ប្រធានាធិបតីសហរដ្ឋអាមេរិកលោក ចូ បៃដិន បាននិយាយថា សំណើរបស់ប្រទេសស៊ុយអែត និងហ្វាំងឡង់ ដើម្បីចូលជាសមាជិកនៃអង្គការណាតូ នឹងទទួលបានជោគជ័យ បើទោះបីជាមានការជំទាស់ពីប្រទេសតួកគីក៏ដោយ។
ហ្វាំងឡង់ និងស៊ុយអែត បានដាក់ពាក្យជាផ្លូវការស្នើសុំចូលជាសមាជិកអង្គការណាតូនៅថ្ងៃពុធ ប៉ុន្តែប្រទេសតួកគីបានជំទាស់ ដោយចោទប្រកាន់ប្រទេសទាំង ២ ថា បានអនុញ្ញាតឱ្យ «ភេរវករ» ជ្រកកោនក្នុងប្រទេសពួកគេ។ ក្រុងអង់ការ៉ាក៏បានរិះគន់ក្រុងស្តុកខុលអំពីការព្យួរកិច្ចព្រមព្រៀងផ្គត់ផ្គង់អាវុធ កាលពីឆ្នាំ២០១៩ ជុំវិញការចូលរួមរបស់ខ្លួន ក្នុងសង្គ្រាមស៊ីវិលស៊ីរី។
ប្រធានាធិបតីតួកគីលោក រេសិប តៃយ៉ឺប អេដូហ្គែន ជំរុញឱ្យបណ្ដាប្រទេសណាតូដទៃទៀតគោរពការព្រួយបារម្ភរបស់ខ្លួនចំពោះកិច្ចខិតខំប្រឹងប្រែងចូលជាសមាជិករបស់ប្រទេសទាំង ២ នេះ។ លោកនិយាយថា៖ «ការរំពឹងទុកតែ ១ គត់របស់យើងពីសម្ព័ន្ធមិត្តណាតូ គឺត្រូវយល់ពីភាពរសើបរបស់យើង គោរព និងចុងក្រោយគាំទ្រវា»។
ដើម្បីចូលជាសមាជិកថ្មីនៃអង្គការណាតូ ពាក្យស្នើសុំរបស់ពួកគេ ត្រូវតែទទួលការអនុម័តពីសមាជិកបច្ចុប្បន្នទាំង ៣០។ អង្គការនេះបានបរាជ័យក្នុងការចាប់ផ្ដើមការពិភាក្សាលើសំណើប្រទេសទាំង ២ រួចទៅហើយ ដោយសារការជំទាស់របស់តួកគី។
បើទោះជាយ៉ាងនេះក៏ដោយ ក៏លោក បៃដិន បាននិយាយថា៖ «ខ្ញុំគិតថាយើងនឹងមិនអីទេ» នៅពេលដែលអ្នកសារព័ត៌មានសួរថា តើលោកទំនុកចិត្តថាការជំទាស់របស់តួកគីអាចដោះស្រាយបានដែរឬទេ។
ស្របពេលជាមួយគ្នានេះរដ្ឋមន្ត្រីការបរទេសអាមេរិកលោក អាន់តូនី ប្លីនខែន បានជួបជាមួយសមភាគីតួកគីលោក មេវលូត កាវ៉ូសូគ្លូ នៅទីស្ដីការអង្គការសហប្រជាជាតិ។ បន្ទាប់ពីជំនួបនេះ រដ្ឋមន្ត្រីការបរទេសតួកគីបានប្រាប់អ្នកយកព័ត៌មានថាលោកប្លីនខែនបានធានាថាសារចាំបាច់នឹងត្រូវបានផ្ដល់ឱ្យទាក់ទងនឹងការព្រួយបារម្ភសន្តិសុខរបស់តួកគី៕