.jpg)
ប្រធានាធិបតីស្រីលង្កា លោក Gotabaya Rajapaksa។ រូបថត AFP
ប្រធានាធិបតីស្រីលង្កា លោក Gotabaya Rajapaksa បានប្រកាសដាក់ប្រទេសក្នុងភាពអាសន្នកាលពីថ្ងៃសុក្រ បន្ទាប់ពីមានការតវ៉ាអូសបន្លាយពេល និងកូដកម្មលើកោះ បណ្ដាលឱ្យមានការបិទសាលារៀន អាជីវកម្ម និងសេវាកម្មដឹកជញ្ជូន។
ការប្រកាសភាពអាសន្ននេះ នឹងអនុញ្ញាតឱ្យមានការចាប់ខ្លួនអ្នកតវ៉ាដែលបិទផ្លូវ ហើយវិធានការនេះត្រូវតែអនុម័តដោយសភាស្រីលង្កាក្នុងរយៈពេល ១៤ ថ្ងៃ។
ប្រទេសនេះត្រូវប្រឈមនឹង ភាពរង្គោះរង្គើ ដោយសារភាពចលាចលស៊ីវិលចាប់តាំងពីខែមីនា មកម្ល៉េះ ដោយសារមានការតវ៉ាជាច្រើនដងជុំវិញការដោះស្រាយវិបត្តិសេដ្ឋកិច្ចរបស់ប្រទេស ដែលមិនត្រឹមត្រូវតាមភាពជាក់ស្តែងរបស់រដ្ឋាភិបាល ដែលក្រោយមកបង្កទៅជាហិង្សា។
កាលពីថ្ងៃសុក្រ ប៉ូលិសបានបាញ់ឧស្ម័នបង្ហូរទឹកភ្នែកទៅលើបាតុករនៅជិតសភាក្នុងរដ្ឋធានីកូឡុំបូ។ ការដាក់ប្រទេសក្នុងភាពអាសន្នបានទាក់ទាញការរិះគន់ពីមនុស្សមួយចំនួន ដោយមេដឹកនាំគណបក្សប្រឆាំង Sajith Premadasa បាននិយាយថា វិធានការនេះ ដំណើរការផ្ទុយទៅនឹងការស្វែងរកដំណោះស្រាយចំពោះវិបត្តិណាមួយ។
ក្រុមអ្នកតវ៉ាបានទាមទារឱ្យលោក Rajapaksa លាលែងពីតំណែង ដោយមានការមិនពេញចិត្ត ដោយសារមានការឡើងថ្លៃខ្ពស់លើម្ហូបអាហារ ប្រេងឥន្ធនៈ និងសម្ភារចាំបាច់ផ្សេងទៀត ខណៈដែលរដ្ឋាភិបាលគ្រប់គ្រងលុយរដ្ឋមិនបានល្អ។
នៅសប្តាហ៍នេះ រដ្ឋមន្ត្រីហិរញ្ញវត្ថុស្រីលង្កា Ali Sabry បានសារភាពថា ទុនបម្រុងហិរញ្ញវត្ថុរបស់ប្រទេស គឺជិតអស់ហើយ។ ប្រទេសនេះបានអំពាវនាវទៅកាន់មូលនិធិរូបិយវត្ថុអន្តរជាតិសម្រាប់ការផ្តល់ហិរញ្ញប្បទានសង្គ្រោះបន្ទាន់៕
វីដេអូ៖
