ក្នុងដំណើរទស្សនកិច្ចរបស់ខ្លួនលើកដំបូងទៅកូរ៉េខាងត្បូង ចាប់តាំងពីឡើងកាន់តំណែងប្រធានាធិបតីសហរដ្ឋអាមេរិក លោក ចូ បៃដិន បានស្ដារឡើងវិញនូវយុទ្ធសាស្ត្ររបស់អាមេរិកចំពោះឧបទ្វីបកូរ៉េ ទៅជាវិធីសាស្រ្តតឹងរ៉ឹង ដែលធ្លាប់មានមុនអ្នកកាន់តំណែងមុនរបស់លោកបន្ទន់ខ្លួន ជាមួយមេដឹកនាំផ្ដាច់ការក្រុងព្យុងយ៉ាង។
វិធីសាស្រ្តតឹងរ៉ឹងនោះ មានន័យថា ការរារាំងមានកាន់តែច្រើន កិច្ចសហប្រតិបត្តិការកាន់តែស្និទ្ធជាមួយសម្ព័ន្ធមិត្ត និងការមិនច្បាស់លាស់មានកាន់តែខ្លាំង ពីក្រុងព្យុងយ៉ាង តែវាក៏ប្រហែលជាមិនមានន័យថា មានការរីកចម្រើនបន្ថែមទៀត ក្នុងការដោះស្រាយការប្រឈមមុខដាក់គ្នានោះទេ។
លោក បៃដិន កំពុងស្វែងរកការបន្ធូរបន្ថយភាពជាប់គាំង ដោយចាត់វិធានការ ដើម្បីរក្សាកូរ៉េខាងជើងឱ្យនៅស្ងៀម និងទប់ស្កាត់កំណើននៃភាពតានតឹងដ៏គ្រោះថ្នាក់។ ទស្សនកិច្ចរបស់លោកទៅក្រុងសេអ៊ូល និងក្រុងតូក្យូបន្តបន្ទាប់គ្នា ត្រូវបានរៀបចំឡើង ដើម្បីជំរុញសម្ព័ន្ធមិត្តថា អាមេរិកនឹងមិនបោះបង់ពួកគេចោលដូចអាណត្តិលោក ត្រាំ ឡើយ ខណៈដែលឥទ្ធិពលនៃមហាអំណាចចិនរុលទៅមុខ ហើយមានការប្រឈមនឹងការគំរាមកំហែងនុយក្លេអ៊ែរ។
ថ្លែងក្នុងសន្និសីទកាសែតនៅទីក្រុងសេអ៊ូល ជាមួយប្រធានាធិបតីកូរ៉េខាងត្បូងថ្មីថ្មោង លោក យូន ស៊ុកយ៉ល (Yoon Suk-yeol) លោក បៃដិន និយាយថា៖ «ថ្ងៃនេះ លោកប្រធានាធិបតី យូន និងខ្ញុំប្តេជ្ញាពង្រឹងការចូលរួមយ៉ាងជិតស្និទ្ធរបស់យើង និងធ្វើការរួមគ្នា ដើម្បីដោះស្រាយបញ្ហាប្រឈមនៃសន្តិសុខក្នុងតំបន់ រួមទាំងការដោះស្រាយការគំរាមកំហែងដែលបង្កឡើងដោយសា.រដ្ឋប្រជាធិបតេយ្យប្រជាមានិតកូរ៉េ (កូរ៉េខាងជើង) តាមរយៈការពង្រឹងបន្ថែមទៀតនូវជំហររារាំងរបស់យើង និងការឆ្ពោះទៅរកការលុបបំបាត់អាវុធនុយក្លេអ៊ែរនៅឧបទ្វីបកូរ៉េ»។
