ប្រទេសឥណ្ឌា បានសម្រេចចិត្តដាក់កម្រិតលើការលក់ស្ករ នៅលើទីផ្សារអន្តរជាតិ ប៉ុន្មានថ្ងៃក្រោយប្រទេសនេះ សម្រេចហាមឃាត់ការនាំចេញស្រូវសាលី។
រដ្ឋាភិបាលឥណ្ឌា បានឱ្យដឹង ក្នុងសេចក្តីថ្លែងការណ៍មួយ កាលពីថ្ងៃពុធថា ខ្លួននឹងកំណត់ការនាំចេញស្ករសត្រឹម ១០ លានតោន សម្រាប់រដូវកាលស្ករលក់លើទីផ្សារ ដែលនឹងបន្តរហូតដល់ខែកញ្ញា ដើម្បីរក្សាតម្លៃឱ្យស្ថិតក្រោមការត្រួតពិនិត្យ។
ដោយឡែក សម្រាប់អ្នកលក់ ក៏តម្រូវឱ្យស្វែងរក ការអនុញ្ញាតជាក់លាក់ពីអាជ្ញាធរ សម្រាប់ការនាំចេញស្ករសណាមួយ នៅចន្លោះថ្ងៃទី ១ ខែមិថុនា ដល់ថ្ងៃទី ៣១ ខែតុលា។
ប្រទេសឥណ្ឌា ជាប្រទេសផលិតស្ករច្រើនជាងគេលើពិភពលោក និងជាប្រទេសនាំចេញធំទី២ បន្ទាប់ពីប្រេស៊ីល។ រដ្ឋាភិបាលរបស់លោក Narendra Modi បាននិយាយថា ខ្លួនចាំបាច់ត្រូវចាត់វិធានការ ដើម្បីរក្សាស្តុកស្ករក្នុងប្រទេស បន្ទាប់ពីកំណើននៃការនាំចេញ ដែលមិនធ្លាប់មានពីមុនមកកាលពីឆ្នាំមុន និងក្នុងរដូវកាលបច្ចុប្បន្ន។
វិធានការថ្មីនេះ ធ្វើឡើង ដើម្បីកំណត់ការនាំចេញកើតឡើងនៅពេល ដែលអតិផរណាលក់រាយប្រចាំឆ្នាំ នៅក្នុងសេដ្ឋកិច្ចធំបំផុតទី៣ របស់អាស៊ី ឈានដល់ ៧,៨% នៅក្នុងខែមេសា ជាកម្រិតខ្ពស់បំផុត ក្នុងរយៈពេលជិត ៨ ឆ្នាំ។
វាក៏ជាសញ្ញាមួយផ្សេងទៀតបញ្ជាក់ ពីការកើនឡើងនូវរបបគាំពារស្បៀងអាហារ នៅជុំវិញពិភពលោកផងដែរ ដោយសារតែអ្នកផលិតធំៗ បានទប់ស្កាត់ការនាំចេញកសិផល ដោយបន្ថែមទៅលើការភ្ញាក់ផ្អើលនៃការផ្គត់ផ្គង់ ដែលបង្កឡើង ដោយការឈ្លានពានរបស់រុស្ស៊ីលើអ៊ុយក្រែន ក្នុងខែកុម្ភៈ។ គួរបញ្ជាក់ដែរថា ការនាំចេញស្រូវសាលី នៅអ៊ុយក្រែន និងរុស្ស៊ី រួមគ្នាមានចំនួនប្រហែល ៣០% នៃការនាំចេញស្រូវសាលីទាំងអស់។
ចាប់តាំងពីខែតុលា ឆ្នាំ ២០២១ ដល់ខែកញ្ញា ឆ្នាំ ២០២២ រហូតមកដល់ពេលនេះ រោងម៉ាស៊ីនស្កររបស់ឥណ្ឌា បានចុះកិច្ចសន្យាសម្រាប់ការនាំចេញប្រហែល ៩ លានតោន។ យោងតាមទិន្នន័យរបស់រដ្ឋាភិបាល បានឱ្យដឹងថា ក្នុងរយៈពេល ១២ ខែ មុនប្រទេសនេះ បាននាំចេញស្ករទៅក្រៅប្រទេសចំនួន ៧ លានតោន ដែលជាចំនួនខ្ពស់បំផុត ក្នុងរយៈពេលប៉ុន្មានឆ្នាំថ្មីៗនេះ៕
វីដេអូ៖