.jpg)
Habeck ថ្លែងទៅកាន់បុគ្គលិករោងចក្រចម្រាញ់ប្រេង នៅភាគខាងកើតអាល្លឺម៉ង់ នាពេលកន្លងមក។ AFP
ការខកចិត្តរបស់អាល្លឺម៉ង់ លើការស្ទាក់ស្ទើររបស់ប្រទេសអឺរ៉ុបមួយចំនួន ចំពោះការរួមគ្នាដាក់ទណ្ឌកម្មប្រេងរុស្ស៊ី ត្រូវបានបើកបង្ហាញឱ្យឃើញ កាលពីថ្ងៃចន្ទ។
លោក Robert Habeck រដ្ឋមន្ត្រីសេដ្ឋកិច្ចអាល្លឺម៉ង់ប្រាប់ក្រុមមួយនៅវេទិកាសេដ្ឋកិច្ចពិភពលោក នាទីក្រុង Davos ប្រទេសស្វ៊ីសថា៖ «យើងឃើញភាពអាក្រក់បំផុតនៃទ្វីបអឺរ៉ុប ដែលមានតែរដ្ឋមួយចំនួនប៉ុណ្ណោះដែលរារាំងការឆ្ពោះទៅមុខ»។
លោក Habeck ទទួលស្គាល់ថា ការពឹងផ្អែករបស់ប្រទេសនីមួយៗនៃសហភាពអឺរ៉ុបលើប្រេងឆៅរុស្ស៊ីខុសៗគ្នា។ លោករំពឹងថា ប្រទេសហុងគ្រី នឹងទទួលបាន «ការលើកលែងពិសេស» នៅក្នុងការរួមគ្នាដាក់ទណ្ឌកម្មប្រេង នាពេលខាងមុខ។
លោកនិយាយថា៖ «ខ្ញុំរំពឹងគ្រប់គ្នា រួមទាំងហុងគ្រីថា ពួកគេធ្វើការ ដើម្បីរកដំណោះស្រាយ ហើយមិននិយាយថា «អូខេ» យើងមានករណីលើកលែង ហើយបន្ទាប់មកយើងនឹងឈប់ និងមិនពង្រឹងភាពជាដៃគូរបស់យើងជាមួយលោក វ្ល៉ាឌីមៀរ ពូទីន នោះទេ»។
នៅថ្ងៃចន្ទ ប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី (Volodymyr Zelensky) ជំរុញឱ្យប្រទេសនានាដាក់ទណ្ឌកម្មជា «អតិបរមា» ប្រឆាំងនឹងរុស្ស៊ី ចំពោះការលុកលុយប្រទេសរបស់ខ្លួន រួមទាំងការទណ្ឌកម្មប្រេងទាំងស្រុង។
សហភាពអឺរ៉ុបបានយល់ព្រមរួចហើយ ក្នុងការលុបចោលការនាំចូលធ្យូងថ្មរបស់រុស្ស៊ី ប៉ុន្តែការដាក់ទណ្ឌកម្មប្រេងមានភាពចម្រូងចម្រាសកាន់តែខ្លាំង។ យោងតាមគណៈកម្មការអឺរ៉ុបប្លុក នាំចូលប្រេងប្រហែល ២៧ ភាគរយពីរុស្ស៊ី កាលពីឆ្នាំមុន។
ប៉ុន្តែប្រទេសមួយចំនួននៅអឺរ៉ុបខាងកើត រួមទាំងហុងគ្រី ស្លូវ៉ាគី និងសា.ឆែក ពឹងផ្អែកជាខ្លាំងលើប្រេងរុស្ស៊ី ហើយមានជម្រើសចូលរួមជាមួយប្លុកភ្លាមៗតិចតួច។ ហុងគ្រី និងស្លូវ៉ាគី ត្រូវបានផ្ដល់ពេលវេលាក្នុងការចូលរួមដាក់ទណ្ឌកម្មប្រហែល ១ ឆ្នាំ ប៉ុន្តែហុងគ្រី ដែលមានមេដឹកនាំមានទំនាក់ទំនងជាមួយក្រុងម៉ូស្គូ ប្រកែកសុំពេលបន្ថែមទៀត ៣-៥ ឆ្នាំ ដើម្បីឱ្យខ្លួនងាករកអ្នកផ្គត់ផ្គង់ថ្មី។ យោងតាមទីភ្នាក់ងារថាមពលអន្តរជាតិ (IEA) ប្រហែល ៤០ ភាគរយ នៃប្រេងនាំចូលរបស់ហុងគ្រី មកពីរុស្ស៊ី កាលពីឆ្នាំមុន។
ភាពផុយស្រួយនៃការផ្គត់ផ្គង់ថាមពលរបស់អឺរ៉ុប ត្រូវបានបញ្ជាក់យ៉ាងច្បាស់នៅពេលដែលរុស្ស៊ីកាត់ផ្តាច់ប៉ូឡូញ ប៊ុលហ្គារី និងចុងក្រោយបំផុត ហ្វាំងឡង់ ពីរំហូរឧស្ម័នធម្មជាតិរបស់ខ្លួន បន្ទាប់ពីប្រទេសទាំង ៣ បដិសេធមិនទូទាត់ជាប្រាក់រូប្លិ៍ តាមការទាមទាររបស់រុស្ស៊ី។
ការដាក់ទណ្ឌកម្មលើឧស្ម័នធម្មជាតិរុស្ស៊ី នឹងកាន់តែពិបាកក្នុងការសម្រេចបានជាងប្រេង។ យោងតាម IEA ប្រហែល ៤៥ ភាគរយ នៃការនាំចូលឧស្ម័នធម្មជាតិរបស់អឺរ៉ុប បានមកពីរុស្ស៊ី ក្នុងឆ្នាំ ២០២១។ អាល្លឺម៉ង់ងាយនឹងរងគ្រោះជាងគេ ដោយប្រទេសនេះ នាំចូល ៥៥ ភាគរយ នៃហ្គាសពីរុស្ស៊ី មុនពេលសង្គ្រាម ហើយបន្ថយមកត្រឹម ៣៥ ភាគរយ កាលពីខែមុន៕
ហួន ឌីណា
