ការផ្ទុះជាច្រើនត្រូវបានគេរាយការណ៍នៅព្រឹកព្រលឹមថ្ងៃពុធ ទី ២៧ មេសា ក្នុងខេត្តរុស្ស៊ីចំនួន៣ ជាប់ព្រំដែនជាមួយអ៊ុយក្រែន ខណៈដែលអគ្គិភ័យ បានកើតឡើងនៅឃ្លាំងគ្រាប់រំសេវមួយក្នុងខេត្តបែលហ្គោរ៉ូដនៅក្នុងអំឡុងពេលតែមួយ។
អភិបាលខេត្តបែលហ្គោរ៉ូដលោកវីយ៉ាសស្លាវ ក្លាដកូវ និយាយថា មិនមានជនស៊ីវិលណាម្នាក់រងរបួសក្នុងអគ្គិភ័យនេះទេ ដែលក្រោយមកត្រូវបានពន្លត់។ ខេត្តបែលហ្គោរ៉ូដមានព្រំដែនជាប់ជាមួយខេត្តលូហានស្ក៍ ស៊ូមី និងការកៀវ របស់អ៊ុយក្រែន ដែលជាសមរភូមិក្ដៅបំផុត ចាប់តាំងពីរុស្ស៊ីចាប់ផ្ដើមការលុកលុយកាលពី២ខែមុន។
កាលពីដើមខែនេះ រុស្ស៊ីបានចោទប្រកាន់អ៊ុយក្រែនថា បានបញ្ជូនឧទ្ធម្ភាគចក្រទៅវាយប្រហារឃ្លាំងប្រេងឥន្ធនៈ និងភូមិមួយចំនួនក្នុងខេត្តនេះ។ អ៊ុយក្រែននៅមិនទាន់ទទួលស្គាល់ ឬច្រានចោលការចោទប្រកាន់នេះនៅឡើយទេ។
ផ្សេងពីនេះនៅខេត្តឃឺស្ក៍ ដែលនៅជាប់ព្រំដែនអ៊ុយក្រែន មានការរាយការណ៍អំពីការផ្ទុះនៅព្រឹកព្រលឹមពីលើក្រុងឃឺស្ក៍។ ក្រោយមកអាជ្ញាធរបានរាយការណ៍ថាសំឡេងផ្ទុះទាំងនេះគឺជាសំឡេងប្រព័ន្ធការពារដែនអាកាស ដែលកំពុងបាញ់ទម្លាក់យន្តហោះគ្មានមនុស្សបើករបស់អ៊ុយក្រែន។ រីឯនៅខេត្តវ៉ូរ៉ូនហ្ស ដែលក៏ជាប់ព្រំដែនជាមួយអ៊ុយក្រែន មន្ត្រីរុស្ស៊ីនៅទីនោះបានរាយការណ៍ថាពួកគេបានឮការផ្ទុះចំនួន ២ ហើយពួកគេ កំពុងធ្វើការស៊ើបអង្កេតរកប្រភព។
រដ្ឋាភិបាលរុស្ស៊ីនិយាយថា ពួកគេនឹងបញ្ជូនអ្នកស៊ើបអង្កេតទៅក្រុងឃឺស្ក៍ និងក្រុងវ៉ូរ៉ូនហ្ស ដើម្បីកត់ត្រាអ្វីដែលពួកគេហៅថា «សកម្មភាពខុសច្បាប់របស់កងទ័ពអ៊ុយក្រែន»។
លោកមីខាអ៊ីឡូ ផូដូលយ៉ាក ទីប្រឹក្សារបស់ប្រធានាធិបតីអ៊ុយក្រែន បាននិយាយថាការវាយប្រហារនេះគឺជាការសង «កម្ម» ចំពោះការលុកលុយរបស់រុស្ស៊ី។ លោកនិយាយថា ការទប់ទល់ការឈ្លានពានរុស្ស៊ីគឺមិនគ្រប់គ្រាន់ទេ «ដូច្នេះហើយការរំសាយអាវុធនៅឃ្លាំងរបស់ឃាតករនៅ បែលហ្គោរ៉ូដ និងវ៉ូរ៉ូនហ្ស គឺជាដំណើរធម្មជាតិ។ កម្មពៀរគឺឃោរឃៅណាស់»៕
វីដេអូ៖