ទូរទស្សន៍រដ្ឋអ៊ីរ៉ង់រាយការណ៍ថា សមាជិកជាន់ខ្ពស់នៃឆ្មាំបដិវត្តន៍ដ៏មានឥទ្ធិពលរបស់អ៊ីរ៉ង់ លោកវរសេនីយ៍ឯក Hassan Sayyad Khodaei ត្រូវបានបាញ់សម្លាប់នៅខាងក្រៅផ្ទះរបស់លោក ក្នុងក្រុងតេអេរ៉ង់ កាលពីថ្ងៃអាទិត្យ ដោយខ្មាន់កាំភ្លើងជិះម៉ូតូមិនស្គាល់អត្តសញ្ញាណ ២ នាក់។
ទោះបីជាឆ្មាំអ៊ីរ៉ង់ផ្តល់ព័ត៌មានលម្អិតតិចតួចអំពីការធ្វើឃាតដ៏កម្រ នៅកណ្ដាលរដ្ឋធានីនៃប្រទេសរបស់ខ្លួនក្ដី ក្រុមនេះបានបន្ទោសការសម្លាប់ទៅលើ «ភាពក្រអឺតក្រទមជាសកល» ដែលជាទូទៅជាកូដ សម្រាប់សហរដ្ឋអាមេរិក និងសម្ព័ន្ធមិត្តអ៊ីស្រាអែល។
មកទល់ពេលនេះ មិនទាន់មានក្រុមណាមួយ ចេញមុខទទួលខុសត្រូវនៅឡើយទេ ហើយការសម្លាប់នេះ គឺជាការរំលោភបំពានសន្តិសុខដ៏ធំបំផុតនៅអ៊ីរ៉ង់ ចាប់តាំងពីឆ្នាំ ២០២០ នៅពេលអ្នកវិទ្យាសាស្ត្រនុយក្លេអ៊ែរឈានមុខគេម្នាក់ ត្រូវបានធ្វើឃាតនៅខែវិច្ឆិកា ឆ្នាំនោះ។
ជុំវិញការធ្វើឃាតលើលោក Khodaei ប្រព័ន្ធផ្សព្វផ្សាយរដ្ឋឱ្យដឹងថា ឃាតករបានបាញ់ចំនួន ៥ គ្រាប់លើជនរងគ្រោះ ដែលកំពុងជិះក្នុងរថយន្តធ្វើដំណើរចេញពីផ្ទះរបស់គាត់ទៅកាន់សភាអ៊ីរ៉ង់។
របាយការណ៍កំណត់អត្តសញ្ញាណលោក Khodaei គ្រាន់តែប្រាប់ថា លោកជា «អ្នកការពារទីសក្ការៈ» ដែលអ៊ីរ៉ង់សំដៅលើទីប្រឹក្សា និងបុគ្គលិកយោធាក្នុងកងកម្លាំង Quds ដែលជាផ្នែក ១ នៃឆ្មាំបដិវត្តន៍អ៊ីរ៉ង់ ដែលធ្វើប្រតិបត្តិការនៅក្រៅប្រទេស ចំពោះការប្រយុទ្ធដើម្បីការពារទីតាំងរបស់និកាយស៊ីអ៊ីតនៅអ៊ីរ៉ាក់ និងស៊ីរី ពីក្រុមភេរវករដូចជារដ្ឋអ៊ិស្លាម។
ព័ត៌មានតិចតួចត្រូវបានបង្ហាញជាសាធារណៈអំពីលោក Khodaei ដោយសារតែក្រុមមន្រ្តី Quds ទំនងជាមានស្រមោល ដែលកំពុងបំពេញបេសកកម្មយោធាសម្ងាត់គាំទ្រក្រុម Hezbollah ក្រុមសកម្មប្រយុទ្ធលីបង់ និងកងជីវពលផ្សេងទៀតនៅស៊ីរី អ៊ីរ៉ាក់ និងកន្លែងផ្សេងទៀត។
បើតាមការចុះផ្សាយរបស់សារព័ត៌មាន AP ល្បឿននៃការស៊ើបអង្កេតរបស់រដ្ឋអាជ្ញាក្រុងតេអេរ៉ង់ ចំពោះឃាតកម្មបានបង្ហាញពីភាពលេចធ្លោរបស់លោក Khodaei ក្នុងរចនាសម្ព័ន្ធសំខាន់នៃប្រតិបត្តិការនៅក្រៅប្រទេសរបស់ឆ្មាំបដិវត្តន៍។
ទូរទស្សន៍រដ្ឋរាយការណ៍ថា កងកម្លាំងសន្តិសុខកំពុងតាមចាប់ជនដៃដល់ ដោយមិនផ្តល់ព័ត៌មានលម្អិតបន្ថែម ឬបញ្ជាក់ពីហេតុផលសម្រាប់ការសម្លាប់នោះទេ។ លើសពីនេះ ប្រព័ន្ធផ្សព្វផ្សាយរដ្ឋថា កងកម្លាំងសន្តិសុខរបស់ឆ្មាំបដិវត្តន៍បានរកឃើញ និងចាប់ខ្លួនសមាជិកនៃបណ្តាញស៊ើបការណ៍សម្ងាត់របស់អ៊ីស្រាអែល ដែលកំពុងប្រតិបត្តិការនៅក្នុងប្រទេសនេះ ដោយមិនបញ្ជាក់លម្អិតថា តើពួកគេមានការពាក់ព័ន្ធអ្វីទៅនឹងការសម្លាប់របស់លោក Khodaei នោះទេ។
ប្រតិបត្តិការក្រៅស្រុកនៃកងកម្លាំង Quds របស់អ៊ីរ៉ង់ ត្រូវបានអាមេរិកចោទថា គាំទ្រអង្គការភេរវករផ្សេងៗ ហើយរងការវាយប្រហារជារឿយៗពីអ៊ីស្រាអែល។ ការវាយប្រហារនៅជិតរដ្ឋធានីដាម៉ាសរបស់ស៊ីរី បានសម្លាប់សមាជិកឆ្មាំបដិវត្តន៍ ២ នាក់ កាលពីខែមីនា ដែលជំរុញឱ្យអ៊ីរ៉ង់សងសឹកវិញ ដោយការបាញ់មីស៊ីលទៅជិតស្ថានកុងស៊ុលអាមេរិកដ៏ធំនៅភាគខាងជើងអ៊ីរ៉ាក់៕
ហួន ឌីណា