The Phnom Penh Post Search

Search form




Logo of Phnom Penh Post newspaper Phnom Penh Post - ប្រធាន​​អង្គការ​សហប្រជាជាតិ រង​ការ​រិះគន់​ខ្លាំង​រឿង​បញ្ហា​សិទ្ធិ​មនុស្ស បន្ទាប់​ពី​ដំណើរ​ទស្សនកិច្ច​នៅ​ចិន

ប្រធាន​​អង្គការ​សហប្រជាជាតិ រង​ការ​រិះគន់​ខ្លាំង​រឿង​បញ្ហា​សិទ្ធិ​មនុស្ស បន្ទាប់​ពី​ដំណើរ​ទស្សនកិច្ច​នៅ​ចិន

Content image - Phnom Penh Post
លោក​ស្រី Michelle Bachelet អំឡុងពេល​ធ្វើ​ដំណើរ​រយៈពេល​ ៦​ ថ្ងៃ​ ​ទៅ​កាន់​តំបន់ស៊ីនជាំង ប្រទេស​​ចិន។ រូបថត AFP

ប្រធាន​​អង្គការ​សហប្រជាជាតិ រង​ការ​រិះគន់​ខ្លាំង​រឿង​បញ្ហា​សិទ្ធិ​មនុស្ស បន្ទាប់​ពី​ដំណើរ​ទស្សនកិច្ច​នៅ​ចិន

ក្រុម​ទទួល​បន្ទុក​ខាង​​សិទ្ធិ​មនុស្ស​​ និង​ជនជាតិ​អ៊ុយហ្គ័រ​​ នៅ​ក្រៅ​ប្រទេស​ បាន​អំពាវនាវ​ឱ្យ​មាន​ការ​ថ្កោល​ទោស​​គោល​នយោបាយ​​​របស់​ប្រទេស​ចិន​ ចំពោះ​ជនជាតិ​នេះ។

មន្ត្រី​សិទ្ធិ​មនុស្ស​កំពូល​របស់​អង្គការ​សហប្រជាជាតិ​បាន​​រិះគន់​ស្រាលៗ​ ចំពោះ​ទង្វើ​​របស់​​ប្រទេស​ចិន​ លើ​ជនជាតិ​​ភាគ​តិច​មូស្លីម​ និង​​​​បាន​លើក​​ឡើង​​​នៅ​​​ចុង​​បញ្ចប់​​នៃ​​ការ​ធ្វើ​ដំណើរ​រយៈពេល​ ៦​ ថ្ងៃ​ ​ទៅ​កាន់​ប្រទេស​​នេះ​នូវ​​សំណួរ​អំពី​ការ​អនុវត្ត​វិធាន​ការ​ប្រឆាំង​ភេរវកម្ម ​និង​ការ​លុប​បំបាត់​រ៉ាឌីកាល់​សេរី​​ ​ប៉ុន្តែ​ក៏​បាន​បញ្ជាក់​​ថា ដំណើរ​ទស្សនកិច្ច​​នេះ​មិនមែន​​ជា​ការ​ស៊ើបអង្កេតទេ។

ការ​អធិប្បាយ​របស់​លោក​ស្រី Michelle Bachelet ដែល​ជា​ស្នងការ​ជាន់​ខ្ពស់​​ដំបូង​របស់​អង្គការ​​សហប្រជាជាតិ​ទទួល​​បន្ទុក​សិទ្ធិ​​មនុស្ស​​​ទៅ​ទស្សនកិច្ច​នៅ​​ចិន​តាំង​ពី​ឆ្នាំ ២០០៥ មក​​ ត្រូវ​បាន​​រិះគន់​យ៉ាង​ខ្លាំង​ពី​ជនជាតិ​អ៊ុយហ្គ័រ នៅ​ក្រៅ​ប្រទេស​​ និង​អ្នក​តស៊ូ​មតិ​សិទ្ធិ​មនុស្ស ដោយ​​​អំពាវនាវ​ឱ្យ​លោកស្រី​ថ្កោលទោស​គោល​នយោបាយ​ចិន​ឱ្យ​​ខ្លាំង​ជាង​នេះ​។

