.jpg)
ប្រមុខរដ្ឋាភិបាលយោធាមីយ៉ាន់ម៉ា លោកឧត្តមសេនីយ៍ មីន អ៊ុងឡាំង ថ្លែងនៅទីក្រុងណៃពិដោនាពេលកន្លងទៅ។ AFP
ក្នុងប៉ុន្មានសប្តាហ៍ថ្មីៗនេះ កងកម្លាំងសន្តិសុខបានចាប់ខ្លួនវេជ្ជបណ្ឌិតនៅតាមផ្ទះ និងមន្ទីរពេទ្យ ដោយបានដកហូតអាជ្ញាប័ណ្ណរបស់គ្រូពេទ្យលេចធ្លោមួយចំនួន និងគំរាមបិទមន្ទីរពេទ្យដែលប្រឆាំងនឹងរបបនេះ។
មីយ៉ាន់ម៉ាមានឈ្មោះល្បីខាងលួចលុយពីពលរដ្ឋពិសេសគ្រូពេទ្យ ព្រោះគ្រូពេទ្យគឺជាអ្នកដែលមានទ្រព្យសម្បត្តិច្រើនជាងគេរបស់ប្រទេសនេះ។ ក្នុងពេលចាប់ខ្លួនទាហានទាំងនេះ បានរឹបអូសលុយ មាស គ្រឿងអលង្ការ និងរថយន្ត ដែលមានតម្លៃរាប់ម៉ឺនដុល្លារ។ មន្ត្រីមន្ទីរពេទ្យបាននិយាយថា ក្នុងករណីខ្លះមន្ត្រីកងទ័ព បានទាមទារប្រាក់ចំនួន ៥ ០០០ ដុល្លារ ដើម្បីកុំឱ្យបិទមន្ទីរពេទ្យឯកជន។
ចាប់តាំងពីរដ្ឋប្រហារនៅ ថ្ងៃទី ១ ខែ កុម្ភៈ ឆ្នាំ ២០២១ ទាហាន និងប៉ូលិស បានចាប់ខ្លួនគ្រូពេទ្យចំនួន ១៤០ នាក់ សម្រាប់ការចូលរួមក្នុងចលនាតវ៉ាទូទាំងប្រទេស។ នេះបើយោងតាមសមាគមជំនួយដើម្បី អ្នកទោសនយោបាយ ដែលត្រូវបានគេដេញចាប់ខ្លួន ដោយក្នុងនោះ៨៩នាក់នៅជាប់គុក។
បើយោងតាមសមាគមគ្រូពេទ្យ ដើម្បីសិទ្ធិមនុស្ស ដែលមានមូលដ្ឋាននៅទីក្រុងញូវយ៉កវេជ្ជបណ្ឌិតយ៉ាងហោចណាស់ ៣០ នាក់ ត្រូវគេបានសម្លាប់ហើយប្រទេសមីយ៉ាន់ ម៉ាជាកន្លែងគ្រោះថ្នាក់បំផុតមួយនៅក្នុងពិភពលោកសម្រាប់បុគ្គលិកសុខាភិបាល។
ការយាយី និងការចាប់ខ្លួនគ្រូពេទ្យ ដែលប្រឆាំងនឹងរបបនេះកើតឡើងនៅពេល ដែលប្រទេសនេះប្រឈមមុខនឹងភាពអាសន្នផ្នែកសុខភាពជាបន្តបន្ទាប់ ដោយសារតែកង្វះវេជ្ជបណ្ឌិត កង្វះធនធាន និងការបិទមន្ទីរពេទ្យ និងគ្លីនិកជាច្រើនជាបន្តបន្ទាប់។
ក្នុងសេចក្តីថ្លែងការណ៍មួយកាលពីដើមខែចេញពេលទិវាសុខភាពពិភពលោកក្រុមសិទ្ធិមនុស្សបណ្តាញឯកសារសិទ្ធិមនុស្សបាននិយាយថា យោធាមីយ៉ាន់ម៉ាបានធ្វើឱ្យប្រទេសមានអស្ថិរភាពហួសពីការស្ដារឡើងវិញបាន។ វិស័យថែទាំសុខភាព គឺជាផ្នែកមួយក្នុងចំណោមផ្នែកជាច្រើនដែលត្រូវបានបំផ្លាញដោយសាររបបនេះ។
