.jpg)
មន្ត្រីនៅលោកខាងលិច កំពុងជជែកវែកញែកអំពីផែនការរបស់វិមានក្រឹមឡាំងដែលមិនព្រមព្យាយាមបញ្ឈប់បរទេសមិនឱ្យដឹកជញ្ជូនអាវុធទៅអ៊ុយក្រែន និងបង្កើតជាមន្ទិលថា តើលោក ពូទីន កំពុងរៀបគម្រោងវាយលុកកាន់តែធំជាងមុនឬ យ៉ាងណា?
តាមអ្នកវិភាគយោធា និងមន្ត្រីបស្ចិមប្រទេសមួយចំនួន រុស្ស៊ីអាចនឹងវាយលុកផ្លូវដែក ផ្លូវថ្នល់និងស្ពានរបស់អ៊ុយក្រែនកាន់តែខ្លាំងជាងមុន ដើម្បីព្យាយាមរារាំងមិនឱ្យមានការដឹកជញ្ជូនសព្វាវុធលោកខាងលិចទៅឱ្យទាហានជួរមុខ។ ប្រទេសនេះអាចនឹងទម្លាក់គ្រាប់បែកលើហេដ្ឋារចនាសម្ព័ន្ធជាច្រើនជុំវិញរដ្ឋធានី Kyiv ដើម្បីបង្កការលំបាកដល់មេដឹកនាំលោកខាងលិចមិនឱ្យទៅជួបប្រធានាធិបតីVolodymyr Zelensky ដើម្បីសហការគ្នារកដំណោះស្រាយ។
បន្ថែមពីនេះប្រទេសនេះក៏គ្រោងនឹងធ្វើទុកបុកម្នេញលោកខាងលិចតាមរយៈការវាយប្រហារតាមអ៊ីនធឺណិតការបំផ្លិចបំផ្លាញឬការកាត់ផ្តាច់ការនាំចេញថាមពលទៅកាន់អឺរ៉ុបជាដើម។
សប្តាហ៍ដំបូងនៃសង្រ្គាមបានបង្ហាញយ៉ាងច្បាស់ថា យោធារបស់រុស្ស៊ីមានសមត្ថភាពតិចជាងអ្វីដែលខ្លួនបានអួតអាងមុនពេលការលុកលុយ។ ប៉ុន្តែ មន្ត្រីអាមេរិកនិងអឺរ៉ុប ក៏និយាយ ដែរថាលោក ពូទីន ហាក់ដូចជាមានការប្រុងប្រយ័ត្នគួរឱ្យកត់សម្គាល់ក្នុងប៉ុន្មានសប្តាហ៍ថ្មីៗនេះ ដោយគេសង្កេតឃើញមានការវាយលុកយឺតៗនៅភាគខាងកើតអ៊ុយក្រែនដែលជាវិធីសាស្រ្តរារាំងក្នុងការដកយកហេដ្ឋារចនាសម្ព័ន្ធអ៊ុយក្រែន និងចៀសវាងសកម្មភាពដែលអាចបង្កើនជម្លោះជាមួយណាតូ។
ភាពអត់ធ្មត់និងការវាយលុកសន្សឹមៗរុស្ស៊ីហាក់ផ្ទុយស្រឡះនឹងអ្វីដែលរុស្ស៊ីប្រកាសក្នុងទូរទស្សន៍រដ្ឋដែលថា ទីក្រុងម៉ូស្គូ កំពុងជាប់ប្រយុទ្ធជាមួយលោកខាងលិចនិងនឹងអាចប្រើប្រាស់អាវុធនុយក្លេអ៊ែរប្រសិនបើអាច។
បញ្ហាដែលគេកំពុងបារម្ភពេលនេះគឺថា សង្រ្គាមបច្ចុប្បន្នអាចនឹងធ្វើឱ្យ ពូទីន ប្តូរស្នៀតហើយធ្វើឱ្យសង្រ្គាមកាន់តែធ្ងន់ធ្ងរជាងមុនឬយ៉ាងណា? នោះហើយជាសំណួរបន្ទាន់គួរឆ្ងល់ជាពិសេសមុនពេលទិវាជ័យជំម្នះក្នុងប្រទេសរុស្ស៊ី នៅថ្ងៃចន្ទ សប្តាហ៍ក្រោយ ដែលជាទូទៅលោក ពូទីន តែងធ្វើជាអធិបតីក្នុងក្បួនដង្ហែដ៏ធំដែលបង្ហាញពីជ័យជំម្នះរបស់សូវៀតលើពួកណាស៊ីអាល្លឺម៉ង់និងថ្លែងសុន្ទរកថាបែបយោធានិយម។
លោក Ben Wallace រដ្ឋមន្ត្រីក្រសួងការពារជាតិអង់គ្លេសបានព្យាករកាលពីសប្តាហ៍មុនថាលោក ពូទីន នឹងប្រើសុន្ទរកថានេះ ដើម្បីប្រកាសសង្គ្រាមជាផ្លូវការ និងប្រមូលផ្តុំប្រជាជនរុស្ស៊ីយ៉ាងច្រើនក្នុងប្រទេស។