លោក​មេធាវី Rayhan Asat ដែល​​ប្អូន​ប្រុស​របស់​គាត់​ កំពុង​ជាប់​ពន្ធនាគារ​នៅ​​​ស៊ីនជាំង​និយាយ​ថា​ ការ​អធិប្បាយ​​របស់​លោក​ស្រី Bachelet ជា​ការ​បង្ហាញ​​ពី​​ការ​មិន​យក​ចិត្ត​ទុក​ដាក់​ទាំង​ស្រុង​ចំពោះ​ការ​ឈឺ​ចាប់​​របស់​ជនជាតិ​អ៊ុយហ្គ័រ។

លោក​និយាយ​ថា៖ ​«វិបត្តិ​នេះ បាន​បន្ត​អស់​រយៈពេល​ ៦​ ឆ្នាំ​ ហើយ​​​វា​មិន​ត្រូវ​ការ​ការ​ពិនិត្យ​បន្ថែម​ក្រៅ​ពី​​ការ​ថ្កោលទោស​ ទេ​​។ យើង​​មិន​​បាន​​ឃើញ​អ្វី​ជា​ដុំ​កំភួន សម្រាប់​សកម្មភាព​​របស់​លោកស្រី​ឡើយ​»។

លោកស្រី​ Bachelet ដែល​បាន​និយាយ​តាម​វីដេអូ​ជាមួយ​លោក ស៊ី ជីនភីង​ ​មេដឹកនាំ​របស់​​​ចិន អំឡុង​​ពេល​​​ធ្វើ​ដំណើរ​របស់​លោកស្រី​​ប្រាប់​ថា ​ដំណើរ​ទស្សនកិច្ច​នេះ​ គឺ​ជា​​អាទិភាព​ក្នុង​​ការ​ចូលរួម​​​​ជាមួយ​រដ្ឋាភិបាល​របស់​ចិន​លើ​​បញ្ហា​​​សិទ្ធិ​មនុស្ស​ដោយ​បន្ថែម​ថា​ ប្រទេស​នេះ​មាន​តួនាទី​សំខាន់​ក្នុង​ការ​ដើរ​តួ​ជា​​ស្ថាប័ន​ពហុភាគី​ក្នុង​ការ​ប្រឈម​នឹង​ការ​គំរាម​​ដល់​សន្តិភាព​ការ​ប្រែប្រួល​អាកាសធាតុ ​និង​វិសមភាព​​​សង្គម​។

ក្រុម​សិទ្ធិ​មនុស្ស​រិះគន់​ចំពោះ​ការ​សង្កត់​ធ្ងន់​របស់​លោកស្រី ​Bachelet លើ​ការ​ចូលរួម​ជាមួយ​រដ្ឋាភិបាល​ចិន​។ លោក Sophie Richardson មក​ពី​អង្គការ​ឃ្លាំមើល​សិទ្ធិ​មនុស្ស​បាន​និយាយ​ថា ដំណើរការ​នេះ​ តម្រូវ​​​ឱ្យ​​មាន​ការ​ស៊ើប​អង្កេត​ដ៏​គួរ​ឱ្យ​ជឿ​ជាក់​មួយ​ នៅ​ចំពោះ​មុខ​ភ្នំ​នៃ​ភ័ស្តុតាង​​ឧក្រិដ្ឋកម្ម​ដ៏​ឃោរឃៅ​​មិនមែន​ជា​​ការ​សន្ទនា​ ដែល​មិនមាន​មូលដ្ឋាន​ទេ។

