បើប្រៀបធៀបនឹងរយៈពេលដូចគ្នាកាលពីឆ្នាំមុន អត្រាទិញ-លក់ផ្ទះថ្មីនៅទីក្រុង Zhengzhou ធ្លាក់ចុះជាង ៣០ ភាគរយក្នុងរយៈពេល ៦ សប្តាហ៍ គិតចាប់ពីថ្ងៃទី ១ ខែមីនា ដល់ពាក់កណ្តាលខែមេសា ជាកម្រិតឆ្លុះបញ្ចាំងពីនិន្នាការអចលនទ្រព្យទូទាំងប្រទេស។
លោក Li Huixiang ដែលជាឈ្មួញកណ្តាលអចលនទ្រព្យនៅទីក្រុង Zhengzhou ធ្លាប់ទន្ទឹងការហក់ឡើងវិញនៃវិស័យអចលនទ្រព្យកាលពីខែមីនា។ ក្នុងកិច្ចខិតខំប្រឹងប្រែងដើម្បីជំរុញវិស័យអចលនទ្រព្យរបស់ទីក្រុង និងសេដ្ឋកិច្ចក្នុងតំបន់មន្ត្រីសាលាក្រុង បានបង្ហាញការលើកទឹកចិត្តជាច្រើនដល់វិស័យនេះ រួមទាំងការផ្ដល់់អត្រាការប្រាក់ទាប និងការឧបត្ថម្ភធនសាច់ប្រាក់សម្រាប់អ្នកទិញផ្ទះថ្មី។
ប៉ុន្តែតាំងតែពីការប្រកាសពីវិធានថ្មីមក លោក Li លក់តែផ្ទះល្វែងបានតែ ៥ ប៉ុណ្ណោះជាចំនួនតិចជាងបរិមាណលក់ទូទៅរបស់លោកឆ្ងាយណាស់។ លោក Li បាននិយាយថា៖ «យើងឃើញមានការរំខានកើតឡើង ជុំវិញការបង្កើនចំនួនទិញលក់ផ្ទះ ដោយសារការអនុវត្តតាមច្បាប់ការពារកូវីដ»។
ភាពរអាក់រអួលធំបំផុតគឺការបិទទីក្រុង Zhengzhou ទាំងមូល ដែលបានផ្អាកសកម្មភាពប្រជាជន ១២,៦ លាននាក់ ព្រមទាំងបិទតំបន់ដ៏ធំមួយ រួមមានព្រលានយន្តហោះ និងរោងចក្រធំៗផងដែរ។
រដ្ឋបាល លោក Xi Jinping បានបញ្ជាក់យ៉ាងច្បាស់ថា ការលំបាករបស់ប្រជាជននៅក្នុងទីក្រុងសៀងហៃ និងទីក្រុងផ្សេងទៀត ដែលរងផលប៉ះពាល់ ដោយការបិទខ្ទប់នៅតែជាក្ដីបារម្ភរបស់រដ្ឋាភិបាល ប៉ុន្តែការទប់ស្កាត់ការរីករាលដាលកូវីដនឹងនៅតែជាអាទិភាពចម្បងរបស់ប្រទេស។ ការបិទខ្ទប់ទីក្រុងសៀងហៃដំបូង គឺមានបំណងបិទដោយផ្នែក និងមានរយៈពេលមិនឱ្យលើស ពី ១០ ថ្ងៃ ប៉ុន្តែក្រោយមកត្រូវបានពន្យារពេលដល់សព្វថ្ងៃ។
កាលពីថ្ងៃចន្ទ ការិយាល័យស្ថិតិជាតិបាននិយាយថា ការចាប់ផ្តើមសាងសង់លំនៅឋានបានធ្លាក់ចុះ ២០ ភាគរយ នៅក្នុងត្រីមាសទី១ បើធៀបនឹងរយៈពេលដូចគ្នាកាលពីឆ្នាំមុន បើទោះបីជា ទីក្រុងយ៉ាងហោចណាស់ ៦០ ផ្សេងទៀត បានអនុវត្តវិធានការគាំទ្រអចលនទ្រព្យស្រដៀងគ្នាទៅនឹងទីក្រុង Zhengzhou ក៏ដោយ។
ស្ថាប័នដដែល បានប៉ាន់ប្រមាណថា ទិន្នផលសេដ្ឋកិច្ចនៅត្រីមាសទី១ បានកើនឡើង ៤,៨ ភាគរយ ខ្លាំងជាងការរំពឹងទុក។ ទិន្នន័យក្នុងខែមីនា បានចង្អុលបង្ហាញពីការចាប់ផ្តើមនៃការធ្លាក់ចុះគួរឱ្យកត់សម្គាល់នៅពេលដែលទីក្រុងសៀងហៃ និងទីក្រុងជាច្រើនទៀតបានចាប់ផ្តើមអនុវត្តការបិទខ្ទប់ ដើម្បីទប់ស្កាត់ការ-ផ្ទុះឡើងនៃមេរោគ និងគាំទ្រដល់គោលនយោបាយហ្សេរ៉ូកូវីដរបស់ប្រធានាធិបតី Xi Jinping។
