កាលពីថ្ងៃសៅរ៍ ទី ២១ ឧសភា ប្រធានាធិបតីតួកគីលោក រេស៊ីប តៃយ៉ីប អេដូហ្គេន បានធ្វើការសន្ទនាតាមទូរស័ព្ទ ជាមួយមេដឹកនាំនៃប្រទេសស៊ុយអែត និងហ្វាំងឡង់ ដើម្បីពិភាក្សាការព្រួយបារម្ភរបស់រដ្ឋាភិបាលតួកគី បន្ទាប់ពីពួកគេប្រកាសជំទាស់នឹងសំណើសមាជិកភាពអង្គការណាតូរបស់ប្រទេសទាំង ២។
តួកគីបានចោទប្រកាន់ស៊ុយអែត និងហ្វាំងឡង់ថា បានអនុញ្ញាតសិទ្ធជ្រកកោនទៅឱ្យមនុស្សពាក់ព័ន្ធនឹងក្រុមឧទ្ទាម PKK និងអ្នកនយោបាយបក្សប្រឆាំងលោកហ្វេធូឡា ហ្គីលេន ដែលតួកគីបានចោទប្រកាន់ថាបានប៉ុនប៉ងធ្វើរដ្ឋប្រហារ កាលពីឆ្នាំ ២០១៦។ សមាជិកថ្មីត្រូវការការអនុញ្ញាតពីសមាជិកបច្ចុប្បន្នទាំង ៣០ របស់អង្គការណាតូ។
បើតាមខុទ្ទកាល័យប្រធានាធិបតីតួកគី លោក អេដូហ្គេន បានប្រាប់នាយករដ្ឋមន្ត្រីស៊ុយអែត លោកស្រីម៉ាដាលេណា អង់ឌឺសុនថា ក្រុងអង់ការ៉ារំពឹងថា នឹងមានវិធានការជាក់ស្ដែង ដើម្បីដោះស្រាយការព្រួយបារម្ភរបស់ខ្លួន។ លោកក៏បាននិយាយថា ស៊ុយអែតគួរតែដកការហាមឃាត់មិនឱ្យនាំចេញអាវុធទៅកាន់តួកគី ដែលត្រូវបានអនុវត្ត បន្ទាប់ពីកងយោធាតួកគី ធ្វើការវាយលុកចូលប្រទេសស៊ីរី កាលពីឆ្នាំ ២០១៩។
រីឯលោកស្រី អង់ឌីសុន បានប្រាប់ថា៖ «ស៊ុយអែតស្វាគមន៍លទ្ធភាពនៃកិច្ចសហប្រតិបត្តិការក្នុងការប្រយុទ្ធប្រឆាំងនឹងអំពើភេរវកម្មអន្តរជាតិ ហើយសង្កត់ធ្ងន់ថា ស៊ុយអែតគាំទ្រយ៉ាងច្បាស់ ក្នុងការប្រយុទ្ធប្រឆាំងនឹងអំពើភេរវកម្ម និងការចុះបញ្ជីក្រុមភេរវករនៃក្រុម PKK»។
ក្នុងការសន្ទនាទូរស័ព្ទមួយទៀត លោក អេដូហ្គេន បានប្រាប់ប្រធានាធិបតីហ្វាំងឡង់លោក សាលី នីនិស្តូថា ការបរាជ័យក្នុងការបង្ក្រាបក្រុមភេរវកម្ម ដែលបង្កការគំរាមកំហែងផ្ទាល់ដល់សមាជិកដទៃនៃអង្គការណាតូ គឺមិនស្របតាមស្មារតីនៃសម្ព័នភាពយោធានេះទេ។
លោក នីនិស្តូ បាននិយាយថា លោកបានធ្វើការពិភាក្សា «បើកចំហ និងដោយផ្ទាល់» ជាមួយលោកអេរដូហ្គេន ហើយបានយល់ព្រមបន្តការសន្ទនាយ៉ាងជិតស្និត៕
វីដេអូ៖