មេដឹកនាំគណបក្សការងារលោក អាន់តូនី អាល់បានីស (Anthony Albanese) បានធ្វើសច្ចាប្រណិធានចូលកាន់អំណាចជានាយករដ្ឋមន្ត្រីទី៣១ នៃប្រទេសអូស្ត្រាលី ខណៈពេលការបោះឆ្នោត កាលពីថ្ងៃអាទិត្យបង្ហាញថា គណបក្សរបស់លោកនឹងបញ្ចប់ការគ្រប់គ្រងជិត ១ ទសវត្សរ៍របស់សម្ព័ន្ធភាពអភិរក្សនិយម។
លោក អាល់បានីស បានធ្វើពិធីសម្បថនេះ ជាមួយឧបនាយករដ្ឋមន្ត្រីលោក រីឆាត ម៉ាឡេស រដ្ឋមន្ត្រីការបរទេស លោកស្រី ផេននី វង្ស រដ្ឋមន្ត្រីរតនាគារ លោក ជីម ឆាមឺរ រដ្ឋមន្ត្រីហិរញ្ញវត្ថុ រដ្ឋមន្ត្រីកិច្ចការស្ត្រី និងអគ្គរាជអាជ្ញា លោកស្រី ខេធី ហ្គាឡាហ្គឺ។
មេដឹកនាំគណបក្សការងារទាំងនេះ បានស្បថចូលកាន់អំណាច ដោយការរាប់សន្លឹកឆ្នោតមិនទាន់ចប់ជាផ្លូវការនៅឡើយ ដោយអាសនៈសភាចំនួន ១០ ទៀត នៅមិនទាន់មានអ្នកឈ្នះច្បាស់លាស់នៅឡើយ។ ពួកគេបានទទួលអាសនៈក្នុងសភាចំនួន ៧៣ អាសនៈ ខណៈត្រូវការសំឡេងចំនួន ៧៦ អាសនៈ ដើម្បីបង្កើតរដ្ឋាភិបាលសំឡេងភាគច្រើន។ ដូច្នេះ ប្រសិនបើរដ្ឋាភិបាលនេះ មិនអាចទទួលចំនួននេះ ពួកគេនឹងក្លាយខ្លួនជារដ្ឋាភិបាលសំឡេងភាគតិច ដែលត្រូវការគាំទ្របង្គ្រប់សំឡេងពីគណបក្សដទៃ។
ដើម្បីបង្កើតរដ្ឋាភិបាលគណបក្សណាមួយត្រូវតែធ្វើឱ្យអគ្គអភិបាលលោក ដេវីដ ហេលី ដែលដើរតួជាប្រមុខរដ្ឋជំនួសឱ្យព្រះម្ចាស់ក្សត្រី អេលីហ្សាប៊ែត ជឿថា ពួកគេមានសំឡេងគាំទ្រគ្រប់គ្រាន់ ដើម្បីបង្កើតរដ្ឋាភិបាល។ បន្ថែមពីលើនេះ លោកនឹងទទួលយោបល់ផ្នែកផ្លូវច្បាប់ ដើម្បីធានាបានថា ការសម្រេចចិត្តរបស់លោក គឺត្រឹមត្រូវ។
បើតាមលទ្ធផលបឋមគណបក្សការងារ គឺជាគណបក្សតែ ១ គត់ ដែលមានសំឡេងគ្រប់គ្រាន់ ដើម្បីបង្កើតរដ្ឋាភិបាលទាំងប្រភេទសំឡេងភាគច្រើន និងទាំងសំឡេងភាគតិច។ ជាធម្មតា គេមិនមានការប្រញាប់ប្រញាល់ក្នុងការធ្វើសម្បថមុនការរាប់សន្លឹកឆ្នោតចប់បែបនេះទេ ប៉ុន្តែដោយសារកិច្ចប្រជុំមេដឹកនាំ Quad នៅប្រទេសជប៉ុន ដែលមានន័យថា ប្រទេសអូស្ត្រាលី ត្រូវការមេដឹកនាំច្បាស់លាស់ ដើម្បីចូលរួមកិច្ចប្រជុំនេះ។
ប្រធានាធិបតីសហរដ្ឋអាមេរិកលោក ចូ បៃដិន (Joe Biden) បានទូរស័ព្ទទៅកាន់លោក អាល់បានីស ដើម្បីអបអរសាទរជ័យជម្នះរបស់លោក ហើយអរគុណលោក ដែលបានសម្រេចជ្រើសរើសធ្វើដំណើរទៅក្រុងតូក្យូ សម្រាប់កិច្ចប្រជុំនេះ។
