ក្រសួងការបរទេសសហរដ្ឋអាមេរិកបាននិយាយកាលពីថ្ងៃអង្គារថា វាគឺជាកំហុសមួយសម្រាប់ប្រធានសិទ្ធិមនុស្សអង្គការសហប្រជាជាតិក្នុងការយល់ព្រមទៅបំពេញទស្សនកិច្ចនៅប្រទេសចិន ចំពេលមានការព្រួយបារម្ភថា ការបិទមន្រ្តីជាន់ខ្ពស់រូបនេះចូលទៅកាន់តំបន់ស៊ីនជាំងអាចប៉ះពាល់ដល់ការត្រួតពិនិត្យលើកំណត់ត្រាសិទ្ធិមនុស្សរបស់ទីក្រុងប៉េកាំង។
ក្នុងអំឡុងដំណើរទស្សនកិច្ចរយៈពេល ៦ ថ្ងៃរបស់ខ្លួន ដែលចាប់ផ្តើមកាលពីថ្ងៃចន្ទ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សអ្នកស្រី Michelle Bachelet ធ្វើទស្សនកិច្ចនៅតំបន់ភាគខាងលិចស៊ីនជាំង ជាកន្លែងដែលការិយាល័យអ្នកស្រីនិយាយកាលពីឆ្នាំមុនថា ខ្លួនជឿថា ជនជាតិភាគតិចអ៊ុយហ្គ័រជាច្រើនត្រូវបានឃុំខ្លួន ធ្វើបាប និងបង្ខំឱ្យធ្វើការដោយខុសច្បាប់។
សហរដ្ឋអាមេរិក ហៅអំពើដែលស្ថិតនៅក្រោមការចោទប្រកាន់បែបនេះថា ជា «អំពើប្រល័យពូជសាសន៍» ប៉ុន្តែទីក្រុងប៉េកាំង បដិសេធរាល់ការអះអាងទាំងអស់។
អ្នកនាំពាក្យក្រសួងការបរទេសអាមេរិកលោក Ned Price ប្រាប់ថា៖ «យើងមិនរំពឹងថា ប្រទេសចិន នឹងផ្ដល់សិទ្ធិចូលប្រើប្រាស់ចាំបាច់ ដើម្បីធ្វើការវាយតម្លៃពេញលេញ និងគ្មានការចាត់ចែងអំពីបរិយាកាសសិទ្ធិមនុស្សនៅតំបន់ស៊ីនជាំង»។
លោក Price និយាយថា៖ «យើងគិតថា វាជាកំហុសក្នុងការយល់ព្រមបំពេញដំណើរទស្សនកិច្ចមួយក្នុងកាលៈទេសៈនេះ»។ លោកបន្ថែមថា អ្នកស្រី Bachelet នឹងមិនអាចទទួលបានរូបភាពពេញលេញពី «អំពើឃោរឃៅ ឧក្រិដ្ឋកម្មប្រឆាំងមនុស្សជាតិ និងអំពើប្រល័យពូជសាសន៍» នៅក្នុងតំបន់នោះទេ។
អ្នកស្រី Bachelet ស្នើសុំឱ្យមានការចូលទៅកាន់តំបន់ស៊ីនជាំង ដោយគ្មានការហាមឃាត់ តែក្រសួងការបរទេសរបស់ចិននិយាយថា ដំណើរទស្សនកិច្ចរបស់អ្នកស្រី នឹងធ្វើឡើងនៅក្នុង «រង្វង់បិទជិត» ដោយសំដៅលើវិធានការចត្តាឡីស័ក ដើម្បីការពារការរាលដាលនៃជំងឺកូវីដ ១៩។
ដំបូងឡើយ ចិនបដិសេធថា មិនមានជំរំឃុំឃាំងណាមួយនោះទេ ប៉ុន្តែក្រោយមកទទួលស្គាល់ថា ខ្លួនបានបង្កើត «មជ្ឈមណ្ឌលបណ្តុះបណ្តាលវិជ្ជាជីវៈ» ចាំបាច់ ដើម្បីទប់ស្កាត់អ្វី ដែលខ្លួននិយាយថា ជាអំពើភេរវកម្មការបំបែកខ្លួន និងលទ្ធិសាសនាជ្រុលនិយមនៅក្នុងតំបន់ស៊ីនជាំង៕
ហួន ឌីណា
វីដេអូ៖