ទីក្រុងម៉ាកាវ ដែលធ្លាប់ជាឋានសួគ៌អ្នកល្បែង ត្រូវប្រឈមនឹងការរឹតបន្តឹងលើមេរោគឆ្លង ក្នុងរយៈពេល ២ ឆ្នាំចុងក្រោយនេះ បណ្ដាលឱ្យភ្ញៀវមិនហ៊ានចូលមកទីក្រុង បន្សល់តែភាពស្ងាត់ជ្រងំ។
ម៉ាកាវ គឺជាទីក្រុងតែមួយគត់ នៅលើដីចិន ដែលអនុញ្ញាតឱ្យកាស៊ីណូស្របច្បាប់ និងសេរីក្រោមគោលការណ៍ ប្រទេសមួយប្រព័ន្ធពីរ។ ទីក្រុងនេះ ក្លាយជាគោលដៅសម្រាប់ភ្ញៀវទេសចររាប់លាននាក់ និងអ្នកលេងល្បែងជាច្រើន នៅឆ្នាំ២០១៣ ទឹកដីតូចមួយនេះ បានរកចំណូលលើសទីក្រុងឡាសវេហ្គាសអាមេរិក និងក្លាយជាមជ្ឈមណ្ឌលហ្គេម ដែលមានជាងគេបំផុតរបស់ពិភពលោក។
បច្ចុប្បន្ន ទីក្រុងប៉េកាំង គេឃើញមានការព្រួយបារម្ភជុំវិការលាងលុយកខ្វក់ និងទុនចល័ត ខណៈទីក្រុងនេះទៀតសោត កំពុងស្វែងរកការស្ដាកេរ្តិ៍ឈ្មោះរបស់ខ្លួនឡើងវិញ និងគ្រប់គ្រងឧស្សាហកម្មសសរស្តម្ភឱ្យបានល្អផងដែរ។
លោក Sonny Lo អ្នកនិពន្ធនៃ "Casino Capitalism, Society and Politics in Macao" និយាយថា៖ «ទីក្រុងប៉េកាំង នឹងសម្អាតឧស្សាហកម្មកាស៊ីណូទាំងមូល។ មូលធននិយមកាស៊ីណូ អាចបន្តបាន ប៉ុន្តែត្រូវតែធ្វើឡើងក្នុងលក្ខណៈស្អាតស្អំ វាអាចបន្តក្នុងលក្ខខណ្ឌ ដែលម៉ាកាវត្រូវតែធ្វើពិពិធកម្មសេដ្ឋកិច្ចរបស់ខ្លួន»។
សំណើ ដែលស្នើឡើង ចំពោះការរៀបចំច្បាប់ហ្គេមនៅដើមឆ្នាំ បង្ហាញពីការរង្គោះរង្គើដ៏ធំបំផុតទៅកាន់មជ្ឈមណ្ឌលល្បែងដ៏ធំបំផុតរបស់ពិភពលោក និងប៉ះពាល់ដល់ប្រាក់ចំណូលខ្លាំងបំផុត ក្នុងរយៈពេល ២ទសវត្សរ៍កន្លងមក។ អាជ្ញាប័ណ្ណហ្គេម នឹងនៅរក្សាត្រឹម ៦ឆ្នាំដដែល ប៉ុន្តែសិទ្ធិប្រតិបត្តិការ នឹងត្រូវកាត់បន្ថយពាក់កណ្តាលមកនៅត្រឹម ១០ ឆ្នាំ។
ដើម្បីសម្រួលដល់ម្ចាស់សម្បទាន អាជ្ញាធរបានច្រានចោលសំណើមុន សម្រាប់មន្ត្រីរដ្ឋាភិបាល ដើម្បីត្រួតពិនិត្យ ដោយផ្ទាល់នូវប្រតិបត្តិការប្រចាំថ្ងៃរបស់កាស៊ីណូ។ ប៉ុន្តែសេចក្តីព្រាងច្បាប់ដំបូង ដែលមានចំនួន ៤៤ទំព័រ បង្ហាញ កាលពីខែមករា ឆ្នាំនេះ បានបញ្ជាក់យ៉ាងច្បាស់ថា ឧស្សាហកម្មនេះនឹងស្ថិតនៅក្រោមការត្រួតពិនិត្យយ៉ាងតឹងរ៉ឹង។
ម្ចាស់សម្បទានហ្គេមទាំង ៦ រួមមាន Sands China, Wynn Macau និង MGM China Holdings ក៏បានស្វាគមន៍ ចំពោះសេចក្តីព្រាងច្បាប់ទាំងនេះដែរ ប៉ុន្តែនៅក្រោមស្បៃមុខនៃការដឹងគុណនេះ វិនិយោគិន និងនាយកប្រតិបត្តិហ្គេម បានរង់ចាំយ៉ាងអន្ទះសារសម្រាប់សេចក្តីព្រាងច្បាប់ចុងក្រោយ។