លោក បៃដិន បានបន្ថែមទៀតថា៖ «សម្ព័ន្ធភាពរវាង សា.រដ្ឋកូរ៉េខាងត្បូង និងសហរដ្ឋអាមេរិក មិនធ្លាប់មានភាពរឹងមាំរស់រវើក ឬសំខាន់ជាងនេះទេ»។ មេដឹកនាំប្រទេសទាំង ២ បានប្រកាសថា ខ្លួននឹងរិះរកមធ្យោបាយដើម្បីពង្រីកសមយុទ្ធយោធារួមគ្នា ជាអ្វីដែលលោក ត្រាំ ធ្លាប់ព្យាយាមកាត់បន្ថយ ខណៈកន្លងមកសមយុទ្ធយោធារវាងប្រទេសទាំង ២ តែងធ្វើឱ្យមានការខឹងសម្បាពីកូរ៉េខាងជើង ដែលប្រាប់ថា សកម្មភាពបែបនេះជាការគំរាមកំហែងដល់សន្តិសុខរបស់ខ្លួន និងជាការហាត់សមសម្រាប់សង្គ្រាម។
ខុសពីលោក ត្រាំ លោក បៃដិន សាទរចំពោះការបន្តវត្តមានកងទ័ពអាមេរិកនៅកូរ៉េខាងត្បូង ដោយលោកនិយាយថា៖ «វាជានិមិត្តរូបនៃកម្លាំង និងភាពធន់នៃសម្ព័ន្ធភាពរបស់យើង និងការត្រៀមខ្លួនរបស់យើង ក្នុងការទទួលយកការគំរាមកំហែងទាំងអស់»។
ស្រដៀងគ្នានេះដែរ លោក បៃដិន ប្រកាន់យកអាកប្បកិរិយាប្រុងប្រយ័ត្នបន្ថែមទៀតចំពោះអនាគតនៃទំនាក់ទំនងផ្ទាល់ជាមួយកូរ៉េខាងជើង ដែលមានអាវុធនុយក្លេអ៊ែរ។ លោកថា អាមេរិកផ្តល់វ៉ាក់សាំងដល់កូរ៉េខាងជើងរួចហើយ ដើម្បីជួយប្រទេសនេះទប់ទល់នឹងវីរុស ក្រោយសង្ស័យថា មានការឆ្លងរាលដាលទ្រង់ទ្រាយធំ ប៉ុន្តែមិនទាន់មានការឆ្លើយតបនោះទេ។
លោក បៃដិន បានបន្ថែមថា៖ «ទាក់ទងនឹងថា តើខ្ញុំនឹងជួបមេដឹកនាំកូរ៉េខាងជើង ឬអត់? វាអាស្រ័យថា តើលោកស្មោះត្រង់ និងហ្មត់ចត់ ឬអត់?»។
វិធីសាស្រ្តរបស់លោក បៃដិន ផ្ទុយស្រឡះពីលោក ត្រាំ ដែលបន្ទន់ខ្លួនដាក់មេដឹកនាំក្រុងព្យុងយ៉ាង លោក គីម ជុងអ៊ុន។ ខុសពីអនុសញ្ញាការទូតដែលប្រធានាធិបតីមិនគួរជួបសត្រូវឡើយ លុះត្រាតែកិច្ចព្រមព្រៀងមួយ ត្រូវបានសម្រេចពីមុន ឬប្រហែលៗនោះ លោក ត្រាំ បានអង្គុយជាមួយលោក គីម ៣ ដង ហើយជំនួបចុងក្រោយ នៅឯតំបន់គ្មានយោធានៃឧបទ្វីបកូរ៉េ លោកថែមទាំងឈានជើងឆ្លងកាត់ខ្សែបន្ទាត់ព្រំដែនចូលកូរ៉េខាងជើងជាផ្លូវការទៀតផង។
