នៅពេលដែលសង្គ្រាមនៅអ៊ុយក្រែន កាន់តែក្តៅគគុក សហភាពអឺរ៉ុប បានរៀបចំសន្និសីទអ្នកផ្តល់ជំនួយអន្តរជាតិជាលើកទី៦ សម្រាប់ប្រទេសស៊ីរី អ្នកជំនាញបាននិយាយថា បញ្ហានៅស៊ីរី មិនគួរមើលរំលងឡើយ។
ប្រធានគោលនយោបាយការបរទេសរបស់ប្លុក លោក Josep Borrell បាននិយាយថា៖ «ឥឡូវនេះ ម្នាក់ៗ យកចិត្តទុកដាក់តែលើបញ្ហានៅអ៊ុយក្រែន តែទោះយ៉ាងណា កុំបោះបង់ចោលស៊ីរីអី។ សង្គ្រាមរយៈពេល ១១ឆ្នាំកន្លងមក បានបំផ្លាញជីវិតរបស់ប្រជាជនស៊ីរី ហើយបណ្តាលឱ្យប្រជាជន ៩០% ស៊ីរីបន្តរស់នៅក្នុងភាពក្រីក្រ»។
លោកបានបន្ថែមទៀតថា៖ «សង្គ្រាមនៅរុស្ស៊ី នឹងបង្កើនតម្លៃអាហារ និងថាមពល ហើយស្ថានភាពនៅស៊ីរី នឹងកាន់តែអាក្រក់ទៅៗ»។
ប្រទេសចំនួន ៥៥ និងអង្គការអន្តរជាតិចំនួន ២២ រួមទាំងអង្គការសហប្រជាជាតិ ស្ថាប័នសហភាពអឺរ៉ុប និងរដ្ឋជាសមាជិកសហភាពអឺរ៉ុប បានចូលរួមក្នុងសន្និសីទម្ចាស់ជំនួយ ដែលរៃអង្គាសប្រាក់បានចំនួន $៦,៧ ពាន់លានសម្រាប់ស៊ីរី និងជនភៀសខ្លួន ដែលកំពុង តែជ្រកកោននៅតាមប្រទេស ជិតខាងរបស់ខ្លួន ពោលគឺច្រើនជាងឆ្នាំមុន $៦,៤ ពាន់លាន។ សហព័ន្ធរុស្ស៊ី ដែលជាតួអង្គសំខាន់ក្នុងជម្លោះក្នុងប្រទេសស៊ីរី មិនត្រូវបានអញ្ជើញឱ្យចូលរួមក្នុងសន្និសីទនោះទេ។
គួររំឭកផងដែរថា រុស្ស៊ី គឺជាសម្ព័ន្ធមិត្តដ៏រឹងមាំរបស់ប្រធានាធិបតីស៊ីរី Bashar Assad ចាប់តាំងពីឆ្នាំ ២០១១ នៅពេលដែលជម្លោះ បានចាប់ផ្តើម ហើយនៅតែបន្តគាំទ្រប្រតិបត្តិការយោធារបស់របបស៊ីរី។ ទីក្រុងម៉ូស្គូ បាននិយាយម្តងហើយម្តងទៀតថា សកម្មភាពរបស់ខ្លួនផ្តោតលើតែសកម្មភាពភេរវករ ក្នុងប្រទេសស៊ីរីប៉ុណ្ណោះ តែអង្គការសហប្រជាជាតិ បានចោទប្រកាន់រុស្ស៊ីថា ចូលរួមដោយផ្ទាល់ក្នុងការទម្លាក់គ្រាប់បែកលើតំបន់ជនស៊ីវិល និងប្រព្រឹត្តឧក្រិដ្ឋកម្មសង្គ្រាមរួមគ្នាជាមួយរបបស៊ីរី។
ប្រធានគោលនយោបាយការបរទេសរបស់សហភាពអឺរ៉ុបបានសង្កត់ធ្ងន់ថា ព្រឹត្តិការណ៍ម្ចាស់ជំនួយកាលពីថ្ងៃអង្គារ គឺដើម្បីឱ្យប្រទេសទាំងអស់ ដែលចូលរួមក្នុងសន្និសីទនេះយល់ថា អឺរ៉ុបនឹងមិនបន្ធូរបន្ថយទណ្ឌកម្ម ឬធ្វើឱ្យទំនាក់ទំនងរវាងរុស្ស៊ី និងរបបស៊ីរី មានលក្ខណៈធម្មតាឡើយ រហូតដល់មានការប្តេជ្ញាចិត្តប្រាកដប្រជាណាមួយ សម្រាប់កំណែទម្រង់នយោបាយ នៅស៊ីរី។
អង្គការមនុស្សធម៌បារម្ភថា ការធ្វើឱ្យរុស្ស៊ីឯកោពីសន្និសីទ អាចប៉ះពាល់ដល់កិច្ចប្រឹងប្រែងជំនួយមនុស្សធម៌ ជាពិសេសនៅភាគពាយព្យ នៃប្រទេសស៊ីរី។
