.jpg)
ទេសាភិបាលធនាគារកណ្តាលជប៉ុន លោក Kuroda (ស្ដាំ) ឆ្លើយសំណួរ ក្នុងប្រជុំសភា នាក្រុងតូក្យូ កាលពីថ្ងៃទី ១៨ ខែមេសា។ AFP
អតិផរណារបស់ជប៉ុនក្នុងឆ្នាំនេះ ត្រូវបានគេរំពឹងថា នឹងកើនឡើងដល់ ២ ភាគរយ ពោលគឺឡើងខ្ពស់បំផុតក្នុងរយៈពេល ៣ ទសវត្សរ៍ ដែលមិនធ្លាប់មានកំណើនបែបនេះទាល់តែសោះ។
ការយល់ឃើញរបស់អភិបាលធនាគារកណ្តាលជប៉ុន លោក Haruhiko Kuroda កាលពីខែមុន ហាក់ដូចជាប្រឆាំងនឹងការយល់ឃើញរបស់ លោក Jerome Powell ប្រធានធនាគារកណ្តាលរបស់សហរដ្ឋអាមេរិក ដែលធ្លាប់ប្រាប់សភាជប៉ុនថា លោកនឹងប្រកាន់ខ្ជាប់នូវគោលនយោបាយរូបិយវត្ថុ ដែលធូររលុងរបស់គាត់ទាំងដែលសហរដ្ឋអាមេរិក ត្រូវប្រឈមនឹងការកើនឡើងអតិផរណាអស់រយៈពេល ១ ឆ្នាំ។
លោក Kuroda បានលើកឡើងថា៖ «យើងមិនចាំបាច់រឹតបន្តឹងគោលនយោបាយរូបិយវត្ថុក្នុងការឆ្លើយតបនឹងនិន្នាការនៃការកើនឡើងអតិផរណា ដោយធ្វើឱ្យផ្ទុយពីនិរន្តរភាពមួយរបស់យើងទេ»។
យោងតាមអ្នកសេដ្ឋកិច្ចចំនួន ១០ នាក់ ដែលត្រូវបានស្ទង់មតិ ដោយ Nikkei Asia អតិផរណាស្នូលក្នុងប្រទេសជប៉ុន មិនរាប់បញ្ចូលតម្លៃអាហារស្រស់ ត្រូវបានគេព្យាករថា នឹងកើនឡើងដល់ ២ ភាគរយ នៅក្នុងខែមេសា និងពី ០,៨ ភាគរយ នៅក្នុងខែមីនា ចំពេលមានកង្វះទំនិញទូទាំងពិភពលោក បន្ទាប់ពីជំងឺរាតត្បាតកូវីដ និងការឈ្លានពានរបស់រុស្ស៊ីលើអ៊ុយក្រែន។
ទិន្នន័យកាលពីថ្ងៃចន្ទ បានបង្ហាញដែរថា តម្លៃលក់ដុំរបស់ប្រទេសជប៉ុន បានកើនឡើង ១០ ភាគរយ នៅក្នុងខែមេសា ធៀបនឹងរយៈពេលដូចគ្នា កាលពីឆ្នាំមុន ដែលជាការកើនឡើងដ៏ធំបំផុតក្នុងរយៈពេល ៤០ ឆ្នាំកន្លងមក។
ការកើនឡើង ២ ភាគរយ នៅក្នុងសន្ទស្សន៍តម្លៃអ្នកប្រើប្រាស់ គឺជាគោលដៅគោលនយោបាយដ៏សំខាន់របស់ធនាគារជប៉ុន ខណៈដែលខ្លួនព្យាយាមទាញប្រទេសឱ្យងាកចេញពីបរិត្តផរណា ប៉ុន្តែធនាគារកណ្តាល និងអ្នកសេដ្ឋកិច្ចវិស័យឯកជនភាគច្រើនព្យាករថា ការធ្វើដូច្នោះ នឹងធ្វើឱ្យកំណើនមានតែក្នុងរយៈពេលខ្លី ហើយប្រទេសជប៉ុន នឹងវិលត្រឡប់ឆ្ពោះទៅរកបដិផរណាវិញ។
ប្រភពដដែល ក៏បានចង្អុលពីសម្ពាធប្រាក់ឈ្នួល ដែលចុះខ្សោយជាបន្តបន្ទាប់នៅក្នុងប្រទេសជប៉ុន និងបរិត្តផរណាបន្សល់ដោយវិធានខាងលើ ដែលនឹងប៉ះពាល់យ៉ាងខ្លាំងដល់ប្រតិកម្មរបស់ប្រជាជនស្ដីពីការកើនឡើងតម្លៃ ដែលពួកគេបានឃើញ។