ប៉ុន្មានម៉ោងបន្ទាប់ពីពិធីសម្បថនេះ លោកនាយករដ្ឋមន្ត្រី អាល់បានីស និងលោកស្រីរដ្ឋមន្ត្រីការបរទេស វង្ស នឹងធ្វើដំណើរទៅប្រទេសជប៉ុន ដើម្បីចូលរួមក្នុងកិច្ចប្រជុំ Quad ដែលជាវេទិកាកិច្ចសហប្រតិបត្តិការសន្តិសុខរវាងអាមេរិក ជប៉ុន ឥណ្ឌា និងអូស្ត្រាលី នៅតំបន់ឥណ្ឌូ-ប៉ាស៊ីហ្វិក។
យ៉ាងណា លោក អាល់បានីស បានឱ្យដឹងថា លោកបានទទួលការធានាពីបេក្ខជនឯករាជ្យគ្មានគណបក្សជាច្រើនមកហើយថា ពួកគេនឹងគាំទ្ររដ្ឋាភិបាលរបស់លោក បើគណបក្សការងារមិនអាចទទួលសំឡេងភាគច្រើន។
គណបក្សការងារទទួលបានជ័យជម្នះយ៉ាងខ្លាំងនៅរដ្ឋភើត ដែលជាធម្មតា គឺជាមូលដ្ឋានរបស់សម្ព័ន្ធកាន់អំណាចរបស់អតីតនាយករដ្ឋមន្ត្រីលោក ស្កុត ម៉ូរីសុន (Scott Morrison) ធ្វើឱ្យរដ្ឋមន្ត្រីជាច្រើនបាត់បង់អាសនៈរបស់ពួកគេក្នុងសភា។ អតីតអគ្គរាជអាជ្ញាលោកស្រី ម៉ៃឃើលៀ កាស បានស្ដីបន្ទោសលោក ម៉ូរីសុន ចំពោះការបាត់បង់អាសនៈទាំងនេះ។
បើទោះបីជាមានជ័យជម្នះទាំងនេះ និងការកើនឡើងអាសនៈទាំងនេះ គណបក្សការងារបានបាត់បង់អាសនៈសុវត្ថិភាពរបស់ពួកគេចំនួន ២ ដោយ ១ ឱ្យទៅបេក្ខជនឯករាជ្យ និង ១ ទៀត ឱ្យទៅបេក្ខជនគណបក្សបៃតង ដែលនឹងចាប់ផ្ដើមអាណត្តិនេះ ជាមួយនឹងចំនួនអាសនៈច្រើនបំផុត ក្នុងប្រវត្តិសាស្ត្ររបស់ពួកគេនៅអូស្ត្រាលី។
បន្ទាប់ពីទទួលស្គាល់ការចុះចាញ់ លោក ម៉ូរីសុន បានប្រកាសលាលែងពីតំណែងមេដឹកនាំសម្ព័ន្ធភាពគណបក្សនយោបាយរបស់លោក។ លោក ភីធឺ ដាទុន ដែលជាទេសរដ្ឋមន្ត្រីក្នុងរដ្ឋាភិបាលលោក ម៉ូរីសុន និងដែលធ្លាប់កាន់តំណែងការពារជាតិ និងមហាផ្ទៃ ត្រូវគេរំពឹងថា មានលទ្ធភាពខ្ពស់ជាងគេក្នុងការស្នងតំណែងប្រធាននេះ។
បេក្ខជនឈានមុខគេមុន គឺរដ្ឋមន្ត្រីរតនាគារ ចូស ហាដ្រេនប៊ឺក តែលោកបានបាត់បង់អាសនៈសភារបស់លោក ហើយទំនងជានឹងបាត់បង់តំណែងថ្នាក់ដឹកនាំបក្សរបស់លោកទៀតដែរ។
ជាងពាក់កណ្ដាលនៃសមាជិកស្ត្រីរបស់ពួកគេ បានចាញ់ការបោះឆ្នោតដែលនាំឱ្យមានតម្រូវការក្នុងការធ្វើកំណែទម្រង់ជំហររបស់បក្ស ដើម្បីទាក់ទាញស្ត្រីមកវិញ។ អតីតរដ្ឋមន្ត្រី ដូចជាលោកស្រី ការ៉ែន អង់ឌ្រូ និងលោកស្រី ស៊ូសាន ឡិយ ត្រូវបានគេលើកឡើងថា អាចឈរឈ្មោះជាមេដឹកនាំបក្ស ប៉ុន្តែពួកគេនៅខ្វះការគាំទ្រផ្ទៃក្នុងនៅឡើយ៕