ទោះបីទំនាក់ទំនងបែបនេះក្ដី លោក ត្រាំ និងលោក គីម មិនបានឈានដល់កិច្ចព្រមព្រៀងណាមួយក្នុងការរំសាយអាវុធនុយក្លេអ៊ែរកូរ៉េខាងជើងនោះឡើយ។ ផ្ទុយទៅវិញ លោក ត្រាំ ផ្តល់កាយវិការឯកតោភាគី និងមិនសមហេតុផល ដូចជាការយល់ព្រមផ្អាកសមយុទ្ធយោធារួមគ្នាដ៏សំខាន់ជាមួយកូរ៉េខាងត្បូង ដោយគ្មានការព្រមានជាមុន ទាំងទីក្រុងសេអ៊ូល ឬមន្ទីរបញ្ចកោណ។
លោក ត្រាំ សួរថា ហេតុអ្វីបានជាសហរដ្ឋអាមេរិកនៅតែរក្សាកម្លាំងទាហានចំនួន ២៨ ៥០០ នាក់ នៅកូរ៉េខាងត្បូង ក្រោយសង្រ្គាមកូរ៉េ ដែលធ្វើឱ្យរដ្ឋាភិបាលក្រុងសេអ៊ូល នៅគ្រានោះមិនច្បាស់លាស់អំពីការប្តេជ្ញាចិត្តរបស់អាមេរិកចំពោះសម្ព័ន្ធមិត្ត។ ពេលមួយ ក្នុងឆ្នាំ ២០១៩ លោក ត្រាំ ថែមទាំងគំរាមដកទ័ពចំនួន ៤ ០០០ នាក់ លុះត្រាតែកូរ៉េខាងត្បូងចំណាយប្រាក់ចំនួន $៥ ប៊ីលាន ក្នុង ១ ឆ្នាំ ដើម្បីគាំទ្រដល់ការដាក់ពង្រាយ ដែលច្រើនជាងការចំណាយដល់ទៅ ៥ ដង។
ប៉ុន្តែទោះលោក ត្រាំ ផ្អាកការធ្វើសមយុទ្ធយោធាកម្រិតខ្ពស់ក្ដី ក៏សមយុទ្ធរួមគ្នាតូចៗជាមួយយោធាកូរ៉េខាងត្បូង បន្តមានក្នុងអាណត្តិរបស់លោក។ ក្នុងសេចក្តីថ្លែងការណ៍រួម កាលពីថ្ងៃសៅរ៍ លោក បៃដិន និងលោក យូន យល់ព្រមចាប់ផ្តើម «ការពិភាក្សាដើម្បីពង្រីកវិសាលភាព និងទំហំ» នៃសមយុទ្ធយោធា។ លោក បៃដិន ថា កិច្ចសហប្រតិបត្តិការបង្ហាញពី «ការត្រៀមខ្លួនរបស់យើង ដើម្បីទទួលយកការគំរាមកំហែងទាំងអស់រួមគ្នា»។
រដ្ឋបាលលោក បៃដិន ផ្តោតលើការវិលទៅយុទ្ធសាស្ត្រកូរ៉េខាងជើងសំដៅការទប់ស្កាត់។ នេះបើយោងតាមមន្ត្រីរដ្ឋបាល ដែលនិយាយដោយមិនបញ្ចេញឈ្មោះ កាលពីថ្ងៃសៅរ៍ ដើម្បីពន្យល់គំនិតរបស់ប្រធានាធិបតីអាមេរិក។ ដូចអតីតប្រធានាធិបតី លោក បារ៉ាក់ អូបាម៉ា ដែរ លោក បៃដិន បើកចំហក្នុងការជួបលោក គីម ក្នុងពេលណា ១ នាអនាគត តែតាមបែបយុទ្ធសាស្រ្ត ដែលមន្ត្រីការទូតថ្នាក់ទាបធ្វើរួចទើបលោកចូលរួម។
រដ្ឋបាល បៃដិន ហាក់មិនរំពឹងទុកថា នឹងមានការឈានដល់ការវិវឌ្ឍគួរឱ្យកត់សម្គាល់ណា ១ ឡើយ។ ខណៈរដ្ឋបាលនេះ ងាកទៅរកទណ្ឌកម្មប្រឆាំងកូរ៉េខាងជើងយ៉ាងឆាប់រហ័ស អ្នកវិភាគគោលនយោបាយការបរទេស បានចង្អុលបង្ហាញថា ទំនាក់ទំនងការទូតហាក់ដូចជាបាត់បង់ច្រើន ពីវិធីសាស្ត្ររបស់លោក បៃដិន កាលពីដំបូង។
