ប្រមាណ ៧០ ភាគរយនៃក្រុមហ៊ុនធំរបស់អាស៊ីបានបាត់បង់តម្លៃភាគហ៊ុនរបស់ពួកគេក្នុងរយៈពេល ២ ខែដំបូងនៃការលុកលុយរបស់រុស្ស៊ីទៅលើអ៊ុយក្រែន ខណៈពេលវិនិយោគិនមានការភ័យខ្លាចអំពីវិបត្តិសេដ្ឋកិច្ចចេញពីសង្គ្រាមនេះ និងការបិទខ្ទប់កូវីដ ១៩ យ៉ាងតឹងរ៉ឹងនៅមជ្ឈមណ្ឌលឧស្សាហកម្មរបស់ប្រទេសចិន។
តម្លៃក្រុមហ៊ុនបច្ចេកវិទ្យាធំៗ ដូចជា Tencent Holdings, Taiwan Semiconductor Manufacturing Company, និង Samsung បានធ្លាក់ចុះខណៈពេលដែលតម្លៃវត្ថុធាតុដើមកើនឡើង ហើយខ្សែចង្វាក់ផ្គត់ផ្គង់កំពុងប្រឈមមុខជាមួយនឹងបញ្ហាជាច្រើន។ ប៉ុន្តែតម្លៃភាគហ៊ុននៃក្រុមហ៊ុនថាមពល និងទំនិញនៅប្រទេសឥណ្ឌា ថៃ និងម៉ាឡេស៊ី បានកើនឡើង ខណៈពេលដែលតម្លៃផលិតផលរបស់ពួកគេកើនឡើង។
ទស្សនាវដ្ដី Nikkei Asia បានធ្វើការប្រៀបធៀបទិន្នន័យភាគហ៊ុនរបស់ក្រុមហ៊ុនអាស៊ីធំៗរវាងថ្ងៃទី ២៣ កុម្ភៈ ១ ថ្ងៃមុនការចាប់ផ្ដើមការលុកលុយរបស់រុស្ស៊ី ដល់ថ្ងៃទី ២២ ខែមេសា។ គេរកឃើញថា ក្នុងចំណោមក្រុមហ៊ុនចំនួន ៦២៧ ដែលមានតម្លៃលើសពី ១០ ពាន់លានដុល្លារ ៣១ ភាគរយបានឃើញការកើនឡើងតម្លៃ ខណៈពេលដែល ៦៩ ភាគរយបានបាត់បង់តម្លៃក្នុងរយៈពេល ២ ខែនេះ។
មុនសង្គ្រាមកើតឡើង ទីផ្សារហិរញ្ញវត្ថុបានរងផលប៉ះពាល់រួចទៅហើយ ដោយការផ្លាស់ប្ដូរគោលនយោបាយរូបិយវត្ថុរបស់អាមេរិកឱ្យតឹងរ៉ឹងជាងមុន ខណៈពេលដែលពួកគេកំពុងទប់ទល់នឹងការកើនអត្រាអតិផរណាក្នុងអំឡុងពេលងើបឡើងវិញពីវិបត្តិកូវីដ ១៩។ ការលុកលុយរបស់រុស្ស៊ី បានបង្កការភ័យខ្លាចនៅលើទីផ្សារអន្តរជាតិ ប៉ះពាល់ដោយផ្ទាល់លើប្រទេសដែលមានទំនាក់ទំនងសេដ្ឋកិច្ចជិតស្និទ្ធជាមួយរុស្ស៊ីហើយបង្កឱ្យមានការកើនឡើងតម្លៃថាមពល និងស្រូវសាឡី។
អត្រាកំណើនសេដ្ឋកិច្ចរបស់ប្រទេសចិន កំពុងធ្លាក់ជាមួយនឹងអត្រាកំណើននៃការនាំចេញមិនរីកចម្រើន ដោយមានការកើនជិតដល់សូន្យភាគរយកាលពីខែមីនា។ ស្របពេលជាមួយគ្នានេះ សហរដ្ឋអាមេរិកបានបង្កើនអត្រាការប្រាក់របស់ខ្លួនដើម្បីទប់ទល់នឹងការកើនឡើងអត្រាអតិផរណា ប៉ុន្តែការធ្វើបែបនេះក៏បានដាក់ការរឹតបន្តឹងលើទីផ្សារបំណុលពិភពលោក ដែលនឹងរារាំងកំណើនសេដ្ឋកិច្ច។
