.jpg)
ប្រធានាធិបតីហ្វាំងឡង់ លោក Niinisto ធ្វើសន្និសីទកាសែត កាលពីថ្ងៃទី ១៥ ខែឧសភា ដើម្បីប្រកាសថា ប្រទេសរបស់លោកនឹងស្នើសុំចូលជាសមាជិករបស់អង្គាការណាតូ។
ប្រធានាធិបតីហ្វាំងឡង់ លោក Sauli Niinisto និយាយបញ្ជាក់ កាលពីថ្ងៃអាទិត្យថា ប្រទេសរបស់លោកនឹងដាក់ពាក្យសុំចូលជាសមាជិកនៃសម្ព័ន្ធមិត្តយោធាណាតូ នៅក្នុងការផ្លាស់ប្តូរគោលនយោបាយជាប្រវត្តិសាស្ត្រ ដែលការសម្រេចនេះ ត្រូវបានជំរុញដោយការលុកលុយរបស់រុស្ស៊ីលើអ៊ុយក្រែន។
រុស្ស៊ីដែលមានព្រំដែនជាង ១ ៣០០ គីឡូម៉ែត្រ ជាប់ហ្វាំងឡង់ និយាយថា ជំហាននេះ នឹងក្លាយជាកំហុសមួយ សម្រាប់ទីក្រុងហែលស៊ិនគី ក្នុងការចូលរួមជាមួយសម្ព័ន្ធភាពឆ្លងអាត្លង់ទិក ដែលមានសមាជិកចំនួន ៣០ប្រទេស ហើយវានឹងធ្វើឱ្យប៉ះពាល់ដល់ទំនាក់ទំនងទ្វេភាគី។
ស៊ុយអែតក៏ត្រូវបានគេរំពឹងថា នឹងធ្វើតាមផងដែរ ខណៈដែលការគាំទ្រសាធារណៈលើសមាជិកភាពណាតូ កើនឡើងចំពេលមានការព្រួយបារម្ភអំពីសុវត្ថិភាព។
ការប្រកាសកាលពីថ្ងៃអាទិត្យ ធ្វើឡើង បន្ទាប់ពីលោក Niinisto និងនាយករដ្ឋមន្ត្រីអ្នកស្រី Sanna Marin និយាយកាលពីថ្ងៃព្រហស្បតិ៍ថា ខ្លួនពេញចិត្តសមាជិកភាពរបស់អង្គការណាតូ ដោយផ្តល់ភ្លើងខៀវថា ប្រទេសនេះនឹងដាក់ពាក្យចូល។
លោក Niinisto ប្រាប់អ្នកយកព័ត៌មាន ក្នុងវិមានប្រធានាធិបតី នៅទីក្រុងហែលស៊ិនគីថា៖ «ថ្ងៃនេះ យើង ដែលជាប្រធានាធិបតី និងគណៈកម្មាធិការគោលនយោបាយការបរទេសរបស់រដ្ឋាភិបាល បានសម្រេចចិត្តរួមគ្នាថា ប្រទេសហ្វាំងឡង់នឹងដាក់ពាក្យសុំចូលជាសមាជិកណាតូ»។
លោក Niinisto ទូរស័ព្ទទៅមេដឹកនាំរុស្ស៊ីលោក វ៉្លាឌីមៀ ពូទីន (Vladimir Putin) កាលពីថ្ងៃសៅរ៍ដើម្បីប្រាប់អំពីផែនការរបស់ហ្វាំងឡង់ ក្នុងការចូលរួមសម្ព័ន្ធភាព។ លោកពូទីននិយាយថា ទង្វើបែបនេះនឹងប៉ះពាល់ដល់ទំនាក់ទំនងរុស្ស៊ី-ហ្វាំងឡង់។
ប្រធានាធិបតីហ្វាំងឡង់ ក៏សម្តែងការត្រៀមខ្លួន ដើម្បីជួបពិភាក្សាជាមួយសមភាគីតួកគីលោក Tayyip Erdogan បន្ទាប់ពីទីក្រុងអង់ការ៉ា បានលើកឡើងពីការជំទាស់ ចំពោះការចូលរួមជាមួយណាតូរបស់ប្រទេសនៅតំបន់ណ័រឌិក។ ក្នុងនាមជាសមាជិកណាតូ តួកគីអាចវេតូការដាក់ពាក្យនេះបាន។
លោក Niinisto និយាយថា៖ «អ្វីដែលយើងត្រូវការនៅពេលនេះ គឺជាចម្លើយដ៏ច្បាស់លាស់។ ខ្ញុំត្រៀមខ្លួនរួចជាស្រេច ក្នុងការពិភាក្សាថ្មីមួយជាមួយប្រធានាធិបតី លោក Erdogan អំពីបញ្ហា ដែលលោកបានលើកឡើង»៕
ហួន ឌីណា