កុមារជិត ១ លាននាក់ មិនបានទទួលការចាក់ថ្នាំបង្ការជាប្រចាំឡើយ ដែលជាហេតុបណ្ដាលឱ្យពួកគេងាយនឹងកើតជំងឺកញ្ជ្រឹល និងជំងឺផ្សេងៗទៀតហើយកុមារជិត ៥ លាននាក់ កំពុងខកខានទទួលទានអាហារបំប៉នវីតាមីន A ដែលធ្វើឱ្យពួកគេប្រឈមនឹងការឆ្លងមេរោគ និងពិការភ្នែក។ នេះបើយោងតាមអង្គការយូនីសេហ្វ។
ស្ទើរតែ ៤០ ភាគរយនៃចំនួនប្រជាជននៅទូទាំងប្រទេសទើបតែទទួលបានវ៉ាក់សាំងកូវីដពេញលេញ ខណៈអ្នកជំងឺជាច្រើនត្រូវបានគេទុកចោលដោយគ្មានការថែទាំជាប្រចាំ។
វេជ្ជបណ្ឌិតជាច្រើនបាននិយាយថា ទោះយ៉ាងណាវិស័យសុខាភិបាលបានប្រសើរ ឡើងបន្តិចក្នុងប៉ុន្មានខែថ្មីៗនេះនៅទីក្រុងយ៉ាំងហ្គោន ដែលជាទីក្រុងធំបំផុតរបស់ប្រទេសមីយ៉ាន់ម៉ា ដោយសារគ្រូពេទ្យជាច្រើននាក់បានត្រឡប់ទៅធ្វើការវិញ។ ប៉ុន្តែក្រុមគ្រូពេទ្យប្រឆាំងរបបនេះប៉ាន់ស្មានថា មនុស្សរាប់រយនាក់នៅតែស្លាប់ក្នុង ១ សប្តាហ៍ ដោយសារតែការដួលរលំនៃប្រព័ន្ធថែទាំសុខភាពនៅប្រទេសនេះ។
វេជ្ជបណ្ឌិតបាននិយាយថា យុទ្ធសាស្ត្ររដ្ឋាភិបាល គឺធ្វើការដោះលែងគ្រូពេទ្យចេញពីពន្ធនាគារក្នុងលក្ខខណ្ឌ ដែលពួកគេយល់ព្រមធ្វើការនៅមន្ទីរពេទ្យរដ្ឋាភិបាល ដែលគ្រប់គ្រងដោយយោធា។
វេជ្ជបណ្ឌិត Wai Myo ដែលត្រូវបានបណ្តេញចេញពីមន្ទីរពេទ្យ Mandalay General General កាលពីឆ្នាំមុនបាននិយាយថា៖ «នៅក្នុងតំបន់ដែលមានជម្លោះកាន់តែអាក្រក់ជាងនៅតាមទីក្រុងទៀត ដោយសារមន្ទីរពេទ្យរដ្ឋាភិបាល មិនដំណើរការទាល់តែសោះហើយប្រជាជនភាគច្រើនស្ថិតនៅក្នុងជំរំជនភៀសខ្លួននៅក្នុងព្រៃ។ ដូច្នេះប្រសិនបើមានអ្វីកើតឡើង ចំពោះពួកគេភាគរយនៃការស្លាប់គឺខ្ពស់ណាស់»។
យ៉ាងណាមិញ អ្នកនាំពាក្យក្រសួងសុខាភិបាលរបស់របបយោធា ក៏បានបដិសេធមិនធ្វើអត្ថាធិប្បាយ។
បន្ទាប់ពីរដ្ឋប្រហារ គ្រូពេទ្យរាប់ពាន់នាក់ បានបដិសេធមិនធ្វើការឱ្យរបបនេះ ហើយបានឈប់ពីការងារនៅនឹងកន្លែង។ គ្រូពេទ្យជាច្រើនបានចាប់ផ្តើមផ្តល់សេវា ដោយឥតគិតថ្លៃនៅមន្ទីរពេទ្យឯកជន និងគ្លីនិកផ្ទាល់ខ្លួនវិញ។
ជាការបង្ខំវេជ្ជបណ្ឌិតឱ្យធ្វើការនៅក្នុងកន្លែង ដែលខ្លួនគ្រប់គ្រងយោធាបានបិទ គ្លីនិករាប់សិប ដែលផ្តល់ការព្យាបាលដោយឥតគិតថ្លៃ ហើយទាមទារឱ្យមន្ទីរពេទ្យ និងគ្លីនិកឯកជនប្រគល់ឈ្មោះអ្នកជំងឺ និងប្រវត្តិវេជ្ជសាស្ត្រឱ្យខ្លួនថែមទៀតផង៕