ប្រទេសចិន បានព្រមានម្តងហើយម្តងទៀតថា លំហូរចេញមូលធន និងការលេងល្បែងស៊ីសងខុសច្បាប់ គឺជាការគំរាមកំហែងដល់សន្តិសុខសេដ្ឋកិច្ច និងស្ថិរភាពសង្គមរបស់ខ្លួន នៅពេលដែលមូលនិធិល្បែងស៊ីសងជាង ១៤៩,៣៥ពាន់លានដុល្លារ ចាកចេញពីប្រទេសជារៀងរាល់ឆ្នាំ។ នេះបើយោងតាមលោក Liao Jinrong មន្ត្រីសន្តិសុខសាធារណៈជាន់ខ្ពស់។
បន្ថែមពីនេះ ប្រធានាធិបតីចិនលោក Xi Jinping ថែមទាំងបានជំរុញឱ្យម៉ាកាវផ្តោតលើការធ្វើពិពិធកម្មសេដ្ឋកិច្ចរបស់ខ្លួនឱ្យបានត្រឹមត្រូវផងដែរ។ ដូច្នេះ ម៉ាកាវក៏បានស្ដាប់តាមការណែនាំនេះ។
នៅពេល ដែលសេចក្តីព្រាងច្បាប់ស្តីពីល្បែង ត្រូវបានដាក់បញ្ចូលទៅក្នុងសភានីតិបញ្ញត្តិ ក្នុងខែមករា លោក Lei Wai Nong លេខាធិការសេដ្ឋកិច្ច និងហិរញ្ញវត្ថុ បានសង្កត់ធ្ងន់ថា ការអភិវឌ្ឍន៍ និងការលើកកម្ពស់ធាតុ ដែលមិនមែនជាហ្គេម នឹងដើរតួយ៉ាងសំខាន់ ក្នុងដំណើរការដេញថ្លៃឡើងវិញ។ យ៉ាងណាមិញ គេមិនហ៊ានធានា ចំពោះការបន្តអាជ្ញាប័ណ្ណហ្គេម សម្រាប់ប្រតិបត្តិករទាំង ៦ ទេ។
សំណើព្រាងនៅខែមករា គួបផ្សំនឹងបរិយាកាសអរិភាព ត្រូវបានគេរំពឹងថា នឹងកាត់បន្ថយចំណូលពីការលេងហ្គេម VIP ៩០% បើប្រៀបធៀបទៅនឹងកម្រិតមុនការរាតត្បាត។ ប៉ុន្តែយោងទៅតាមការកត់សម្គាល់ ដោយលោក Vitaly Umansky អ្នកវិភាគលើវិស័យនេះបាននិយាយថា៖ «ការផ្លាស់ប្តូរ នេះគឺ មានប្រយោជន៍ សម្រាប់ឧស្សាហកម្មរយៈពេលវែង ដោយប្រាក់ចំណូលហ្គេម នឹងមានស្ថេរភាពជាងមុន និងតិចជាងចំណូលពីហ្គេមសព្វដង»។
អតីតនាយកប្រតិបត្តិ និងអ្នកវិភាគបាននិយាយថា នៅពេលដែលកាស៊ីណូផ្លាស់ប្តូរ ការផ្តោតអារម្មណ៍របស់ពួកគេទៅកាន់ទីផ្សារដ៏ធំ ការធ្វើពិពិធកម្ម នឹងកើតឡើងតាមធម្មជាតិ។ ការវិនិយោគរបស់ Nongaming នឹងត្រូវបានជំរុញបន្ថែមទៀត ហើយទម្ងន់នៃឧស្សាហកម្មហ្គេម នឹងថយចុះ។
លោកសាស្ត្រាចារ្យ Wang Changbin នាយកមជ្ឈមណ្ឌលសម្រាប់ការសិក្សាហ្គេម និងទេសចរណ៍នៅវិទ្យាស្ថានពហុបច្ចេកទេសម៉ាកាវ បាននិយាយថា៖ «ហ្គេមកាស៊ីណូ គឺដូចគ្នានៅគ្រប់កាស៊ីណូ វាគឺជាកត្តាដ៏ល្អសម្រាប់ធាតុ ដែលមិនលេងល្បែង ដើម្បីជាការជំរុញដល់ការធ្វើពិពិធកម្មសេដ្ឋកិច្ច»៕