ក្រុមបំបែកខ្លួនប៉ាគីស្ថាន កាលពីថ្ងៃពុធ បានព្រមានថា ខ្លួននឹងវាយប្រហារ ដោយហិង្សាទៅលើតំបន់គោលដៅរបស់ចិន ១ ថ្ងៃ បន្ទាប់ពីអ្នកបំផ្ទុះគ្រាប់បែកអត្តឃាតម្នាក់់់ បានសម្លាប់គ្រូបង្រៀនជនជាតិចិន ៣ នាក់ ដែលធ្វើដំណើរពីទីក្រុងប៉េកាំងទៅកាន់ទីក្រុងការ៉ាជីភាគខាងត្បូង។
កងទ័ពរំដោះ Baloch បានអះអាងទទួលខុសត្រូវ ចំពោះការវាយប្រហារ ដែលបានសម្លាប់គ្រូបង្រៀនជនជាតិចិន ៣ នាក់ និងអ្នកបើកបរជនជាតិប៉ាគីស្ថានម្នាក់នៅជិតច្រកទ្វារវិទ្យាស្ថានខុងជឺនៃសាកលវិទ្យាល័យការ៉ាជី ក្រោយអ្នកបំផ្ទុះគ្រាប់បែកស្រីម្នាក់បានបំផ្ទុះគ្រឿងផ្ទុះនៅក្បែររថយន្តក្រុងរបស់ពួកគេ។
អ្នកនាំពាក្យក្រុមនេះ លោក Jeeyand Baloch បាននិយាយនៅក្នុងសេចក្តីថ្លែងការណ៍មួយថា៖ «សមាជិកប្រុសស្រីរាប់រយនាក់ ដែលបានទទួលការបណ្តុះបណ្តាលខ្ពស់នៃកងពលតូច Majeed របស់កងទ័ពរំដោះ Baloch បានត្រៀមខ្លួនរួចជាស្រេចក្នុងការវាយប្រហារយ៉ាងសាហាវនៅក្នុងផ្នែកណាមួយនៃ Balochistan និងប៉ាគីស្ថាន»។
អ្នកនាំពាក្យ បានគំរាមទីក្រុងប៉េកាំងថា នឹងវាយប្រហារកាន់តែធ្ងន់ធ្ងរជាងនេះ លុះត្រាតែ ពេលណាចិនបញ្ឈប់គម្រោងកេងប្រវ័ញ្ច និងការកាន់កាប់រដ្ឋប៉ាគីស្ថាន។
ជនជាតិចិន អាជីវកម្ម និងការវិនិយោគភាគច្រើន ជាគោលដៅរបស់ពួកបំបែកខ្លួននៅ Balochistan ជាកន្លែង ដែលទីក្រុងប៉េកាំងចូលរួមនៅក្នុងគម្រោងរុករករ៉ែ និងថាមពល។ ក្រុមយុទ្ធជនផ្តាច់ខ្លួន Baloch បានប្រយុទ្ធ ដើម្បីកាន់កាប់ធនធានធម្មជាតិនៃខេត្តរបស់ពួកគេអស់ជាច្រើនទសវត្សរ៍មក ហើយ ដែលភាគច្រើនផ្តោតលើការវាយប្រហារលើគម្រោងឧស្ម័នធម្មជាតិ ហេដ្ឋារចនាសម្ព័ន្ធ និងកងកម្លាំងសន្តិសុខ៕