ក្នុងកិច្ចប្រជុំអនុគណៈកម្មាធិការសភាតំណាងរាស្ត្រអាមេរិក ក្នុងខែមីនា ឆ្នាំនេះ ក្រុមអ្នកតស៊ូមតិជំនួយមនុស្សធម៌បានគូសបញ្ជាក់ថា រុស្ស៊ីអាចបិទបណ្តាញជំនួយមនុស្សធម៌ចុងក្រោយរបស់អង្គការសហប្រជាជាតិរបស់ស៊ីរី ជាការសងសឹកចំពោះស្ថានការណ៍តានតឹងជាមួយលោកខាងលិច ជុំវិញសង្គ្រាមនៅអ៊ុយក្រែន។
ក្រុមប្រឹក្សាសន្តិសុខអង្គការសហប្រជាជាតិ ក៏បានគ្រប់គ្រងបណ្តាញជំនួយមនុស្សធម៌ឆ្លងព្រំដែនចំនួន ៤ ចូលទៅក្នុងប្រទេសស៊ីរី ក្នុងឆ្នាំ ២០១៤។
រុស្ស៊ី និងចិន បានប្រើអំណាចវេតូរបស់អង្គការសហប្រជាជាតិ ដើម្បីបញ្ឈប់បណ្តាញចំនួន ៣ ក្នុងចំណោមបណ្តាញទាំងនេះ ខណៈក្រុងម៉ូស្គូ តែងលើកឡើងថា ជំនួយមនុស្សធម៌ ដែលមិនឆ្លងកាត់បណ្តាញរបស់របបស៊ីរីគួរតែបញ្ឈប់។
បច្ចុប្បន្ន មានតែប៉ុស្តិ៍ជំនួយមនុស្សធម៌ឆ្លងព្រំដែន ដែលកំណត់ ដោយអង្គការសហប្រជាជាតិ ១ ប៉ុណ្ណោះ គឺច្រក Bab al-Hawa ដែលនៅភាគពាយព្យនៃប្រទេសស៊ីរី ត្រូវបានអនុញ្ញាតឱ្យដំណើរការដល់ខែកក្កដា ឆ្នាំ២០២២ ក្រោយរុស្ស៊ី បានសម្របសម្រួលនៅក្រុមប្រឹក្សាសន្តិសុខអង្គការសហប្រជាជាតិ នាឆ្នាំមុន។
តំបន់ Idlib របស់ស៊ីរី ដែលជាកន្លែងដឹកជំនួយ ត្រូវបានគ្រប់គ្រង ដោយក្រុមឧទ្ទាមស៊ីរី និងសម្ព័ន្ធជីហាដ Hayat Tahrir al-Sham។ ប្រជាជនប្រហែល ៤ លាននាក់ រស់នៅក្នុងតំបន់នេះ និងប្រមាណជាង ២,៦ លាននាក់ គឺជាជនជាតិស៊ីរី ដែលផ្លាស់ទីលំនៅក្នុងស្រុក ពឹងផ្អែកលើជំនួយមនុស្សធម៌ពីអង្គការសហប្រជាជាតិ និងអង្គការក្រៅរដ្ឋាភិបាល ដែលគាំទ្រដោយអង្គការសហប្រជាជាតិតាមរយៈប្រទេសតួកគី។
អ្នកស្រី Juliette Touma ប្រធានផ្នែកតស៊ូមតិប្រចាំតំបន់សម្រាប់អង្គការយូនីសេហ្វ នៅមជ្ឈិមបូព៌ា ប្រាប់សារព័ត៌មាន DW ថា ការឆ្លងកាត់ព្រំដែននេះ ដើម្បីផ្តល់ជំនួយមនុស្សធម៌តាមរយៈតួកគី ដល់កុមារជិត ១លាននាក់ នៅភាគពាយព្យស៊ីរី និងអ្នកដែលពឹងផ្អែកលើជំនួយឆ្លងដែនស្ទើរទាំងស្រុង។
ចំពេលមានការភ័យខ្លាចក្រុងម៉ូស្គូបិទប៉ុស្តិ៍ឆ្លងកាត់នេះ អង្គការមនុស្សធម៌អន្តរជាតិ ក្នុងខែកក្កដា បានគូសបញ្ជាក់ផងដែរថា៖ «បច្ចុប្បន្ន យើងមិនទាន់មានដំណោះស្រាយជំនួយមនុស្សធម៌ដល់ប្រជាជន ដែលងាយរងគ្រោះរាប់លាននាក់ នៅភាគពាយព្យប្រទេសស៊ីរីទេ»។
តែយ៉ាងណាក្ដី ប្រធានគោលនយោបាយការបរទេសរបស់សហភាពអឺរ៉ុបមានសុទិដ្ឋិនិយមថា រុស្ស៊ី នឹងមិនពិចារណាបញ្ឈប់ការឆ្លងកាត់ជំនួយនោះទេ ព្រោះវានឹងធ្វើឱ្យជីវិតមនុស្សជាង ១ លាននាក់ឱ្យស្ថិតក្នុងស្ថានភាពធ្ងន់ធ្ងរ។
លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិនិយាយថា បានពិភាក្សាជាមួយអនុរដ្ឋមន្ត្រីការបរទេសតួកគី ពីដំណោះស្រាយឆ្លងព្រំដែននៅតំបន់ Idlib និងគម្រោងផ្តោតលើសន្តិសុខផងដែរ៕
វីដេអូ៖