.jpg)
លោក អេម៉ានុយអែល ម៉ាក្រុង ឈ្នះក្នុងអាណត្តិទី២ ជាប្រធានាធិបតីបារាំង។ រូបថត AFP
លោក អេម៉ានុយអែល ម៉ាក្រុង បានប្ដេជ្ញាបង្រួបបង្រួមប្រទេសបារាំង ដែលបែកបាក់គ្នាដោយសារនយោបាយ បន្ទាប់ពីលោកបានឈ្នះអាណត្តិទី២ ជាប្រធានាធិបតីបារាំងក្នុងជ័យជម្នះដ៏ច្បាស់មួយលើលោកស្រី ម៉ារីន ឡឺប៉ែន ដែលបើទោះបីជាចាញ់ ក៏ដោយក៏ទទួលបានសន្លឹកឆ្នាតគាំទ្រចំនួន ១៣ លានផងដែរ ដែលជាកម្រិតគាំទ្រខ្ពស់បំផុតសម្រាប់គណបក្សស្ដាំនិយមជ្រុលរបស់លោកស្រី។
លោក ម៉ាក្រុង បានក្លាយជាមេដឹកនាំបារាំងដំបូងដែលជាប់ឆ្នោតម្ដងទៀត ដើម្បីកាន់អាណត្តិទី២ ក្នុងរយៈពេល ២០ ឆ្នាំដោយទទួលបានសន្លឹកឆ្នោតគាំទ្រ ៥៨,៥៤ ភាគរយ ធៀបនឹង ៤១,៤៦ភាគរយដែលលោកស្រី ឡឺប៉ែន បានទទួល។
ក្នុងពិធីប្រកាសជ័យជម្នះនៅទួអេហ្វែល លោក ម៉ាក្រុង បានប្ដេជ្ញាធ្វើការឆ្លើយតប «ប្រកបដោយប្រសិទ្ធភាព» ចំពោះ «កំហឹង និងការមិនយល់ស្រប» របស់អ្នកបោះឆ្នោតគាំទ្រគណបក្សស្ដាំនិយមជ្រុល។
លោក ម៉ាក្រុង បានយកជ័យជម្នះដោយមានគម្លាតទាបជាងគម្លាតជ័យជម្នះ ៦៦ ភាគរយ កាលពីឆ្នាំ ២០១៧។ ការចូលរួមដោយប្រជាជនក្នុងការបោះឆ្នោតនេះ ក៏ទាបជាងកាលពី ៥ ឆ្នាំមុនដោយមានការប៉ាន់ស្មានថា មានអវត្តមាន ២៨ ភាគរយឯណោះ។
លោកស្រី ឡឺប៉ែន បានជោគជ័យក្នុងការទទួលសំឡេងគាំទ្រច្រើនជាងគេក្នុងប្រវត្តិស្ដាំនិយមជ្រុល បន្ទាប់ពីលោកស្រីធ្វើយុទ្ធនាការបោះឆ្នោតដោយផ្អែកលើការប្ដេជ្ញាជុំវិញបញ្ហាក្ដៅជាច្រើនដូចជាការកើនឡើងនៃតម្លៃរស់នៅ ការហាមឃាត់មិនឱ្យសាសនិកមូស្លីមពាក់ឧបករណ៍រុំក្បាលនៅទីសាធារណ: ក៏ដូចការសន្យាអនុវត្តវិធានការ ដើម្បីផ្ដល់អាទិភាពដល់ប្រជាជនដើមកំណើតបារាំងសម្រាប់ការងារ លំនៅឋាន និងការថែទាំសុខភាពជាងជនអន្តោប្រវេសន្ត។ លោកស្រីនិយាយថា ចំនួនការគាំទ្ររបស់លោកស្រីគឺ «ជ័យជម្នះដ៏ភ្លឺស្វាង» ហើយបន្ថែមទៀតថា៖ «គំនិតដែលយើងតំណាងកំពុងឈានដល់កម្ពស់ថ្មី»៕
វីដេអូ៖