ការបិទខ្ទប់ដ៏តឹងរ៉ឹងបំផុត ធ្វើឡើងនៅតំបន់ដីសណ្ដទន្លេ Yangtze ជុំវិញទីក្រុងសៀងហៃ ធ្វើឱ្យមានការរាំងស្ទះការដឹកជញ្ជូននៅក្នុងតំបន់ផលិត និងនាំចេញដ៏សំខាន់បំផុតមួយរបស់ប្រទេស ហើយទីក្រុង Zhengzhou នេះទៀតសោតក៏រងផលប៉ះពាល់ផងដែរ។
ទីប្រឹក្សាគោលនយោបាយរដ្ឋាភិបាល ដែលមានមូលដ្ឋាននៅទីក្រុងប៉េកាំងម្នាក់សុំមិនបញ្ចេញឈ្មោះ បាននិយាយថា សូម្បីតែមុនពេលការបិទខ្ទប់ ចាប់ផ្តើមក្នុងខែមីនាក៏ដោយ ភាពជាអ្នកដឹកនាំកំពូល បានប៉ាន់ស្មានពីផលប៉ះពាល់នៃវិស័យអចលនទ្រព្យលើសេដ្ឋកិច្ចទូលំទូលាយរួចទៅហើយ។
ប្រភពដដែលបានបន្ថែមថា៖ «ស្ថានការណ៍អាចនឹងកាន់តែអាក្រក់ពេលនេះសិន ហើយវានឹងប្រសើរឡើងនៅពេលក្រោយ»។
កញ្ចប់ជំរុញអចលនទ្រព្យរបស់ទីក្រុង Zhengzhou ត្រូវបានគេចាត់ទុកថា ជាការចាំបាច់ក្នុងការជួយសង្គ្រោះវិស័យនេះពីមហន្តរាយនៅឆ្នាំ ២០២១។ យោងតាមទិន្នន័យផ្លូវការ ការលក់ផ្ទះថ្មីនៅក្នុងទីក្រុង បានធ្លាក់ចុះ ១ ភាគ ៣ កាលពីឆ្នាំមុន ខណៈដែលការលក់ដីធ្លី ដែលជាប្រភពប្រាក់ចំណូលសារពើពន្ធដ៏ធំមួយ ធ្លាក់ចុះ ១ ភាគ ៤។
បន្ថែមពីលើការបង្ក្រាបរបស់លោក Xi លើអ្នកអភិវឌ្ឍន៍ដែលមានសក្ដានុពលខ្ពស់ សេដ្ឋកិច្ចរបស់ទីក្រុង Zhengzhou កាលពីឆ្នាំមុន ក៏រងផលប៉ះពាល់ ដោយការបិទខ្ទប់ ២ ដង និងទឹកជំនន់យ៉ាងធ្ងន់ធ្ងរដែលបានធ្វើឱ្យអាជីវកម្មខ្នាតតូចក្ស័យធន និងរួមចំណែកដល់ការកើនឡើងនៃភាពអត់ការងារធ្វើ។
លោក Bert Hofman ប្រធានវិទ្យាស្ថានអាស៊ីបូព៌ារបស់សាកលវិទ្យាល័យជាតិសិង្ហបុរី បានមានប្រសាសន៍ថា៖ «រដ្ឋាភិបាលក្នុងតំបន់បាននិងកំពុងទប់ទល់ជាមួយនឹងការកើនឡើងតម្រូវការចំណាយ ជាពិសេសនៅក្នុងវិស័យសង្គម ប៉ុន្តែប្រាក់ចំណូលមូលដ្ឋានស្ថិតក្នុងកម្រិតដដែល ដូចនេះពួកគេពិតជាត្រូវត្បិតត្បៀតខ្លាំងណាស់»។
មន្ត្រីលំនៅឋានទីក្រុង Zhengzhou បាននិយាយថា៖ «យើង កំពុងធ្វើអ្វីគ្រប់យ៉ាង រួមទាំងការអនុញ្ញាតឱ្យមានការរំពឹងទុកកម្រិតមធ្យម ដើម្បីធ្វើឱ្យទីផ្សារមានរស់រានមានជីវិតឡើងវិញ»។
ទោះយ៉ាងណា បើទោះជាវិធានការនេះ បានជំរុញការលក់អចលនទ្រព្យឱ្យរីកចម្រើនឡើងវិញក៏ពិតមែន ប៉ុន្តែវាមិនបានផ្ដល់ផលដល់អ្នកទិញវណ្ណៈកណ្តាលនោះទេ ផ្ទុយទៅនឹងគោលបំណងរបស់លោក Xi ក្នុងការលើកកម្ពស់ «វិបុលភាពរួម» និងកាត់បន្ថយការបែងចែកសេដ្ឋកិច្ចសង្គមយ៉ាងធ្ងន់ធ្ងរក្នុងប្រទេសចិន៕