.jpg)
រូបភាព នាថ្ងៃទី ២៤ ខែឧសភា បង្ហាញពីសណ្ឋាគារបាក់បែក ១ ក្រោយត្រូវវាយប្រហារដោយមីស៊ីលរបស់រុស្ស៊ី។ AFP
អ្នកការទូតរុស្ស៊ីជើងចាស់ម្នាក់ នៅទីក្រុងហ្សឺណែវ បានលាលែងចេញពីតំណែង ជុំវិញការលុកលុយរបស់ប្រទេសខ្លួនលើអ៊ុយក្រែន ដើម្បីជាការតវ៉ាខាងនយោបាយដ៏កម្រមួយ ពីការបង្កើតគោលនយោបាយការបរទេសរបស់ប្រទេសរុស្ស៊ី។
លោក Boris Bondarev ទីប្រឹក្សានៅបេសកកម្មអចិន្ត្រៃយ៍របស់រុស្ស៊ី ប្រចាំអង្គការសហប្រជាជាតិនៅក្រុងហ្សឺណែវ បានសរសេរក្នុងសេចក្តីថ្លែងការណ៍ជាសាធារណៈថា៖ «ខ្ញុំមិនធ្លាប់មានការខ្មាសអៀន ចំពោះប្រទេសខ្លួនអ៊ីចឹងពីមុនមកទេ»។
អ្នកការទូតជើងចាស់ធ្វើការ ២០ ឆ្នាំ ក្នុងក្រសួងការបរទេសរុស្ស៊ីរូបនេះ បានរៀបរាប់ថា៖ «ថ្ងៃនេះក្រសួងការបរទេស មិនមែននិយាយអំពីការទូតទេ។ ទាំងអស់សុទ្ធតែទាក់ទងនឹងវោហារស័ព្ទដ៏កំរោល ការកុហក និងការស្អប់ខ្ពើម។ វាបម្រើផលប្រយោជន៍ឱ្យមនុស្សក្រុមតូច ហើយសម្រាប់ប្រជាជនតិចតួចបំផុត ដូច្នេះវារួមចំណែកដល់ភាពឯកោបន្ថែមទៀត និងការរេចរឹលនៃប្រទេសរបស់ខ្ញុំ»។ លោកបានបន្តថា៖ «រុស្ស៊ីលែងមានសម្ព័ន្ធមិត្តទៀតហើយ ហើយគ្មានអ្នកណាត្រូវស្តីបន្ទោស ក្រៅពីគោលនយោបាយ ដែលមិនប្រុងប្រយ័ត្ន និងមិនគិតគូររបស់ខ្លួននោះឡើយ»។
លោក Bondarev គឺជាអ្នកការទូតជាន់ខ្ពស់បំផុត ដែលមិនទាន់លាលែងពីតំណែងជាសាធារណៈពីក្រសួងការបរទេសរុស្ស៊ីជុំវិញសង្គ្រាម ដែលចាប់ផ្តើមនៅក្នុងខែកុម្ភៈ។ ក្នុងបទសម្ភាសន៍ជាមួយកាសែត «The Guardian» លោក Bondarev បញ្ជាក់ថា លោកសរសេរសេចក្តីថ្លែងការណ៍នេះ និងដាក់លិខិតលាលែងពីតំណែង កាលពីថ្ងៃចន្ទ។
លោក Bondarev ប្រាប់ទៀតថា៖ «ការសម្រេចចិត្តមានភាពសាមញ្ញណាស់។ នៅពេលដែលអ្នកឃើញថា ប្រទេសរបស់អ្នក កំពុងធ្វើរឿងអាក្រក់បំផុត ហើយក្នុងនាមជាមន្ត្រីរាជការ អ្នកពាក់ព័ន្ធជាមួយរឿងនោះ វាជាការសម្រេចចិត្តរបស់អ្នកគ្រាន់តែបញ្ចប់ទំនាក់ទំនងរបស់អ្នកជាមួយរដ្ឋាភិបាលប៉ុណ្ណោះ»។
លោកបានបញ្ជាក់បន្ថែមថា៖ «យើងទាំងអស់គ្នាត្រូវតែទទួលខុសត្រូវ ហើយខ្ញុំមិនចង់មានការទទួលខុសត្រូវណាមួយ ចំពោះអ្វីដែលខ្ញុំមិនយល់ស្របនោះទេ»។
ការលាលែងរបស់លោក Bondarev ក៏ត្រូវបានបញ្ជាក់ដោយប្រព័ន្ធផ្សព្វផ្សាយរុស្ស៊ី Kommersant ដែលធ្វើសេចក្ដីរាយការណ៍ថា មានអ្នកការទូតផ្សេងទៀត ដែលលាលែងពីក្រសួងការបរទេសរុស្ស៊ី ក្រោយការឈ្លានពានអ៊ុយក្រែន ប៉ុន្តែពួកគេមិនបង្ហាញជាសាធារណៈទេ។
លោក Bondarev និយាយថា ប្រសិនបើប្រទេសណាមួយផ្ដល់សិទ្ធិជ្រកកោនឱ្យលោក នោះនឹងជាការដ៏ល្អប្រសើរ ព្រោះវាមិនមែនជាគំនិតល្អទេ ក្នុងការត្រឡប់ទៅរុស្ស៊ី នាពេលនេះ។ លោកថា ការលាលែងរបស់លោក មិនមែនមានន័យថា ឱ្យអ្នកផ្សេងទៀតធ្វើតាមនោះទេ ដោយលោកស្ថិតនៅក្នុងចំណោមភាគតិចប៉ុណ្ណោះដែលធ្វើដូច្នេះ ហើយមន្ត្រីភាគច្រើន នៅក្នុងក្រសួងការបរទេសរុស្ស៊ីគាំទ្រប្រតិបត្តិការយោធា៕
ហួន ឌីណា