លោក Alexander R. Vershbow អ្នកការទូតអាជីព ដែលជាអតីតឯកអគ្គរដ្ឋទូតប្រចាំកូរ៉េខាងត្បូងនិយាយថា រដ្ឋបាល បៃដិន មានការគួរឱ្យកត់សម្គាល់ស្រដៀងទៅនឹងគោលនយោបាយ «អត់ធ្មត់ជាយុទ្ធសាស្ត្រ» របស់លោក អូបាម៉ា។ លោក Vershbow ថា៖ «ពួកគេកំពុងបានលទ្ធផលដូចគ្នា ពោលគឺគ្មានការចរចាមានការសាកល្បង [នុយក្លេអ៊ែរ] បន្ថែម និងសូម្បីតែការនិយាយពីបំណងឆ្ពោះទៅការរំសាយនុយក្លេអ៊ែរពីក្រុងព្យុងយ៉ាងក៏គ្មានដែរ»។
ការព្រួយបារម្ភពីការគំរាមកំហែងអាវុធនុយក្លេអ៊ែរមានកាន់តែខ្លាំងឡើង ក្រោយកូរ៉េខាងជើងបន្តកម្មវិធីអាវុធរបស់ខ្លួន ជាមួយនឹងការបាញ់សាកល្បងមីស៊ីលចំនួន ១៦ ដង ក្នុងឆ្នាំនេះ រួមទាំងការសាកល្បងមីស៊ីលផ្លោងអន្តរទ្វីបជាលើកដំបូងក្នុងរយៈពេលជាង ៤ ឆ្នាំ កាលពីខែមីនា។
មន្ត្រីអាមេរិកព្រមានថា ទីក្រុងព្យុងយ៉ាងអាចនឹងធ្វើការសាកល្បងមីស៊ីលបន្ថែម ឬសូម្បីតែការសាកល្បងនុយក្លេអ៊ែរ ខណៈលោក បៃដិន ស្ថិតនៅតំបន់អាស៊ីនៅឡើយ។
យ៉ាងណាមិញ លោក បៃដិន ចង់ពង្រីកទំនាក់ទំនងជាមួយកូរ៉េខាងត្បូង លើសពីភាពជាដៃគូសន្តិសុខ។ ១ ថ្ងៃ មុនកិច្ចប្រជុំទ្វេភាគី លោក បៃដិន និងលោក យូន បានជួបប្រជុំគ្នានៅរោងចក្រផលិតសេមីកុងឌុចទ័ររបស់ Samsung ដើម្បីប្តេជ្ញាដោះស្រាយបញ្ហាខ្សែចង្វាក់ផ្គត់ផ្គង់សកល ដែលរួមចំណែកដល់ការកើនឡើងអតិផរណានៅសហរដ្ឋអាមេរិក។
ក្រោយការជួបគ្នាដោយផ្ទាល់ លោក បៃដិន ក៏និយាយថា ប្រទេសទាំង ២ នឹងបន្តប្រយុទ្ធប្រឆាំងការប្រែប្រួលអាកាសធាតុ និងជំងឺរាតត្បាត ហើយបន្តធ្វើការ ដើម្បីធានាថា «ឥណ្ឌូប៉ាស៊ីហ្វិក គឺជាតំបន់សេរី និងបើកចំហ» ដែលជាយុទ្ធសាស្រ្តដើម្បីទប់ការសាយភាយនៃឥទ្ធិពលចិន ទោះបីក្រុងប៉េកាំង ជាដៃគូពាណិជ្ជកម្មដ៏សំខាន់របស់ក្រុងសេអ៊ូលក្ដី៕
ហួន ឌីណា
វីដេអូ៖