.jpg)
ប្រធានាធិបតីចិន លោក ស៊ី ជីនភីង។ រូបថត AFP
ក្នុងការថ្លែងសុន្ទរកថានៅវេទិកាក្រុងបូអាវកាលពីថ្ងៃទី ២១ ខែមេសា ប្រធានាធិបតីចិនលោកស៊ី ជីនភីង បានដាក់ចេញនូវគំនិតផ្ដួចផ្ដើមសន្តិសុខពិភពលោកថ្មីមួយ ដែលច្រានចោលជិតគំនិតសង្គ្រាមត្រជាក់ ដែលជំនួសមកវិញទាមទារឱ្យមានសន្តិសុខ «រួមទូលំទូលាយ សហការ និងប្រកបដោយចីរភាព»។
គំនិតនៃយន្តការសន្តិសុខ ដែលគ្របដណ្ដប់លើពិភពលោកទាំងមូល គឺស្ដាប់ទៅហាក់ដូចជាអ្វីដែលអធិរាជសម័យបុរាណចិនបានស្នើឡើង។ មន្ត្រីការទូតបរទេសប្រចាំប្រទេសចិន គឺកំពុងសម្ពាធពីរដ្ឋាភិបាលពួកគេឱ្យបកស្រាយអត្ថន័យសម្ដីរបស់លោក ស៊ី ប៉ុន្តែពួកគេកំពុងមានការលំបាកដោយសារការថ្លែងរបស់លោក ស៊ី គឺពោរពេញទៅដោយពាក្យមានតែក្នុងភាសាចិន និងឃ្លាន័យធៀប។
បើតាមប្រភពមួយចំនួន គំនិតរបស់លោក ស៊ី គឺកំពុងត្រូវបានពិចារណាដោយប្រទេសអ៊ុយក្រែន។ ទំនាក់ទំនងរវាងលោក ស៊ី និងប្រធានាធិបតីរុស្ស៊ីលោក វ្ល៉ាឌីមៀរ ពូទីន គឺមិនត្រូវបានស្វាគមន៍ដោយក្រុងកៀវទេ ប៉ុន្តែពួកគេដឹងថា ក្រុងប៉េកាំងមានឥទ្ធិពលមួយលើក្រុងម៉ូស្គូ ហើយសង្ឃឹមថា អាចជួយដល់បទឈប់បាញ់។
បន្ទាប់ពីការថ្លែងរបស់លោកស៊ី អ្នកនាំពាក្យក្រសួងការបរទេសចិនលោក វ៉ាង វិប៊ីន បាននិយាយបន្ថែមទៀត អំពីគំនិតផ្ដួចផ្ដើមសន្តិសុខសកលនេះនៅក្នុងសន្និសីទព័ត៌មានប្រចាំថ្ងៃ ប៉ុន្តែពាក្យរបស់លោកមិនបានបន្ថែមព័ត៌មានលម្អិតអំពីអ្វីដែលចិនចង់ធ្វើនោះទេ។
«ជាមួយនឹងការកើនឡើងនៃការគំរាមកំហែង បង្កការឡើងដោយឯកតោភាគីនិយម អនុត្តរភាព និងនយោបាយអំណាច ហើយក៏រួមមានការកើនឡើងនូវឱនភាពនៃសន្តិភាព សន្តិសុខ ទំនុកចិត្ត និងអភិបាលកិច្ច។ មនុស្សជាតិកំពុងប្រឈមមុខនឹងបញ្ហាពិបាកគ្រប់គ្រង និងការគំរាមកំហែងសន្តិសុខកាន់តែច្រើនឡើង» លោក វ៉ាង និយាយបែបនេះ ហើយបន្តទៀតថា៖ «លោកប្រធានាធិបតី ស៊ី ជីនភីង បានស្នើគំនិតផ្ដួចផ្ដើមសន្តិសុខពិភពលោក ដោយមានអនាគតរបស់មនុស្សជាតិទាំងអស់ក្នុងចិត្ត។ គំនិតផ្ដួចផ្ដើមនេះគឺជាគុណសម្បត្តិសាធារណៈសកលមួយទៀតដែលផ្តល់ដោយប្រទេសចិន និងជាការបង្ហាញដ៏រស់រវើកនៃចក្ខុវិស័យនៃសហគមន៍ដែលមានអនាគតរួមគ្នាសម្រាប់មនុស្សជាតិក្នុងវិស័យសន្តិសុខ»។
