កាលពីថ្ងៃអង្គារ ទី ២៦ មេសា រដ្ឋាភិបាលប្រទេសម៉ុលដាវី បានរៀបចំកិច្ចប្រជុំសន្តិសុខអាសន្ន បន្ទាប់ពីមានការផ្ទុះជាច្រើននៅតំបន់ផ្ដាច់ខ្លួនគាំទ្រដោយរុស្ស៊ី ប៉ុន្មានថ្ងៃបន្ទាប់ពីឧត្ដមសេនីយ៍រុស្ស៊ី ១ រូបហាក់ដូចជាឱ្យតម្រុយថា ប្រទេសនេះគឺជាគោលដៅលុកលុយថ្មីបន្ទាប់ពីអ៊ុយក្រែន។
ការផ្ទុះយ៉ាងតិចណាស់ ២ បានកើតឡើងនៅអង់តែនវិទ្យុភាសារុស្ស៊ីមួយនៅក្រុងម៉ៃអាកនៃតំបន់ផ្ដាច់ខ្លួនត្រង់នីស្ត្រៀ ដែលនៅជាប់ព្រំដែនជាមួយប្រទេសអ៊ុយក្រែន។ ការផ្ទុះនេះបានកើនឡើង១ ថ្ងៃ បន្ទាប់ពីទីស្ដីការក្រសួងសន្តិសុខរដ្ឋរបស់ក្រុមផ្ដាច់ខ្លួន ត្រង់នីស្ត្រៀ បានរងការវាយប្រហារដោយរ៉ុកែ្កតបាញ់ពីស្មា។
អាជ្ញាធរក្រុមផ្ដាច់ខ្លួនក៏និយាយថា កងកម្លាំងយោធារបស់ពួកគេក៏បានរងការវាយប្រហារផងដែរ។ ពួកគេមិនបានបញ្ចេញព័ត៌មានលម្អិតអំពីឧប្បត្តិហេតុនេះទេ ប៉ុន្តែបានប្រកាស «ការ គំរាមកំហែងភេរវកម្មកម្រិតក្រហម» ហើយបានសន្យាអនុវត្តវិធានការសន្តិសុខបន្ថែមទៀត។ វិមានក្រឹមឡាំងក៏បានដឹងអំពីការផ្ទុះនេះដែរដោយអ្នកនាំពាក្យរដ្ឋាភិបាលរុស្ស៊ីលោក ឌីមីទ្រី ប៉េស្កូវ បាននិយាយថា ស្ថានភាពនេះ «ធ្វើឱ្យមានការព្រួយបារម្ភ» កម្រិតខ្ពស់បំផុត។
ជាការឆ្លើយតបប្រធានាធិបតីម៉ុលដាវី លោកស្រី ម៉ាយ៉ា សាន់ឌូ បានកោះហៅប្រជុំក្រុមប្រឹក្សាសន្តិសុខប្រទេសលោកស្រី៕