កាលពីយប់ថ្ងៃចន្ទ ទី ១៨ មេសា កងយោធាអ៊ីស្រាអែលបានធ្វើការបាញ់ទម្លាក់គ្រាប់រ៉ុក្កែត បាញ់ដោយក្រុមឧទ្ទាមនៅក្នុងតំបន់ហ្គាហ្សា ខណៈពេលដែលភាពតានបន្តកើនឡើងបន្ទាប់ពីមានការប៉ះទង្គិចរវាងជនជាតិប៉ាឡេស្ទីន និងប៉ូលិសអ៊ីស្រាអែល នៅទីសក្ការសំខាន់បំផុតក្នុងក្រុងហ្ស៊េរុយសាឡិម។
គ្មានក្រុមណាមួយប្រកាសចេញមុខទទួលខុសត្រូវចំពោះការវាយប្រហារដោយគ្រាប់រ៉ុកកែតនេះទេ ប៉ុន្តែមានតម្រុយនៅពេលថ្មីៗនេះជាច្រើនពីក្រុមជីហាដអ៊ិស្លាម នៅតំបន់ក្នុងហ្គាហ្សា ថាពួកគេនឹងឆ្លើយតបនឹងការប៉ះទង្គិចនៅវិហារអ៊ិស្លាមអាល់អាក់សា ដែលជនជាតិជ្វីហ្វហៅថាប្រាសាទភ្នំ។ នេះគឺជាការបាញ់ប្រហារដោយគ្រាប់រ៉ុក្កែតដំបូងគេចាប់តាំងពីខែមករាមក ខណៈពេលដែលភាពតានតឹងបានធ្លាក់ចុះចាប់តាំងពីសង្គ្រាម ១១ ថ្ងៃកាលពីខែ ឧសភាឆ្នាំ មុន។
ក្រុមឧទ្ទាមហាម៉ាស ដែលជាអ្នកកាន់កាប់អំណាចនៅតំបន់ហ្គាហ្សា បានថ្កោលទោសសកម្មភាពរបស់ប៉ូលិសអ៊ីស្រាអែលនៅវិហារអាល់អាក់សា ប៉ុន្តែក៏បានបង្ហាញថាខ្លួនមិនចង់បង្កើនភាពតានតឹងដល់កម្រិតដូចកាលពីសង្គ្រាមឆ្នាំមុននោះទេ។
កាលពីសប្ដាហ៍មុន លោកខាលេដ មេសាអាល់ មន្ត្រីហាម៉ាសជាន់ខ្ពស់១រូប បាននិយាយថាទាំងហាម៉ាស និងទាំងអ៊ីស្រាអែលបានប្រាប់ក្រុមប្រទេសឃ្លាំមើលស្ថានភាពបទឈប់បាញ់ថាពួកគេទាំង២មិនចង់បានការប្រយុទ្ធគ្នា១ជុំទៀតទេ។
បើទោះជាយ៉ាងនេះក៏ដោយ ការវាយប្រហារកាលពីថ្ងៃចន្ទបានបង្ហាញថាស្ថានភាពអាចផ្លាស់ប្ដូរយ៉ាងរហ័ស។ ស្ថានភាពស្រដៀងគ្នានេះដែរបានបង្កឱ្យមានសង្គ្រាម ១១ ថ្ងៃកាលពីឆ្នាំមុន ហើយធ្វើឱ្យមនុស្សជាច្រើនព្រួយបារម្ភថាសង្គ្រាមនេះអាចកើតឡើងម្ដងទៀត៕