ភាគហ៊ុនធំៗរបស់ចិនបានដឹកនាំការធ្លាក់ចុះក្នុងតំបន់សម្រាប់រយៈពេល ២ ខែចុងក្រោយនេះ។ តម្លៃក្រុមហ៊ុនកក់មធ្យោបាយធ្វើដំណើរ DiDi Global ដែលកំពុងស្ថិតក្នុងដំណើរដកខ្លួនចេញពីទីផ្សារភាគហ៊ុនក្រុងញូវយ៉កបានធ្លាក់ចុះ ៥៩ ភាគរយដែលជាការធ្លាក់ចុះខ្លាំងបំផុតក្នុងចំណោមក្រុមហ៊ុនទាំង ៦២៧។ ក្រុមហ៊ុនពាណិជ្ជកម្មអេឡិចត្រូនិក JD.com បានធ្លាក់ចុះ ២៧ ភាគរយ ក្រុមហ៊ុន Tencent និងក្រុមហ៊ុន Alibaba Group បានធ្លាក់ចុះ ២៣ ភាគរយ។
តម្លៃភាគហ៊ុនបច្ចេកវិទ្យាទាំងនេះ គឺក្នុងចំណោមភាគហ៊ុនងាយរងគ្រោះបំផុតពីការកើនឡើងអត្រាការប្រាក់ ដោយការធ្វើបែបនេះ គឺនឹងបន្ទាបតម្លៃប្រាក់ចំណូលនាពេលអនាគតរបស់ពួកគេ។ ក៏ប៉ុន្តែការរឹតបន្តឹងគោលនយោបាយរូបិយវត្ថុ គឺមិនមែនជាកត្តាតែមួយគត់ប៉ុណ្ណោះទេ ដែលបង្កឱ្យមានការធ្លាក់ចុះបែបនេះ។
បើក្រឡេកមើលដំបូងវិបត្តិជំងឺកូវីដ ១៩ វិធានការបិទខ្ទប់ និងវិធានការដាក់កម្រិតលើការធ្វើដំណើរ គឺគួរតែបង្កើនតម្រូវការសម្រាប់សេវាកម្មឌីជីថល ដូចជាគេហទំព័រពាណិជ្ជកម្មអេឡិចត្រូនិក ហើយធ្វើឱ្យក្រុមហ៊ុនទាំងនេះមានកំណើនតម្លៃ ប៉ុន្តែស្ថានភាពជាក់ស្ដែងគឺផ្ទុយពីនេះ។ អ្នកវិភាគមួយចំនួននិយាយថា វិធានការដ៏តឹងរ៉ឹងរបស់រដ្ឋាភិបាលក្រុងប៉េកាំងដើម្បីទប់ទល់នឹងការឆ្លងជំងឺកូវីដ ១៩ បានរារាំងយ៉ាងខ្លាំងទៅលើវិស័យខ្សែចង្វាក់ផ្គត់ផ្គង់ និងដឹកជញ្ជូន ដូច្នេះបើទោះបីជាមានការកើនឡើងតម្រូវការក៏ដោយ ក្រុមហ៊ុនទាំងនេះក៏មិនអាចបំពេញការងាររបស់ខ្លួនបានទេ។ អ្នកវិភាគមួយចំនួននិយាយថា ការភ័យខ្លាចថា ប្រទេសចិនមិនអាចបំពេញគោលដៅកំណើនសេដ្ឋកិច្ចរបស់ខ្លួន ក៏ធ្វើឱ្យវិនិយោគិនមួយចំនួនបោះបង់ភាគហ៊ុនចិនផងដែរ។