មន្ត្រីអាមេរិក និងអឺរ៉ុបបាននិយាយថា ក្បួនយោធាលើគោកដែលនឹងបង្ហាញពីការជំរុញឱ្យមានយោធាធំនៅថ្ងៃចន្ទ សប្ដាហ៍ក្រោយឬឆាប់ៗនេះ ជាក្បួនធំបំផុតហើយ។មន្ត្រីដដែលនេះក៏រំពឹងថាអ៊ុយក្រែននឹងបង្កើតយុទ្ធនាការសន្សឹមៗតែរឹងមាំដើម្បីការពារខ្លួន ហើយអ្វីដែលថា លោកពូទីន អាចប្រើសុន្ទរកថាដើម្បីប្រកាសសង្រ្គាមកាន់តែទូលំទូលាយ និងប្រឹងប្រែងឱ្យកាន់តែរឹងមាំបន្ថែមទៀតនោះវាមិនអាចកើតឡើងទេ។
សម្រាប់ពេលនេះលោក ពូទីន ហាក់ដូចជាស្ថិតក្នុងទម្រង់នៃការកាន់យោធាមួយដែលអនុញ្ញាតឱ្យអ៊ុយក្រែនប្រមូលផ្តុំឡើងវិញនិងស្តុកទុកអាវុធរបស់លោកខាងលិច។កាលពីថ្ងៃ ចន្ទមន្ត្រីជាន់ខ្ពស់មន្ទីរបញ្ចកោណបានហៅការវាយលុកចុងក្រោយបង្អស់របស់រុស្ស៊ីនៅភាគខាងកើតអ៊ុយក្រែនថា «ការវាយលុកបែបប្រយ័ត្នប្រយែងប៉ុន្តែក្ដៅគគុក»។
នៅប្រទេសរុស្ស៊ី ឯណោះវិញ សាធារណជនមានការរអ៊ូរទាំថា យោធាកំពុងប្រយុទ្ធដោយដៃ ម្ខាង ហើយយុទ្ធសាស្ត្រនិងគោលបំណងនៃការធ្វើសឹកក៏មើលមិនយល់ដែរ។
លោក Dmitri Trenin ប្រធានមជ្ឈមណ្ឌល Carnegie Moscow បាននិយាយក្នុងបទសម្ភាស តាមទូរស័ព្ទពីខាងក្រៅក្រុងម៉ូស្គូថា៖ «នេះគឺជាសង្រ្គាមដ៏ចម្លែកនិងពិសេស។ រុស្ស៊ី បានកំណត់កម្រិតតឹងរ៉ឹងសម្រាប់ខ្លួនឯងហើយគ្មានអ្នកណាអាចពន្យល់បានដែរទើបបានជាពលរដ្ឋរុស្ស៊ីមានការងឿងឆ្ងល់ជាខ្លាំង»។
គួរបញ្ជាក់ផងដែរថា លោក Trenin គឺជាអ្នកវិភាគម្នាក់ក្នុងចំណោមអ្នកវិភាគផ្សេងទៀតមកពីក្រុមអ្នកវិភាគស្ថានភាពសង្គ្រាមរុស្ស៊ី ក៏ពិបាកនឹងពន្យល់ថាតើហេតុអ្វីបានជាវិមានក្រឹមឡាំងប្រយុទ្ធប្រើកម្លាំងតែពាក់កណ្តាល?
លោកបានសួរថា ហេតុអ្វីបានជារុស្ស៊ីមិនទម្លាក់គ្រាប់បែកបន្ថែមលើស្ពាន និងបណ្តាញផ្លូវដែកខណៈលោកខាងលិចកំពុងផ្គត់ផ្គង់ និងចែកចាយយោធាដល់អ៊ុយក្រែនយ៉ាងសន្ធឹកសន្ធាប់ រាល់ថ្ងៃ? ហេតុអ្វីបានជាមេដឹកនាំលោកខាងលិចដូចជា ប្រធានសភាលោកស្រី Nancy Pelosi នៅថ្ងៃអាទិត្យ នៅតែអាចទៅទស្សនាទីក្រុង Kyiv ដោយសុវត្ថិភាព?
អស់រយៈពេលជាច្រើនសប្តាហ៍មកហើយក្រុមមន្ត្រីនៅទីក្រុងវ៉ាស៊ីនតោនបានពិភាក្សាអំពីមូលហេតុដែលយោធារុស្ស៊ីមិនមានភាពឆេវឆាវឬព្យាយាមបំផ្លាញខ្សែផ្គត់ផ្គង់អាវុធរបស់លោកខាងលិចចូលទៅក្នុងអ៊ុយក្រែន។ចម្លើយមួយ គឺថាការការពារដែនអាកាសរបស់អ៊ុយក្រែននៅតែ បន្តគំរាមកំហែងយន្តហោះរុស្ស៊ីដូច្នេះប្រសិនបើយន្តហោះរុស្ស៊ីចូលកាន់តែជ្រៅចូលទៅក្នុង អ៊ុយក្រែនឱកាសដែលត្រូវគេបាញ់ទម្លាក់កាន់តែច្រើន។
បន្ថែមពីនេះ រុស្ស៊ីក៏កំពុងប្រឈមជាមួយបញ្ហាគ្រាប់រំសេវរបស់ខ្លួនដែរ (ពោលគឺកាំជ្រួចឬរ៉ុក្កែតជាមួយនឹងប្រព័ន្ធណែនាំ) ដោយសព្វាវុធទាំងនោះបានបរាជ័យក្នុងការដាក់ដំណើរការឱ្យបានត្រឹមត្រូវហើយការផ្គត់ផ្គង់អាវុធរបស់រុស្ស៊ីក៏នៅមានកម្រិតដែរ។ដោយសារភាពមិនប្រាកដប្រជានេះហើយ ទើបការវាយប្រហារលើផ្លូវដែកឬក្បួននានាមិនអាចប្រព្រឹត្តទៅដោយ ប្រសិទ្ធភាពនោះទេ៕
វីដេអូ៖
