.jpg)
ផ្សែងហុយឡើងយ៉ាងខ្មួលខ្មាញ់ បន្ទាប់ពីមានការវាយប្រហារពីកងទ័ពរុស្ស៊ី នៅរោងចក្រ ១ នៅតំបន់ដុនបាស ភាគខាងកើតអ៊ុយក្រែន កាលពីថ្ងៃទី ២៤ ខែឧសភា។
អ៊ុយក្រែនបានច្រានចោលបទឈប់បាញ់ ឬការលះបង់ទឹកដីណាមួយឱ្យដល់ទីក្រុងម៉ូស្គូ ខណៈពេលដែលរុស្ស៊ីបង្កើនការវាយប្រហារនៅភាគខាងត្បូង និងខាងកើតនៃប្រទេសនេះ ដោយវាយតំបន់ដុនបាស និងមីកូឡាវ ជាមួយនឹងការប្រហារតាមអាកាស និងកាំភ្លើងធំ។
ជំហររបស់ក្រុងកៀវ ក្នុងការចរចាសន្តិភាព បានកាន់តែមិនចុះសម្រុង ក្នុងរយៈប៉ុន្មានសប្ដាហ៍ចុងក្រោយនេះ ខណៈពេលរុស្ស៊ីប្រឈមនឹងការបរាជ័យផ្នែកយោធា ហើយមន្ត្រីអ៊ុយក្រែនព្រួយបារម្ភថា ពួកគេអាចត្រូវបង្ខំឱ្យលះបង់ទឹកដី សម្រាប់កិច្ចព្រមព្រៀងសន្តិភាពណាមួយ។
អ្នកដឹកនាំគណៈប្រតិភូអ៊ុយក្រែនក្នុងការចរចា លោក មីខាអីឡូ ផូដូលីអាក បានច្រានចោលបទឈប់បាញ់ ឬការលះបង់ទឹកដីណាមួយ ដោយនិយាយថា ការធ្វើបែបនេះ នឹងអនុញ្ញាតឱ្យបន្តវត្តមានរបស់កងទ័ពរុស្ស៊ីលើទឹកដីអ៊ុយក្រែន ដែលក្រុងកៀវមិនអាចទទួលយកបានទេ។
មេការខុទ្ទកាល័យប្រធានាធិបតីអ៊ុយក្រែនលោក អង់ឌ្រី យឺម៉ាក់ បានសរសេរលើបណ្ដាញសង្គម Twitter ថា៖ «សង្គ្រាមនេះត្រូវតែបញ្ចប់ដោយការស្ដារឡើងវិញដោយពេញលេញនៃបូរណភាពទឹកដី និងអធិបតេយ្យភាពរបស់អ៊ុយក្រែន»។
ស្របពេលជាមួយគ្នានេះ ក្រសួងមហាផ្ទៃអ៊ុយក្រែនបានឱ្យដឹងថា រុស្ស៊ីបានបង្កើនការវាយប្រហារលើខេត្តលូហានស្ក៍ នៃតំបន់ដុនបាស បន្ទាប់ពីបញ្ចប់ការឡោមព័ទ្ធជាច្រើនសប្ដាហ៍ នៃក្រុងកំពង់ផែម៉ារីអូប៉ូលភាគអាគ្នេយ៍នៃប្រទេសអ៊ុយក្រែន។ ការប្រយុទ្ធគ្នាខ្លាំងជាងគេ បានកើតឡើងក្នុងក្រុងស៊ីវៀរ៉ូដូណេតស្ក៍ និងក្រុងលីស៊ីកហានស្ក៍ ដែលនៅមានកងកម្លាំងអ៊ុយក្រែនច្រើនកំពុងទប់ទល់នឹងកងកម្លាំងរុស្ស៊ី ចាប់តាំងពីពាក់កណ្ដាលខែមេសាមក។
ក្រសួងការពារជាតិរុស្ស៊ីបាននិយាយថា កងកម្លាំងរបស់ខ្លួនបានវាយប្រហារបញ្ជាការដ្ឋាន ទាហាន និងឃ្លាំងរំសេវរបស់អ៊ុយក្រែន នៅតំបន់ដុនបាស និងតំបន់មីកូឡាវ៕
វីដេអូ៖
