆ្នោតមុនៗ មានតែសមាជិកស្មោះត្រង់ខ្លាំងប៉ុណ្ណោះ ដែលចូលរួមក្នុងការបោះឆ្នោតជ្រើសរើសបេក្ខជនបក្ស។
បើទោះបីជាលោក ត្រាំ យល់ព្រមគាំទ្របេក្ខជនជាង ១០០ នាក់មកដល់ពេលនេះ គឺរំពឹងយ៉ាងទូលំទូលាយថា លោកត្រាំនឹងមិនចូលធ្វើអន្តរាគមន៍ក្នុងការបោះឆ្នោតនៅរដ្ឋ Pennsylvania បន្ទាប់ពីបេក្ខជននៅរដ្ឋនេះដែលលោកប្រកាសគាំទ្រកាលពីឆ្នាំមុនបានបរាជ័យក្នុងការបោះឆ្នោត។
ប៉ុន្តែលោក ត្រាំ ដែលល្បីឈ្មោះដោយសារអាជីពរបស់លោកនៅលើកញ្ចក់ទូរទស្សន៍បានបង្កភាពភ្ញាក់ផ្អើលនៅពេលដែលលោកប្រកាសគាំទ្រលោក អហ្ស ធ្វើឱ្យវេជ្ជបណ្ឌិតលើកញ្ចក់ទូរទស្សន៍រូបនេះមានការកើនឡើងការគាំទ្រក្នុងដំណាក់ចុងក្រោយនៅយុទ្ធនាការជ្រើសរើសបេក្ខជនបក្ស។
ការស្ទង់មតិសមាជិកបក្សសាធារណរដ្ឋ មុនអន្តរាគមន៍របស់លោក ត្រាំ បានបង្ហាញថា លោក ម៉ាខូមិច បានទទួលការគាំទ្រ ២១,៨ ភាគរយ ខណៈពេលដែលលោក អហ្ស ទទួលការគាំទ្រ ១៧,៦ ភាគរយ។ ប៉ុន្តែតិចជាង១ ខែមុនការបោះឆ្នោតជ្រើសរើសបេក្ខជនកើតឡើង សមាជិកគណបក្សសាធារណរដ្ឋជិតពាក់កណ្ដាលបាននិយាយថា ពួកគេនៅមិនទាន់សម្រេចថា គាំទ្រនរណា។ នេះមានន័យថា អន្តរាគមន៍របស់លោក ត្រាំ ហាក់ដូចជាមិនសូវមានប្រសិទ្ធភាពដូចពេលមុនៗទេ៕