ប្រាក់ឈ្នួលជាមធ្យមបានកើនឡើងត្រឹមតែ ០,៣ ភាគរយ ប៉ុណ្ណោះកាលពីឆ្នាំមុន។ នេះបើយោងតាមការស្ទង់មតិរបស់ក្រសួងការងារ ខណៈដែលការចរចាប្រចាំឆ្នាំ ដែលមានពាក់ព័ន្ធនឹងសាជីវកម្មធំៗបានផ្តល់ការបង្កើនប្រាក់ឈ្នួលត្រឹមតែ ១,៨៦ ភាគរយប៉ុណ្ណោះ ដែលចំនួននេះ បានធ្លាក់ចុះប្រមាណ ២ ភាគរយ ពោលគឺជាការធ្លាក់ចុះលើកដំបូងក្នុងរយៈពេល ៨ ឆ្នាំ។
យ៉ាងណាមិញ ទាំងធនាគារ-ជប៉ុន និងអ្នកសេដ្ឋកិច្ចវិស័យឯកជនដោយភាគច្រើនបានរំពឹងថា នឹងមានការកើនឡើងបន្តិចម្តងៗ។ ធនាគារជប៉ុនបានព្យាករថា អតិផរណាស្នូលនឹងកើនជាមធ្យម ១,៩ ភាគរយនៃសារពើពន្ធ ឆ្នាំ ២០២២ ហើយថយចុះ ១,១ ភាគរយ នៃសារពើពន្ធ ក្នុងឆ្នាំ ២០២៣ និងឆ្នាំ ២០២៤។
លោក Ryutaro Kono ប្រធានសេដ្ឋវិទូជប៉ុនក្រុមហ៊ុនពាណិជ្ជជប៉ុន BNP Paribas មានលើកឡើងថា៖ «បរិត្តផរណាមានភាពស៊ីជម្រៅនៅក្នុងប្រទេសជប៉ុន ដែលវិស័យគ្រួសារមានទំនោរប្រតិកម្មការពារ ចំពោះការកើនឡើងតម្លៃ និងបន្ថយចំនួនការប្រើប្រាស់។ អាជីវកម្មនានា ដែលខ្លាចបាត់បង់ការលក់ ចៀសវាងការចំណាយ ដោយកាត់បន្ថយប្រាក់ឈ្នួលបុគ្គលិក ឬប្រាក់ចំណេញ»។
រដ្ឋាភិបាលរបស់នាយករដ្ឋមន្រ្តីលោក Fumio Kishida ទំនងជាគាំទ្រទស្សនៈរបស់ធនាគារជប៉ុន។ នៅថ្ងៃទី ២៦ ខែមេសា ស្ថាប័នដដែល បានប្រកាសថា ទឹកប្រាក់ $៤៨,២ ពាន់លាន នឹងត្រូវប្រើប្រាស់សម្រាប់វិធានការគាំទ្រសេដ្ឋកិច្ចក្នុងគោលបំណងកាត់បន្ថយផលប៉ះពាល់អតិផរណា ដោយអនុវត្តគម្រោងរយៈពេលខ្លីនានា ដោយរួមមានការបញ្ចុះតម្លៃប្រេងសាំងរហូតដល់ខែកញ្ញា និងការផ្តល់សាច់ប្រាក់តែម្តងទៅគ្រួសារ ដែលមានចំណូលទាប។
សេដ្ឋវិទូផ្នែកឯកជនបានព្យាករជាមធ្យមថា អតិផរណានឹងឡើងដល់កម្រិត ២,២ ភាគរយ ក្នុងខែតុលា បន្ទាប់មកនឹងធ្លាក់ចុះក្រោម ២ ភាគរយទៀត នៅក្នុងខែមករា ដល់ខែមីនា។ ដោយឡែក សារពើពន្ធសម្រាប់ឆ្នាំ ២០២៣ ត្រូវបានគេធ្វើការប៉ាន់ស្មានថា នឹងមានអតិផរណាជាមធ្យម ០,៨ ភាគរយ។
លោក Yoshiki Shinke ដែលជាសេដ្ឋវិទូនៅវិទ្យាស្ថានស្រាវជ្រាវ Dai-ichi Life បានមានប្រសាសន៍យ៉ាងដូច្នេះថា៖ «មានផលិតផលជាច្រើន ដែលផលិតចេញពីស្រូវសាលី ដូចជានំបុ័ង និងគុយទាវជាដើម ហើយតម្លៃរបស់វានឹងកើនឡើងបន្ថែមទៀត នារដូវស្លឹកឈើជ្រុះ»៕
