.jpg)
លោកស្រី ម៉ាដាលេណា អេនឌឺសុន ធ្វើសន្និសីទកាសែតនៅមុនជំនួប ១ ដើម្បីក្លាយជាសមាជិកអង្គការណាតូ។ AFP
ប្រទេសស៊ុយអែត និងហ្វាំងឡង់ គឺជាប្រទេសអឺរ៉ុប ២ ដែលប្រកាន់ខ្ជាប់នូវជំហរអព្យាក្រឹតមិនចូលជាសម្ព័ន្ធភាពយោធាជាយូរលង់ណាស់មកហើយ ប៉ុន្តែឥឡូវនេះបានកាន់តែខិតទៅរកការចូលជាសមាជិកនៃអង្គការណាតូ បន្ទាប់ពីរុស្ស៊ីចូលលុកលុយអ៊ុយក្រែន។
កាលពីសប្ដាហ៍មុន នាយករដ្ឋមន្ត្រីស៊ុយអែត លោកស្រី ម៉ាដាលេណា អេនឌឺសុន ក្នុងកិច្ចប្រជុំជាមួយនាយករដ្ឋមន្ត្រីហ្វាំងឡង់ លោកស្រី សាន់ណា ម៉ារិន បាននិយាយថា៖ «ទិដ្ឋភាពសន្តិសុខបានផ្លាស់ប្ដូរទាំងស្រុង»។ ការលើកឡើងដោយលោកស្រី អេនឌឺសុន នៅពេលថ្មីៗនេះ បានតំណាងឱ្យការផ្លាស់ប្ដូរដ៏ធំមួយក្នុងទស្សនៈរបស់លោកស្រី ជុំវិញសមាជិកភាពអង្គការណាតូ។ ត្រឹមតែដើមខែនេះប៉ុណ្ណោះ លោកស្រីនិយាយថា ប្រសិនបើស៊ុយអែតចូលជាសមាជិកណាតូ នោះវានឹង «បន្ថែមអស្ថិរភាពតំបន់នេះនៃអឺរ៉ុប និងបង្កើនភាពតានតឹង»។
ការផ្លាស់ប្ដូរជំហររបស់លោកស្រីឆ្លុះបញ្ចាំងអំពីការផ្លាស់ប្ដូរជំហររបស់ប្រជាពលរដ្ឋប្រទេសទាំង ២ ខណៈពេលដែលពួកគេប្រតិកម្មនឹងព័ត៌មានដ៏គួរឱ្យរន្ធត់ពីប្រទេសអ៊ុយក្រែន។ ក្នុងការស្ទង់មតិនាពេលថ្មីៗនេះ ៦៨ ភាគរយនៃប្រជាជនហ្វាំងឡង់គាំទ្រការចូលជាសមាជិកណាតូ។ នេះបើធៀបនឹង ២៤ ភាគរយកាលពីឆ្នាំមុន ហើយជាលើកដំបូង ក្នុងប្រវត្តិសាស្ត្រភាគច្រើននៃប្រជាជនស៊ុយអែតគាំទ្រការចូលជាសមាជិកនៃសម្ព័ន្ធភាពយោធានេះ។
ខណៈពេលដែលប្រទេសទាំង ២ មានទំនាក់ទំនងវប្បធម៌ និងសេដ្ឋកិច្ចជិតស្និទ្ធជាមួយអឺរ៉ុប ពួកគេជាប្រវត្តិសាស្ត្របានបដិសេធមិនចូលជាសមាជិកអង្គការណាតូ បើទោះបីជាប្រទេសប្លុកកុម្មុយនីស្តជាច្រើនបានធ្វើបែបនេះ បន្ទាប់ពីការដួលរលំនៃសហភាពសូវៀត។ ប្រទេសស៊ុយអែត បានបដិសេធមិនចូលជាសមាជិកដោយសារគោលនយោបាយអព្យាក្រឹត ដែលខ្លួនមានចាប់ពីសតវត្សរ៍ ១៨០០ មក។ រីឯប្រទេសហ្វាំងឡង់ បានប្រកាន់ជំហរអព្យាក្រឹតដោយសារខ្លួនធ្លាប់ធ្វើសង្គ្រាមជាមួយសហភាពសូវៀត កាលពីសម័យសង្គ្រាមលោកលើកទី២ ហើយមិនចង់ចូលជាសមាជិកសម្ព័ន្ធភាពយោធា ដោយព្រួយបារម្ភថា ការធ្វើបែបនេះនឹងធ្វើឱ្យភាពតានតឹងកើនឡើង។
