កាលពីថ្ងៃចន្ទ ទី ២៣ ខែឧសភា បុណ្យសពរបស់នាយទាហានអ៊ីរ៉ង់មួយរូប ត្រូវបានរៀបចំនៅក្រុងតេអេរ៉ង់ ដោយមានការចូលរួមពីប្រជាជនរាប់ពាន់នាក់ ដែលបានទាមទារឱ្យមានការសងសឹកទៅលើប្រទេសអ៊ីស្រាអែល។
កាលពីថ្ងៃអាទិត្យ វរសេនីយ៍ឯក សាយាហ្វ ខូដាយី ត្រូវបានខ្មាំងកាំភ្លើង ២ នាក់ បាញ់សម្លាប់នៅមុខគេហដ្ឋានរបស់លោក។ រដ្ឋាភិបាលអ៊ីរ៉ង់ បានធ្វើការចោទប្រកាន់ថា អ៊ីស្រាអែល គឺនៅពីក្រោយនៃការធ្វើឃាត ដែលមានសញ្ញាដូចការធ្វើឃាតមុនៗ ក្នុងសង្គ្រាមងងឹតជាច្រើនឆ្នាំចុងក្រោយនេះ។
មេបញ្ជាការកំពូលនៃឆ្មាំបដិវត្តអ៊ីស្លាម និងកងកម្លាំងឃូដ (Quds Force) ដែលជាអគ្គភាពប្រតិបត្តិការសម្ងាត់ក្រៅព្រំដែនអ៊ីរ៉ង់ បានចូលរួមក្នុងបុណ្យសពនេះ ដែលជាការឱ្យតម្រុយអំពីមុខងាររបស់វរសេនីយ៍ឯករូបនេះ។
រដ្ឋាភិបាលអ៊ីស្រាអែល បានបដិសេធ ក្នុងការធ្វើការអត្ថាធិប្បាយលើការចោទប្រកាន់នេះ ប៉ុន្តែប្រភពពីរដ្ឋាភិបាលអាមេរិក បានប្រាប់កាសែត The New York Times ថា អ៊ីស្រាអែលបានជូនដំណឹងដល់ភ្នាក់ងារចារកម្មអាមេរិកថា ខ្លួនពិតជានៅពីក្រោយការធ្វើឃាតនេះ។
បើតាមប្រភពនេះ អ៊ីស្រាអែលបានធ្វើឃាតនាយទាហានរូបនេះ ដើម្បីព្រមានអ៊ីរ៉ង់ឱ្យបញ្ឈប់សកម្មភាពរបស់ក្រុមសម្ងាត់មួយ ក្នុងកងកម្លាំងឃូដ ដែលគេស្គាល់ថា អង្គភាព ៨៤០។ អ៊ីស្រាអែលបានអះអាងថា អង្គភាព ៨៤០ ត្រូវបានគេផ្ដល់ភារកិច្ចឱ្យចាប់ខ្លួន និងធ្វើឃាតជនបរទេស នៅជុំវិញពិភពលោក ដែលរួមមានប្រជាជន និងមន្ត្រីអ៊ីស្រាអែល។ ពួកគេចោទប្រកាន់វរសេនីយ៍ឯក ខូដាយី ថា ជាមេបញ្ជាការរងនៃអង្គភាពនេះ។
អ៊ីរ៉ង់មិនធ្លាប់ទទួលស្គាល់ ឬច្រានចោលវត្តមាននៃអង្គភាព ៨៤០ ហើយបានបដិសេធធ្វើការអត្ថាធិប្បាយលើការចោទប្រកាន់របស់អ៊ីស្រាអែល ឬពិពណ៌នាលម្អិតអំពីមុខងាររបស់លោកវរសេនីយ៍ឯក ខូដាយី៕
វីដេអូ៖