សហរដ្ឋអាមេរិក​បាន​កំណត់​គោលដៅ​ធនាគារ​រុស្ស៊ី​ចំនួន​ ២ កាល​ពី​ថ្ងៃ​សុក្រ ជា​ទណ្ឌកម្ម​ថ្មី​លើ​ការ​ចោទ​ប្រកាន់​ថា​ ប្រទេស​នេះ​​គាំទ្រ​ដល់ប្រ​ទេស​កូរ៉េ​ខាងជើង​ និង​កម្មវិធី​នុយក្លេអ៊ែរ​ និង​មីស៊ីល​ផ្លោង។

ការ​​ដាក់​​​ទណ្ឌកម្ម​​នេះ​ កើត​​ឡើង​បន្ទាប់​​ពី​​អ្វី​ដែល​សហរដ្ឋអាមេរិក​បាន​និយាយ​​ថា ​ជា​​​ការ​បាញ់​មីស៊ីល​ផ្លោង​​​ថ្មី​​ចំនួន​ ៣ ​គ្រាប់ ​ដោយ​​កូរ៉េ​ខាង​ជើង​កាល​​ពី​ថ្ងៃ​​អង្គារ រួម​ទាំង​​​កាំជ្រួច​​អន្តរទ្វីប​​ ១ គ្រាប់​ផង​ដែរ។

ការ​បាញ់​បង្ហោះ​នេះ បាន​កើត​ឡើង​បន្ទាប់​ពី​ប្រធានាធិបតី Joe Biden បញ្ចប់​​ទស្សនកិច្ច​នៅ​អាស៊ី ដែល​ក្នុង​​នោះ លោក​​សង្កត់​​​ធ្ងន់​លើ​ការ​ប្តេជ្ញា​របស់​ក្រុង​វ៉ាស៊ីនតោន ក្នុង​ការ​ការពារ​​​សម្ព័ន្ធមិត្ត​ពី​ការ​គំរាម​កំហែង​នុយក្លេអ៊ែរ​​​​របស់​កូរ៉េខាងជើង។

សហរដ្ឋ​អាមេរិក​ឱ្យ​ដឹង​ថា​ នេះជា​លើក​ទី២៣ ហើយ​បើ​រាប់​ទាំង​ការ​បាញ់​បង្ហោះ​​ក្នុង​សប្តាហ៍​នេះ។ គោលដៅ​​ដាក់​ទណ្ឌកម្ម​កាល​ពី​ថ្ងៃ​សុក្រ រួម​មាន​ធនាគារ​រុស្ស៊ី ២ គឺ Far Eastern និង Sputnik ដែល​សហរដ្ឋ​​អាមេរិក​និយាយ​ថា បាន​ធ្វើ​អាជីវកម្ម​ជាមួយ​អង្គភាព​​កូរ៉េខាងជើង។

នាយកដ្ឋាន​រតនាគារ​បាន​និយាយ​នៅ​ក្នុង​ការ​ប្រកាស​ទណ្ឌកម្ម​ថា ធនាគារ Sputnik ក៏​បាន​​ជួយ​​កូរ៉េខាង​ជើង ​​ក្នុង​ការ​រៀបចំ​ការ​ទូទាត់​សម្រាប់​ការ​ប្រើប្រាស់​សេវា​ផ្កាយ​រណប​របស់​រុស្ស៊ី​ផង​ដែរ​​។ ទណ្ឌកម្ម​ថ្មី​នេះ​ ក៏​បាន​កំណត់​គោលដៅ​លើ​បុរស​​កូរ៉េខាងជើង ដែល​មាន​មូលដ្ឋាន​នៅ​ប្រទេស​បេឡារុស ដែល​សហរដ្ឋ​អាមេរិក ​ចោទ​ថា ​បុរស​នោះ​​កំពុង​ជួយ​​បង្កើត​មូលនិធិ​សម្រាប់​ការ​​បាញ់​មីស៊ីល​ ​និង​​ក្រុមហ៊ុន​ពាណិជ្ជកម្ម៕

វីដេអូ៖