អង្គការណាតូត្រូវបានបង្កើតក្រោយសង្គ្រាមលោកលើកទី២ ដើម្បីផ្ដល់ការការពារសមូហភាពដល់សមាជិក ពោលគឺប្រសិនបើសមាជិកមួយរងការវាយប្រហារសមាជិកទាំងអស់ត្រូវមកការពារ។ ប្រទេសរុស្ស៊ី ចាត់ទុកអង្គការនេះជាការគំរាមកំហែងផ្ទាល់ ហើយប្រធានាធិបតីរុស្ស៊ីលោក វ្ល៉ាឌីមៀរ ពូទីន បាននិយាយថា ការទាមទារសមាជិកភាពរបស់អ៊ុយក្រែន គឺជាហេតុផលចម្បងមួយនៃការសម្រេចចិត្តរបស់លោកក្នុងការចាប់ផ្ដើមសង្គ្រាមពេលបច្ចុប្បន្ន។
ក្រសួងការបរទេសរុស្ស៊ីបានព្រមានរួចទៅហើយថា ប្រសិនបើស៊ុយអែត និងហ្វាំងឡង់ចូលជាសមាជិកណាតូ នោះនឹងមាន «ផលវិបាកខាងនយោបាយ និងយោធាធ្ងន់ធ្ងរ»។
អ្នកគាំទ្រការចូលជាសមាជិកអង្គការណាតូ បានចង្អុលទៅកាន់ការលុកលុយប្រទេសអ៊ុយក្រែនថា ជាឧទាហរណ៍នៃគ្រោះថ្នាក់ប្រទេសជិតខាងរុស្ស៊ីកំពុងប្រឈមមុខ ហើយការចូលជាសមាជិកនឹងជួយឱ្យប្រទេសទាំងនេះចៀសវាងកុំឱ្យរឿងនេះកើតឡើងទៅលើពួកគេ។
អ្នកវិភាគមួយចំនួនក៏និយាយថា អង្គការណាតូ និងសមាជិកពួកគេក៏នឹងទទួលផលប្រយោជន៍ពីការចូលជាសមាជិកនៃប្រទេសស៊ុយអែត និងហ្វាំងឡង់ផងដែរ។ បើទោះបីជាប្រទេសទាំង ២មានចំនួនប្រជាជនតិច ពួកគេមានយោធាដ៏មានសមត្ថភាពធៀបនឹងទំហំចំនួនប្រជាជន។
បន្ថែមពីលើនេះទីតាំងប្រទេសទាំង ២ ក៏ផ្ដល់សមត្ថភាពឱ្យអង្គការណាតូ ដើម្បីដាក់ទ័ពនៅភាគខាងជើងប្រទេសរុស្ស៊ី។
ប៉ុន្តែអ្នករិះគន់មួយចំនួនព្រួយបារម្ភថា ការធ្វើបែបនេះគឺនឹងធ្វើឱ្យលោក ពូទីន ធ្វើការសងសឹកនៅចំពេលដែលលោកអាចមានចិត្តឆេវឆាវដោយសារសង្គ្រាមអ៊ុយក្រែន។ អ្នកខ្លះទៀតនិយាយថា ការពង្រីករបស់អង្គការណាតូ នឹងបង្កើនឱកាសផ្ទុះជម្លោះដែលអាចឈានដល់សង្គ្រាមលោក។
អ្នកខ្លះផ្សេងទៀតនិយាយថា មិនគួរមានសម្ព័ន្ធភាពយោធាដូចណាតូទេ។ អ្នកស្ដាំនិយមជ្រុលនិយាយថា ការចូលជាសមាជិកនៃប្រទេសតូចៗ នឹងធ្វើឱ្យពួកគេឈប់បំពេញកាតព្វកិច្ចរបស់ពួកគេ ដោយសំអាងថា ប្រទេសធំៗនឹងមកជួយការពារខ្លួន។ រីឯអ្នកនៅខាងឆ្វេងនិយមជ្រុលនិយាយថា ការបង្កើនកងកម្លាំងយោធាជាជាងការបង្កើនចលនាអហិង្សា គឺចុងក្រោយនឹងបង្កផលប៉ះពាល់ ដល់សន្តិភាពពិភពលោក៕
វីដេអូ៖
