កាលពីថ្ងៃចន្ទ ទី ១៦ ឧសភា ប្រធានាធិបតីប្រទេសតួកគី បានបង្កភាពស្មុគស្មាញ ក្នុងសំណើសុំសមាជិកភាពអង្គការណាតូរបស់ស៊ុយអែត និងហ្វាំងឡង់ ដោយនិយាយថា លោកមិនអាចអនុញ្ញាតឱ្យពួកគេចូលជាសមាជិកសម្ព័ន្ធភាពយោធាបានទេ ដោយសារតែប្រទេសទាំង ២ ហាក់ដូចជា អសកម្មចំពោះក្រុមឧទ្ទាមជនជាតិឃឺដ ដែលតួកគីចាត់ទុកជាក្រុមភេរវកម្ម។
លោកប្រធានាធិបតីរ៉េសិប តៃយីប អេរដូហ្គែន (Recep Tayyip Erdogan) បានលើកឡើងម្ដងទៀតអំពីជំហររបស់លោក ក្នុងការជំទាស់សំណើរបស់ប្រទេសទាំង ២ ដើម្បីចូលជាសមាជិកអង្គការណាតូ។ សមាជិកបច្ចុប្បន្នទាំង ៣០ របស់អង្គការណាតូ ត្រូវតែយល់ព្រម ដើម្បីបើកទ្វារឱ្យមានការចូលសមាជិកថ្មី។
លោក អេរដូហ្គែន បានថ្លែងប្រាប់អ្នកសារព័ត៌មាន ប៉ុន្មានម៉ោងបន្ទាប់ពីប្រទេសស៊ុយអែត ប្រកាសថា ពួកគេនឹងចូលរួមជាមួយប្រទេសហ្វាំងឡង់ ក្នុងការដាក់ពាក្យស្នើសមាជិកភាពអង្គការណាតូ ដែលជាការបញ្ចប់ជំហរអព្យាក្រឹត្យ និងមិនចូលបក្សសម្ព័ន្ធជាង ២០០ ឆ្នាំរបស់ខ្លួន បន្ទាប់ពីការឈ្លានពានរបស់រុស្ស៊ីទៅលើប្រទេសអ៊ុយក្រែន។ លោកចោទប្រកាន់ប្រទេសទាំង ២ បានបរាជ័យ ក្នុងការធ្វើបត្យាប័ន «ភេរវករ» ដែលរដ្ឋាភិបាលលោកចង់ចាប់ខ្លួន។ លោកនិយាយថា៖ «ប្រទេសទាំង ២ មិនមានជំហរបើកចំហ ឬច្បាស់លាស់ប្រឆាំងអង្គការភេរវករទេ»។
ស៊ុយអែតបានឱ្យដឹងថា ពួកគេនឹងបញ្ជូនក្រុមមន្ត្រីការទូតទៅកាន់ក្រុងអង់ការ៉ា ដើម្បីពិភាក្សាលើបញ្ហានេះ ប៉ុន្តែលោកអេរដូហ្គែន និយាយថា ពួកគេកំពុងខ្ជះខ្ជាយពេលវេលារបស់ពួកគេ។ «តើពួកគេមកព្យាយាមមកបញ្ចុះបញ្ចូលយើង? សូមទោសកុំធ្វើឱ្យហត់ខ្លួនឯង» លោកនិយាយបែបនេះហើយបន្តទៀតថា៖ «យើងមិនអាចនិយាយថា ''Yes'' (យល់ព្រម) ចំពោះអ្នក ដែលដាក់ទណ្ឌកម្មលើតួកគី ជុំវិញការចូលរួមជាមួយណាតូនោះទេ»។
ស៊ុយអែតបានទទួលជនភៀសខ្លួនរាប់សែនពីមជ្ឈិមបូព៌ា ដែលរួមមានជនជាតិឃឺដជាច្រើនមកពីប្រទេសស៊ីរី អ៊ីរ៉ាក់ និងតួកគីផងដែរ។ ជនភៀសខ្លួនឃឺដមួយចំនួន គឺជាសមាជិកនៃគណបក្សពលករឃឺដីស្ថាន (PKK) ដែលមានគោលបំណងផ្ដាច់ខ្លួន ដើម្បីបង្កើតប្រទេសសម្រាប់ជនជាតិឃឺដ នៅលើទឹកដីតួកគី ស៊ីរី និងអ៊ីរ៉ាក់ ហើយត្រូវបានតួកគីចាត់ទុកជាក្រុមភេវរករ។
យ៉ាងណាមិញប្រទេសស៊ុយអែត បានប្រកាន់ជំហរអព្យាក្រឹត្យ និងមិនចូលបក្សសម្ព័ន្ធ ចាប់តាំងពីការបញ្ចប់សង្គ្រាមណាប៉ូឡេអុង កាលពីជាង ២០០ ឆ្នាំមុន។ នៅក្នុងសម័យសង្គ្រាមត្រជាក់ ពួកគេបានប្រកាន់ជំហរនេះយ៉ាងម៉ឺងមាត់ តែបានបង្កើតទំនាក់ទំនងជិតស្និតជាមួយណាតូ បន្ទាប់ពីការដួលរលំនៃសហភាពសូវៀត។ ពួកគេឈប់ចាត់ទុកខ្លួនឯងថា ប្រទេសអព្យាក្រឹត្យបន្ទាប់ពីការចូលជាសមាជិកសហភាពអឺរ៉ុប កាលពីឆ្នាំ ១៩៩៥ ប៉ុន្តែនៅតែប្រកាន់ជំហរមិនចូលបក្សសម្ព័ន្ធយោធា រហូតដល់ពេលឥឡូវនេះ៕
វីដេអូ៖