អ្នកវិភាគមួយចំនួននិយាយថានេះវាក្យស័ព្ទចិនធម្មតារបស់ចិន ដោយក្រុងប៉េកាំងតែងតែធ្វើសំណើដែលមានក្របខ័ណ្ឌធំខ្លាំង ដែលគ្មាននរណាម្នាក់ជំទាស់ ពោលគឺបើទោះបីជាប្រទេសណាមួយមិនយល់ព្រមដោយអស់ពីចិត្តក៏ដោយ យ៉ាងហោចណាស់ពួកគេក៏មិនប្រឆាំងទាំងស្រុងនោះទេ។ បន្ទាប់មកពួកគេនឹងប្រើក្របខ័ណ្ឌនេះបន្តិចម្ដងៗដើម្បីប្រឆាំងសហរដ្ឋ អាមេរិក។
ការរិះគន់របស់ចិនអំពីឯកតោភាគីនិយម និងអនុត្តរភាព ជាធម្មតាគឺសំដៅទៅលើសហរដ្ឋ អាមេរិក។លោកស៊ី ស្រមៃថាអាមេរិកនឹងចុះខ្សោយបន្តិចម្ដងៗ ដែលចុងក្រោយនឹងត្រូវជំនួសដោយពិភពពហុប៉ូលនិយម ដោយមានចិនជាតួអង្គសំខាន់។
ការប្រកាសគំនិតចុងក្រោយរបស់ប្រធានាធិបតីរូបនេះក៏ហាក់ដូចជាសម្រាប់ប្រជាជនប្រទេសចិនផងដែរ ខណៈពេលដែលលោក ស៊ី ចង់ពង្រឹងការគាំទ្រនៅក្នុងស្រុក មុនសម័យប្រជុំពេញអង្គនៃសមាជគណបក្សកុម្មុយនីស្តចិននៅចុងឆ្នាំនេះ ដោយមានការរំពឹងយ៉ាងទូលំទូលាយថាលោកនឹងព្យាយាមប្រជែងដើម្បីបន្តកាន់អំណាចក្នុងអាណត្តិទី៣។
យ៉ាងណាមិញតម្រុយដ៏ធំមួយនៅក្នុងការគិតរបស់លោកស៊ី ជុំវិញការប្រកាសគំនិតនេះ គឺការចុះកិច្ចព្រមព្រៀងសន្តិសុខរវាងប្រទេសចិន និងកោះសូឡូម៉ុងនៅភាគខាងត្បូងមហាសមុទ្រប៉ាស៊ីហ្វិក។ កិច្ចព្រមព្រៀងនេះត្រូវបានចុះមិនយូរប៉ុន្មានមុនការថ្លែងសុន្ទរកថារបស់លោកស៊ីកាលពីថ្ងៃទី ២១ មេសា។
ខ្លឹមសារលម្អិតនៃកិច្ចព្រមព្រៀងនេះមិនត្រូវបានចេញផ្សាយជាសាធារណនោះទេ ប៉ុន្តែគេជឿជាក់ថាយ៉ាងហោចណាស់លក្ខខណ្ឌអនុញ្ញាតឱ្យមានការដាក់ពង្រាយទាហាន ឬនាវាចម្បាំងចិនទៅកាន់កោះនេះ។ កិច្ចព្រមព្រៀងនេះបានបង្កឱ្យមានប្រតិកម្មយ៉ាងខ្លាំងពីសហរដ្ឋអាមេរិក ដែលនិយាយថាវានឹងអនុញ្ញាតឱ្យយោធាចិនពង្រីកខ្លួនដល់ភាគខាងត្បូងមហាសមុទ្រប៉ាស៊ីហ្វិក។
គំនិតផ្ដួចផ្ដើមមកកាន់សមុទ្រប៉ាស៊ីហ្វិកនេះក៏អាចទាក់ទងនឹងការជាប់គាំងនៃគំនិតផ្ដួចផ្ដើមខ្សែក្រវាត់ និងផ្លូវ ដោយសារសង្គ្រាមអ៊ុយក្រែន។ កិច្ចខិតខំប្រឹងប្រែងបង្កើតបណ្ដាញសេដ្ឋកិច្ចទៅពីទ្វីបអាស៊ីទៅកាន់ទិសខាងលិចបានជាប់គាំងដោយសារការលុកលុយរបស់រុស្ស៊ី ដូច្នេះឥឡូវនេះ ចិនកំពុងងាកមើលសមុទ្រប៉ាស៊ីហ្វិកនៅទិសខាងកើតខ្លួនវិញ៕