នៅក្រៅប្រទេសចិន ក្រុមហ៊ុន SEA របស់សិង្ហបុរី ដែលប្រឈមមុខនឹងការខាតបង់រួចទៅហើយបានធ្លាក់ចុះ ២៧ ភាគរយបន្ថែមទៀត ខណៈពេលដែលក្រុមហ៊ុនហ្គេមអនឡាញ និងពាណិជ្ជកម្មអេឡិចត្រូនិកនេះកំពុងប្រឈមនឹងការកើនឡើងនៃអត្រាការប្រាក់។ ក្រុមហ៊ុន TSMC របស់តៃវ៉ាន់បានធ្លាក់ចុះ ១១ ភាគរយ ក្រុមហ៊ុន Samsung របស់កូរ៉េខាងត្បូងបានធ្លាក់ចុះ ៨ ភាគរយ ក្នុងរយៈពេល ២ ខែ បន្ទាប់ពីការចាប់ផ្ដើមនៃសង្គ្រាមអ៊ុយក្រែន។
កាលពីខែមុនក្រុមហ៊ុន Samsung បានផ្អាកការដឹកជញ្ជូនទូរស័ព្ទ និងផលិតផលដទៃទៀតទៅប្រទេសរុស្ស៊ី ខណៈពេលដែលពួកគេចូលរួមជាមួយក្រុមហ៊ុនលោកខាងលិចក្នុងការដកខ្លួនចេញពីប្រទេសនេះ។ ការបិទខ្ទប់ទីក្រុងសៀងហៃ ក៏បានបង្កឱ្យប៉ះពាល់ដល់ខ្សែចង្វាក់ផ្គត់ផ្គង់របស់ក្រុមហ៊ុននេះដែរ។
ស្របពេលជាមួយគ្នានេះក្រុមហ៊ុនដែលមើលឃើញការកើនឡើងតម្លៃភាគហ៊ុន គឺក្រុមហ៊ុនក្នុងវិស័យថាមពល និងទំនិញសំខាន់ៗ។
ក្រុមហ៊ុន Adani Total Gas របស់ឥណ្ឌាបានទទួលផលប្រយោជន៍ខ្ពស់ជាងគេ ដោយមានកំណើនតម្លៃរហូតដល់ ៤៩ ភាគរយឯណោះ។ ក្រុមហ៊ុននេះផ្ដល់សេវាផ្គត់ផ្គង់ឧស្ម័នធម្មជាតិទៅឱ្យភ្ញៀវអតិថិជនដូចជារោងចក្រ និងប្រជាជនទូទៅ។ នៅប្រទេសថៃក្រុមហ៊ុនប្រេង PTT Exploration and Production បានឃើញការកើនឡើង ១៤ ភាគរយ ខណៈពេលដែលក្រុមហ៊ុនប្រេង Petronas របស់រដ្ឋម៉ាឡេស៊ី បានកើនឡើង ១២ ភាគរយ។
ក្រុមហ៊ុនឥណ្ឌូនេស៊ី Astra International ដែលមានមុខរបរជាច្រើនចាប់ពីការផលិតរថយន្ត ជីករ៉ែធ្យូងថ្ម រហូតដល់ការចម្រាញ់ប្រេងដូងបានឃើញកើនឡើងតម្លៃរហូតដល់ ២៥ ភាគរយ។ ការកើនតម្លៃរបស់ក្រុមហ៊ុន Astra គឺបង្កដោយសារការកើនឡើងតម្រូវការសម្រាប់ធ្យូងថ្ម និងប្រេងដូង។
ស្ថានភាពរបស់ក្រុមហ៊ុន Astra គឺត្រូវបានគេចាត់ទុកជារង្វាស់សម្រាប់សេដ្ឋកិច្ចរបស់ឥណ្ឌូនេស៊ី ដោយក្រុមហ៊ុននេះមានពាក់ព័ន្ធនឹងវិស័យសំខាន់ស្ទើរទាំងអស់របស់ប្រទេសនេះ។ ពិតណាស់សូចនាករទីផ្សារភាគហ៊ុនរបស់ឥណ្ឌូនេស៊ីបានកើនឡើង ៤ ភាគរយក្នុងរយៈពេល ២ ខែ ដែលប្រសើរជាងប្រទេសជិតខាងរបស់ខ្លួន៕
វីដេអូ៖