អ្នក​រិះគន់​បាន​​និយាយ​ថា​​ ការ​កើន​ឡើង​ឥទ្ធិពល​ចិន​ ជា​សកល​​ជះ​ឥទ្ធិពល​លើ​អង្គការ​សហប្រជាជាតិ ហើយ​កង្វះ​​ខាត​ការ​ដាក់​សម្ពាធ​​លើ​​ចិន ​​គ្រាន់តែ​ជា​​​ឧទាហរណ៍​​ចុង​​ក្រោយ​​​បង្អស់​នៃ​ភាព​​ជោគជ័យ ក្នុង​ការ​ជះ​​ឥទ្ធិល​​របស់​ខ្លួន​នៅ​​ក្នុង​​​អង្គការ​ចម្រុះ​​​ជាតិ​​​សាសន៍​ ​ដែល​ខ្លួន​បាន​កំណត់​​រួម​​ទាំង​អង្គការ​​​សុខភាព​ពិភព​​​លោក​​​ផង​ដែរ​។

ក្រុម​សិទ្ធិ​មនុស្ស​ និង​អ្នក​សិក្សា​បាន​ឱ្យ​ដឹង​ថា ​ចិន​បាន​​ឃុំឃាំង​មនុស្ស​​ ១ ​លាន​​នាក់ ឬ​ច្រើន​ជាង​នេះ ក្នុង​ជំរំ​អប់រំ​ផ្នែក​មនោគមន៍វិជ្ជា​​ជា​ញឹកញាប់​ ​និង​​ការ​ធ្វើ​ដំណើរ​ទៅ​កាន់​ប្រទេស​មូស្លីម ឬ​ការ​លះបង់​សាសនា​​នានា​​។ អាជ្ញាធរ​​​ក៏​បាន​បំផ្លាញ​វិហារ​អ៊ិស្លាម​ និង​ទីសក្ការបូ​ជា​ចាប់​ដាក់​គុក​អ្នក​ប្រាជ្ញ ​និង​បញ្ញវន្ត​ និង​បង្ខំ​មនុស្ស​ឱ្យ​ចូលរួម​​ក្នុង​កម្មវិធី​ការងារ​​ដែល​អ្នក​ជំនាញ​និយាយ​ថា​ ជា​ការ​ធ្វើ​ពលកម្ម​ដោយ​បង្ខំ។​

ដំបូង​ឡើយ ​ចិន​​បាន​បដិសេធ​រាល់​យុទ្ធនាការ​បែប​នេះ​ តែ​ក្រោយ​​​មក​បាន​កំណត់​វា​ថា ​ជា​កម្មវិធី​វិជ្ជាជីវៈ ដែល​ត្រូវ​រចនា​​ឡើង ដើម្បី​បង្អាក់​មនុស្ស​ពី​​អំពើ​ភេរវកម្ម និង​លទ្ធិ​ជ្រុល​និយម។

នៅ​មុន​ដំណើរ​​របស់​លោកស្រី​​ Bachelet ជនជាតិ​អ៊ុយហ្គ័រ​នៅ​បរទេស​ជាច្រើន​អំពាវនាវ​​ឱ្យ​លោកស្រី​ទៅ​សួរ​សុខទុក្ខ​សមាជិក​​​គ្រួសារ​ ដែល​ជាប់​ពន្ធនាគារ ​ឬ​មិន​បាន​ទទួល​ដំណឹង​ ​ពី​ប៉ុន្មាន​​ឆ្នាំ​មក​​។​ ក្រុម​ដដែល​នេះ​ក៏​បាន​អំពាវ​នាវ​ឱ្យ​លោកស្រី​ ជួប​នឹង​មេដឹកនាំ​ចិន​ជុំ​ញ​គោលនយោបាយ​ក្នុង​តំបន់​ ដែល​សហរដ្ឋអាមេរិក​ និង​រដ្ឋាភិបាល​មួយ​ចំនួន​ផ្សេងទៀត ចាត់​ទុក​​ជា​អំពើ​ប្រល័យ​ពូជសាសន៍៕

វីដេអូ៖

អត្ថបទគួរចាប់អារម្មណ៍