អ្នកស្រុកនៅទីក្រុងប៉េកាំង មានការភ័យស្លន់ស្លោក្នុងការទិញតេស្តកូវីដស្ដុកទុក ក្រោយអាជ្ញាធរ បានប្រកាសកាលពីថ្ងៃអាទិត្យ ថា អ្នកស្រុកនៅក្នុងសង្កាត់ដ៏ធំបំផុតរបស់ទីក្រុងប៉េកាំងគឺ Chaoyang ឥឡូវនេះ តម្រូវឱ្យធ្វើតេស្ត ៣ ដងក្នុង១សប្តាហ៍ ដើម្បីពន្យឺតការរីករាលដាលនៃមេរោគនេះ។
អ្នកស្រុកនៅទីក្រុងប៉េកាំង បានចាប់ផ្តើមទិញគ្រឿងទេស និងទំនិញសំខាន់ៗស្ដុកទុក ដោយភ័យខ្លាចថា ពួកគេ នឹងត្រូវឆ្លងកាត់ស្ថានភាពបិទខ្ទប់ស្រដៀង នឹងទីក្រុងសៀងហៃ មានរយៈពេលយូររហូតដល់ទៅ ៤ សប្ដាហ៍ទៅហើយ។ យោងតាមសារព័ត៌មាន Reuters អ្នកស្រុកដើរទិញឥវ៉ាន់ស្តុកទុកដូចជា បន្លែ សាច់ស្រស់ មី និងក្រដាសបង្គន់ជាដើម។
តម្រូវការគ្រឿងទេសតាមផ្សារ និងសេវាកម្មគ្រឿងទេសតាមអ៊ីនធឺណិត កើនឡើងខ្ពស់ជាខ្លាំង។ ដោយផ្សារទំនើប Carrefour និង Wumart បាននិយាយថា ពួកគេបានបង្កើនសារពើភ័ណ្ឌទ្វេដងខណៈពេលដែលសេវាកម្មដឹកជញ្ជូន Meituan ក៏បានបង្កើនចំនួនបុគ្គលិករបស់ ពួកគេដែរ។
ទោះជាយ៉ាងណា ក៏ដោយ មជ្ឈមណ្ឌលហិរញ្ញវត្ថុរបស់ទីក្រុងប៉េកាំង កំពុងជួបប្រទះនឹងបញ្ហាផ្គត់ផ្គង់ដ៏សំខាន់ ដោយសារតែខ្វះអ្នកនាំសំបុត្រ ដើម្បីធ្វើការដឹកជញ្ជូន។
ទោះបីជាមាន ការជូនដំណឹងក៏ដោយ ក៏ការរឹតត្បិតកូវីដរបស់ទីក្រុងប៉េកាំង មានភាពធូ ស្រាលជាងបើប្រៀបធៀបទៅនឹងតំបន់ផ្សេងទៀតនៅក្នុងប្រទេសចិន ដោយសាលារៀន ហាង និងការិយាល័យ ភាគច្រើននៅ Chaoyang នៅតែបើក ទោះបីជា មានករណី កើនឡើងក៏ដោយ៕
វីដេអូ៖